Tiranë -Në përfundim të vizitës në Tiranë, delegacioni para-elektoral nga Asambleja Parlamentare e Këshillit të Evropës (APKE) thekson se autoritetet kanë përgjegjësinë të marrin të gjitha masat e nevojshme për t’i siguruar çdo votuesi një Kartë të re Identiteti në mënyrë që të sigurohet se të gjithë votuesit do të jenë në gjendje të përmbushin të drejtën e tyre kushtetuese më 28 qershor.

"Opozita nuk duhet te shfrytezoje politikisht procesin e kartave te identitetit, por duhet te kontribuoje qe ky proces te perfundoje brenda afateve". Keshtu deklaroi Korien Jonker, kryetare e delegacionit parazgjedhor të Asamblesë Parlamentare të Këshillit të Evropës.

Ky delegacion nënvizon se çështjet lidhur me kartën e identitetit duhet të zgjidhen në një mënyrë plotësisht transparente për të siguruar besimin publik, si dhe besimin e të gjitha partive politike, në proçesin elektoral demokratik në Shqipëri.

Delegacioni vlerëson se zgjedhjet parlamentare të 28 qershorit 2009 do të jenë një test pjekurie për demokracinë në Shqipëri. Në këtë drejtim, ai i bën thirrje autoriteteve në Shqipëri të implementojnë plotësisht rekomandimet e Asamblesë Parlamentare që i përmban Rezoluta e saj 1538 (2007).

Delegacioni para-elektoral takoi Kryeministrin.Sali Berisha, Kryetaren e Parlamentit, Jozefina Topalli, Ministrin e Punëve të Jashtme, Lulëzim Basha, Ministrin e Brendshëm, Bujar Nishani, anëtarët e delagacionit shqiptar në APKE, Kryetarin dhe anëtarët e KQZ-së, liderët e partive politike që marrin pjesë në këto zgjedhje, përfaqësuesit e medias, shoqërisë civile dhe të komunitetit ndërkombtar.

Asambleja Parlamentare do të dërgojë një delegacion me 20 anëtarë për të vëzhguar zgjedhjet parlamentare të 28 qershorit 2009.