Nuk kanë të mbaruar gafat dhe “çmenduritë” e kryebashkiakut të Himarës, dje provokimi i radhës

Nuk kanë të mbaruar gafat dhe “çmenduritë” e kryebashkiakut të Himarës, Vasil Bollano. Këtë radhëkryetari i Omonias Vasil Bollano, pretendon se prezenca greke në Shqipëri dhe veçanërisht në jug të vendit, është

shumë më e madhe se ajo që është deklaruar më parë nga institucionet shkencore shqiptare. Duke mos u mjaftuar me kaq, Bollano duke shfrytëzuar ditën ndërkombëtare për të drejtat e njeriut, ka hedhur një deklaratë sa të fortë, aq edhe provokuese. Ai deklaroi se Shqipëria është një territor i banuar nga grekët që në shekullin e shtatë para Krishtit, të cilët themeluan edhe qytetin e Dyrrahut, Durrësin e sotëm. Për Bollanon, tre të pestat e popullsisë në jug ishin grekë që flisnin greqisht, ndërsa një pjesë tjetër sërish grekë, po që flisnin gjuhën vllahe. Ndërkohë, nga shteti shqiptar, nuk ka pasur ende asnjë reagim për deklaratën e Bollanos.
Regjistrimi i minoritetit
Ndërsa kryetari i Partisë së Bashkimit për të Drejtat e Njeriut, Vangjel Dule, ka paraqitur të tjera kërkesa ndaj qeverisë shqiptare, kësaj here për të regjistruar minoritetin grek në Shqipëri, në bazë të përkatësisë etnike. "Shqipëria ka nënshkruar shumë konventa ndërkombëtare për mbrojtjen e të drejtave të pakicave etnike dhe i ka të mbrojtura në legjislacionin shqiptar këto të drejta”, u shpreh Dule në tryezën me temë "Minoritetet, pjesëmarrje dhe integrim”. Ai tha se “është koha që qeveria ta propozojë dhe Parlamenti ta miratojë këtë ligj dhe ne do të jemi kontribuuesit kryesorë, me qëllim që me këtë ligj "të njihen dhe të respektohen në mënyrë komplekse të drejtat e të gjithave pakicave kombëtare në Shqipëri”. Në vijim të kësaj çështjeje, Bollano theksoi gjatë këtij takimi, se problem mbetet regjistrimi i popullsisë së minoritetit grek. "Janë bërë disa përpjekje në vitin 2001 për regjistrimin e kësaj popullsie, por ka qenë i shpejtuar dhe jo i plotë", tha Bollano, i cili nënvizoi se "në kuadër të këtyre nismave, ka një angazhim serioz të qeverisë Berisha, e cila ka premtuar se në vitin 2011 do të përfundojë regjistrimi i plotë dhe demokratik i të gjithë pakicave kombëtare në Shqipëri, me qëllim që shifrat të jenë të sakta dhe të besueshme”.
Kundërshtimi i Godos
Por kjo ide nuk ka qëndruar dhe aq në heshtje. Politikani dhe historiani Sabri Godo deklaroi pak ditë më parë, se regjistrimi i popullsisë në baza etnike do të ishte një veprim i rrezikshëm në dëm të Shqipërisë. “Ndërsa të tjerat mund t’i marrë kalimthi dhe si një lloj shakaje që duhet qortuar, kjo ka një përmbajtje tjetër. Ja çfarë rreziku. Ajo që thotë Berisha ka të bëjë me të drejtat universale të njeriut, por si i bëhet me familjet e regjistruara me kombësi greke? Janë me qindra familje në Korçë, Gjirokastër, Delvinë e Sarandë që marrin pensione greke. Nuk jam kundër pensionit por kundër dokumentit që kanë nënshkruar, i cili i detyron të ndryshojnë kombësinë. Këtu duhet të vërë dorë shteti shqiptar. Do të kemi më tepër njerëz me kombësi greke nga ç'kemi realisht, dy ose tre herë më tepër. Kjo i jep të drejtë palës greke të thotë që, ky është territori im sepse është i banuar në shumicën e vetë nga qytetarë që kanë kombësi greke. Rrjedhimisht kërcënon drejtpërdrejt tërësinë tokësore të shtetit shqiptar”, u shpreh Godo disa ditë më parë.

Xhufi: Grekët, thjesht koloni
Historiani Pëllumb Xhufi ironizon pohimet e kreut te Omonias Vasil Bollano. Sipas tij, kolonitë greke janë krijuar jo vetëm në Shqipëri por edhe në Detin e Zi, në Francë apo edhe në Angli.
Xhufi pohon se vetë fakti që grekët kishin koloni në disa pika të bregdetit shqiptar tregon se këtu kemi të bëjmë me një popullsi tjetër nga kolonizuesit. “Historianët grekë tregojnë se aty ku ka pasur koloni greke, si në Apolloni dhe Durrës, popullsia ka qenë barbare, që do të thotë “e huaj” në gjuhën klasike. Pra, s’kanë qenë grekë”, deklaron Xhufi. Sipas historianit, prezenca e grekëve të ardhur në shekullin VII në Shqipëri është e papërfillshme, përkundër shifrave të manipuluara që jep Bollano. “Ata kanë ardhur këtu si hallexhinj dhe jo si pushtues. Kanë ardhur me pakte të bëra me popullsinë dhe kanë jetuar paqësisht”, thekson Xhufi. Xhufi jep edhe përkufizimin e tij profesional për deklaratat e bëra nga Vasil Bollano. “Këto janë absurditete që mund t’i thotë vetëm një njeri me arsim të mesëm bujqësor siç është Bollano”, shton Xhufi.



tirana observer