Qeveria akuzon Bankën Botërore si të lidhur me mafien e ndërtimit
Ministri i Financave, në kuadër të debatit të lindur dhe situatës së re të krijuar nga konfliktet me Bankën Botërore, paralajmëroi vazhdimin e zbatimit të projektit të Jalës në mënyrë të shpejtë pavarësisht faktit se është pezulluar nga banka Botërore, “pasi me këtë projekt lidhen jo vetëm fondet e BB, por edhe fonde të donatorëve të tjerë, nga të cilët vjen edhe pjesa dërmuese e fondeve”. Bode theksoi po ashtu se “do të vijojmë me projekte të tjera në të njëjtën mënyrë dhe ritëm për të ruajtur atë konsideratë të shprehur nga BB, që rasti i Shqipërisë përbën një histori suksesi të punës së saj në Evropë dhe në Ballkan”. Ditët e fundit edhe shefja e zyrës së Bankës Botërore në Tiranë znj. Naumah, në vijim të qëndrimit të deklaruar nga Bordi i Guvernatorëve të Bankës Botërore evidentoi faktin se çështja e projektit të menaxhimit të Integruar të bregdetit shqiptar, është një çështje e brendshme e BB dhe që nuk afekton aspak veprimtarinë e qeverisë në zbatimin konform marrëveshjes të këtij projekti.

Lidhur me këtë, Bode tha se kohët e fundit, opozita, nën influencën e disa grupeve mediatike, të cilat humbën njollat e tyre të ndërtimit, të reflektuara në mënyrë korruptive në zonën bregdetare ku zhvillohet ky projekt, të cilat kishin filluar t’i marketonin këto njolla, si dhe nën ethet e shpifjeve ndaj qeverisë, kërkonin me çdo kusht të përfshinin qeverinë shqiptare në një çështje të brendshme të BB. Bode evidentoi se “Bordi i Guvernatorëve të Bankës, si dhe zyra e saj në Tiranë, përmes deklaratave që distancojnë Bankën nga konsideratat e pabazuara të panelit të inspektimit në raport me qeverinë shqiptare, mori në mbrojtje dhe konfirmoi bashkëpunimin e shkëlqyer midis qeverisë dhe Bankës, duke e cilësuar rastin e Shqipërisë në vijimësi si një histori të suksesshme bashkëpunimi”. Gjithsesi, qeveria shqiptare, përmes një letre të Guvernatorit të saj, drejtuar panelit të inspektimit si dhe menaxhimit të BB, ka kërkuar konfrontimin e fakteve, dokumenteve dhe konsideratave jo korrekte të raportit të inspektimit. Ministri tha se çështjet që qeveria shqiptare i konsideron jo korrekte, të influencuara nga interesa të grupeve që kanë interferuar me misionin faktmbledhës në Shqipëri kanë të bëjnë me disa pika. Ai përmendi së pari me faktin që plani i njollave ndërtimore, i vendosur nga qeveria e mëparshme, përpiqet t’i atribuohet qeverisë aktuale.

“Dihet që plani i miratuar përfundimisht dhe i hedhur për zbatim nuk përcakton njolla, madje i heq të gjitha njollat ndërtimore të vendosura në projektin e vitit 2005 nga qeveria e mëparshme. Ky ka qenë dhe elementi që ka prekur interesa të caktuara me Shqipërinë dhe që ka ndërhyrë në përgatitjen ose në tentativat për të mbrojtur vendosjen e njollave në këtë zonë ndërtimore”. Së dyti, sipas Bodes, në raportin e panelit të inspektimit, thuhet se nuk ka pasur prishje të ndërtimeve pa leje para fillimit të këtij projekti, në pranverë të vitit 2007 dhe se këto përbëjnë prishjet e para në zonën e studimit që mbulon projekti.

“Në të vërtetë, qeveria i ka ofruar dokumente dhe fakte BB- së, ku vërtetohet e kundërta dhe sipas këtyre dokumenteve që i janë prezantuar edhe panelit të inspektimit dhe menaxhimit të Bankës, në vitin 2004 janë prishur 200 ndërtime pa leje; në vitin 2006 janë 110 ndërtime dhe në vitin 2007 janë prishur 90 ndërtime pa leje, në zonën bregdetare”, - vuri në dukje ministri. Ai theksoi se në Jalë, ku bëhet edhe epiqendra e debatit, në vitin 2004 është autorizuar prishja e 8 ndërtimeve pa leje nga 12 që janë prishur në vitin 2007. Sipas ministrit, autorizimi për këto prishje është marrë nga z. Mark Nikolli, i cili ka qenë drejtor i Policisë Ndërtimore në atë periudhë. Prishja e ndërtimeve pa leje ka qenë një proces, i cili është konsideruar nga vetë projekti, që në dhjetor 2004. Banka kërkon, dhe ekziston dokumenti, prishjen e ndërtimeve pa leje në zonë e cila do të mbulohet nga projekti dhe po ashtu, gjatë përpilimit të projekti, ka një komponent për Policinë Ndërtimore, që synon blerjen e mjeteve për prishjen e ndërtimeve pa leje, sepse ka qenë i konceptuar si i tillë. Për ministrin, kjo nuk do të thotë që Banka ka dhënë urdhrin për prishjen e ndërtimeve pa leje, por që absolutisht ka qenë një procesi i konsideruar prej saj.

Ministri theksoi se prishja e ndërtimeve pa leje është pjesë e detyrimit të qeverisë, cila duhet të zbatojë në mënyrë rigoroze ligjin dhe ndërtimet pa leje janë prishur jo vetëm në zonën e mbuluar nga projekti i BB -së, por në të gjithë bregdetin shqiptar nga Durrësi në Velipojë. “Kjo përbën një detyrim për qeverinë shqiptare dhe askush nuk mund të kërkojë moszbatimin e ligjit por zbatimin e tij”, paralajmëroi Bode. Në fund, Bode tha se “shpreh vendosmërinë e qeverisë shqiptare që të vijojmë të insistojmë përpara panelit të inspektimit, për të marrë një përgjigje rreth pasaktësive që ka pasur panelit i inspektimit, aq më tepër që ka pasur një raport nga një kompani e paguar prej BB- së dhe ky raport asnjëherë as nuk u publikua dhe as nuk mor në konsideratë nga paneli i inspektimit”.

SOT