Kryeministri Sali Berisha paraqet sot në Pragë kërkesën për anëtarësimin e plotë të Shqipërisë në Bashkimin Evropian. Kryeministri çek Topolanek dhe komisioneri i BE-së për Zgjerimin, Michael Leigh mirëpresin aplikimin e Shqipërisë dhe premtojnë kthimin e përgjigjes brenda një periudhe shumë të shkurtër.

TIRANE - Shqipëria do të paraqesë kërkesën e saj për aplikimin për statusin kandidat në Bashkimin Evropian. Kërkesa zyrtare e bërë më dije të dielën gjatë një mbledhjeje jashtë radhe të Këshillit të Ministrave do ti dorëzohet sot në Pragë, kryeqytetin e Çekisë, vendit që mban presidencën e radhës së Bashkimit Evropian, Kryeministrit Mirek Topolanek nga kreu i Qeverisë shqiptare Sali Berisha.
Kryeministri Berisha do të shoqërohet në këtë vizitë historike nga Ministri i Jashtëm, Lulzim Basha dhe Ministrja e Integrimit, Majlinda Bregu. Gjatë kësaj vizite një ditore, kryeministri Berisha do të zhvillojë një takim kokë më kokë me Kryeministrin çek, Mirek Topolanek dhe me Drejtorin e Përgjithshëm për Zgjerimin në BE, Michael Leigh, takim i cili do të pasohet nga bisedime mes dy delegacioneve.
Ndërkaq në përfundim të bisedimeve do të zhvillohet një konferencë e përbashkët për shtyp ku Kryeministri shqiptar dhe ai çek, si dhe Drejtori i Përgjithshëm për Zgjerimin në BE, Leigh, do t’i përgjigjen interesimit të mediave lidhur me Aplikimin e Shqipërisë për Statusin e Vendit Kandidat në BE, konferencë kjo që do të pasohet nga akti ceremonial i Dorëzimit të Aplikimit për Anëtarësim në BE e Republikës së Shqipërisë nga Kryeministri i Republikës së Shqipërisë, Kryeministrit të Republikës së Çekisë, zotit Mirek Topolanek.
Pas kësaj ceremonie Kryeministri i Çekisë, Mirek Topolanek do të shtrojë një drekë zyrtare për nder të Kryeministrit Berisha dhe të delegacionit shqiptar që e shoqëron atë. Vizita e Kryeministrit Berisha në Çeki do të vijojë me ceremoninë solemne të vendosjes së kurorës në Pod Emauzy Square.
Më pas Kryeministri Berisha do të pritet në Kështjellën e Pragës nga Presidenti i Republikës së Çekisë, Vásllav Klaus, do të zhvillojë një takim me Kryetarin e Dhomës së Deputetëve të Parlamentit të Republikës së Çekisë Miloslav Vlçek si dhe me zëvendëspresidentin e Senatit të Parlamentit të Republikës Çeke, Jiri Liska.
Shefi i qeverisë e ka vlerësuar kërkesën për aplikim si një akt të një rëndësie përcaktuese në procesin e anëtarësimit të plotë të Shqipërisë në BE. Sipas tij ky vendim i cili nuk vjen si një vendim i një anshëm, por si një vendim plotësisht i bashkërenduar me vendin kryesues, kryesinë e radhës së BE dhe me vendet anëtare të unionit. Kryeministri Berisha ka konfirmuar se kërkesa për statusin kandidat, bëhet pasi Shqipëria i ka plotësuar të gjitha detyrimet për të qenë anëtare e BE.
“Në rast se 4 vjet më parë ne u zotuam para shqiptarëve se ‘alfa’ dhe ‘omega’ e programit tonë do të jenë reformat, kënaqësia e madhe është se ato nuk ishin reforma në letër, por reforma me rezultate konkrete, reforma të cilat i mundësuan Shqipërisë që, në 4 prill 2009, të anëtarësohet në NATO, reforma të cilat bënë të mundur që, në një hark kohor më të shpejtë se për të gjitha vendet e rajonit, vendet anëtare të BE-së të ratifikojnë pa asnjë rezervë, Marrëveshjen e Stabilizim-Asociimit me Shqipërinë, reforma të cilat bënë të mundur që në një hark kohor të shkurtër Shqipëria të ftohet për të paraqitur kërkesën për statusin e kandidatit. Lumenj djerse, mundi, sakrifice dhe mendjeje, janë derdhur për të shënuar këtë kthesë rrënjësore. Historia është e tillë; për të hapur negociatat dhe për të firmosur marrëveshjen e Stabilizim-Asociimit u deshën 7 vite, më gjatë se asnjë vend tjetër. Kjo nuk ndodhi absolutisht për ndonjë shqiptaro-fobi, përkundrazi, shqiptarët kanë pasur solidaritetin më të madh se çdo vend tjetër. Por kjo ka ndodhur sepse reformat mbeteshin në letër. Ndërsa, nga 12 shtatori 2006 deri në janar 2009, reformat e kësaj periudhe u certifikuan nga të gjitha vendet anëtare, me vlerësimet më pozitive”, tha Berisha.

Kërkesa zyrtare për aplikim ne BE

“Shkëlqesia Juaj, zoti President!
Në emër të Republikës së Shqipërisë, në vijim të rezolutës së Kuvendit të Shqipërisë për integrimin e Shqipërisë në Bashkimin Evropian, të datës 29 janar 2009, mbështetur në aspiratën dhe vullnetin mbizotërues të popullit shqiptar për t’u bërë pjesë e Bashkimit Evropian, kemi nderin që, në përputhje me nenin 49 të Traktatit të Bashkimit Evropian, të paraqesim aplikimin e Republikës së Shqipërisë për anëtarësim në Bashkimin Evropian.
Përfitojmë nga rasti për t’i ripërsëritur Shkëlqesisë Suaj sigurimet e konsideratës sonë më të lartë”.
55