Do të dërgohen ndihma në ushqime dhe veshmbathje në çdo familje pritëse për banorët e evakuar

Personat që me akte të turpshme kanë përhapur panik të rremë në zonat e prekura nga përmbytjet do të identifikohen dhe do të ndëshkohen sipas ligjit. Kryeministri Berisha duke garantuar qytetarët e Shkodrës se gjithccka është nën kontroll të plotë dhe se digat dhe portat e tyre po funksionojnë normalisht theksoi se do t`u kërkohet organeve kompetente që të identifikohen dhe të marrin ndëshkimin e merituar të gjithë ata që tentuan të përhapin panik tek qytetarët. "Nuk them se situata nuk është e vështirë, pa diskutim që është situatë serioze, por është e tëra në kontroll në territoret e përmbytura. Digat, portat e gjithçka janë në kontroll të plotë dhe ato funksionojnë shumë shumë mirë. Ndaj, ato aktet e djeshme aq të turpshme, njerëz të cilët përhapnin panik në qytet, unë kërkoj nga organet kompetente që t'i gjejnë, t'i identifikojnë dhe le të marrin një ndëshkim shembullor", u shpreh Berisha. Gjithashtu, Kryeministri kërkoi gatishmërinë e plotë të të gjitha komisioneve të emergjencës civile në zonat e përmbytura. Ai kërkoi që autoritetet e rezervave të shtetit dhe të ndihmës, duhet të identifikojnë të gjitha familjet që kanë marrë njerëz për të strehuar në banesat e tyre. "Është e domosdoshme që të funksionojnë komisionet në çdo komunë, ashtu siç edhe po funksionojnë, por duhet të zgjerohen me njerëz. Kemi edhe një problem të dytë. Ne vërtetë kemi hapur dhe vënë në dispozicion kapacitete të mëdha për t'i pritur banorët e evakuuar, por bujaria shqiptare, bujaria shkodrane, është e tillë që ka bërë që këta njerëz, ata i kanë strehuar në shtëpitë e tyre. Autoritetet e rezervave të shtetit dhe të ndihmës, duhet të identifikojnë këto familje që kanë marrë njerëz dhe të shpërndajnë për ta ushqime, me shumë mirënjohje, për gjestin e tyre. Ne duhet të dërgojmë me shpejtësi në çdo familje pritëse ushqime, veshje e çfarë ata kanë nevojë", tha Kryeministri, ndërsa shtoi se nuk duhet të mbetet asnjë familje e vetme pritëse, qoftë u shpreh ai, edhe në shenjë vlerësimi ndaj gjestit të saj, pa u ndihmuar, me ushqime, ujë, veshje e gjithçka që ata kanë nevojë. Situata është tërësisht në kontroll.
Kaskada nën kontroll dhe funksionon pa asnjë lloj difekti
Gjithçka në kaskadë është në kontroll të plotë dhe funksionon pa asnjë lloj defekti, sipas përcaktimeve të projekteve. Duke theksuar se kjo qeveri është në transparencë absolute, Kryeministri vuri në dukje se të gjitha instancat kanë porosi që të paraqesin me vërtetësi maksimale çdo gjë. "Nuk do t'u mbetej të tjerëve që të kujdeseshin për Shkodrën, por do të ishim ne të parët që do të kujdeseshim. Në mënyrë absolute nuk ka asnjë motiv për këtë. Gjithë manovrimi, gjithë menaxhimi, po bëhet në përputhje të plotë me rregullat e funksionimit të kaskadës dhe në interes gjithëkombëtar. Komani ka zbritur në nivelin 172 metra dhe do të zbresë edhe më shumë, ndoshta do të zbresë në 170 metra. Ndaj nuk ka asnjë rrezik për qytetin, rreziku është zero. Këto ujëra kanë hyrë të Bahçallëk, por e vërteta është se kjo lagje, edhe pa këtë situatë, ka pasur gjithnjë probleme në këtë kohë", vijoi kreu i qeverisë.
Po punohet për rikthimin në funksion të rrugës së Dajccit
Kreu i qeverisë përsëriti edhe njëherë dje apelin ndaj banorëve të zonave të përmbytura që të pranojnë evakuimin për të shmangur ccdo situatë serioze që ka të bëjë me jetën njerëzore. Gjatë takimit të Komitetit Ndërministror të Emergjencës Civile, kryeministri Berisha përshëndeti të gjithë banorët që kanë pranuar të evakuohen dhe ripërsëriti angazhimin maksimal të qeverisë për plotësimin e të gjitha kushteve për ta. Në cilësinë e kryetarit të Komitetit qeveritar të Emergjencave Civile, ministri Basha e informoi Kryeministrin me ecurinë e situatës dhe menaxhimin e saj. Nga ana tjetër, edhe prefekti i Shkodrës, Maxhid Cungu e njohu Kryeministrin me veprimet e ndërmarra nga strukturat përkatëse për situatën. Cungu theksoi se në dispozicion të banorëve të ndodhur në zonat e përmbytura janë vënë numra telefoni, ku ata mund të kontaktojnë jo vetëm në rastet emergjente, por edhe në çdo moment kur atyre u nevojitet ndihmë. Gjithashtu, Cungu u shpreh se është ngritur një grup pune që menaxhon dhe verifikon shpërndarjen e ndihmave për banorët në nevojë dhe familjet që kanë strehuar këta banorë. Pasi u njoh me situatën, fillimisht Kryeministri Berisha përshëndeti të gjithë banorët e zonave të përmbytura që kanë pranuar të evakuohen, duke vlerësuar bashkëpunimin e tyre. "Dua të përshëndes të gjithë banorët e zonave të përmbytura dhe t'i falënderoj për bashkëpunimin e madh e të çmuar që kanë treguar gjatë gjithë kësaj periudhe, për përballimin e pasojave të përmbytjes, për gjakftohtësinë dhe guximin me të cilin ata trajtuan problemin", tha Kryeministri, duke përsëritur ftesën e tij për të gjithë banorët e tjerë që kanë mbetur në zonat e prekura nga përmbytjet që të evakuohen. Kryeministri theksoi se mbarë qytetarët shqiptarët janë solidarizuar me problematikën e hasur në zonat e përmbytura dhe mbështesin evakuimin e menjëhershëm të tyre. "Kjo është kërkesa ime si kryeministër, si qeveri. Por, ata duhet ta dinë se kjo është kërkesa e çdo shqiptari sot. Sot, mendjet dhe zemrat e shqiptarëve janë të fokusuar tek këto familje të përmbytura. Ka një rëndësi të jashtëzakonshme që popullata, i madh e i vogël, të evakuohen. Unë insistoj sërish, sepse nivelet e ujit janë rritur dhe po rriten dhe në momente të caktuara, siç është faktuar, as fuqitë më të mëdha të botës, në situata të tilla, nuk kanë qenë të zonjat të përballen me sukses. Ndaj edhe ne duhet të përballemi me sukses, duke u tërhequr, duke u evakuuar në kohën më të parë të mundshme. Këtu duhet të jetë përqendrimi ynë total", u shpreh Kryeministri. Gjithashtu, ai vuri në dukje se procesi ka ecur në bazën e mirëkuptimit dhe mbi bazën e realizmit. Ai theksoi se nëse do të jetë e nevojshme evakuimi i banorëve do të bëhet edhe me forcë. Kryeministri theksoi se të gjitha autoritetet vendore dhe Komiteti qeveritar i Emergjencës Civile duhet të mobilizohen tërësisht në evakuimin e shpejtë të banorëve. "Ne nuk duam të detyrohemi të largojmë njerëz me forcë nga shtëpitë e tyre, por për të shpëtuar jetën e tyre, edhe mund të detyrohemi. Ndaj kjo ka një rëndësi shumë të madhe. Komiteti Ndërministror i Emergjencës, autoritetet qeveritare vendore, komiteti i prefekturës, duhet të kenë një përqendrim të plotë e total në evakuimin e banorëve të të gjitha këtyre zonave", tha Berisha. Duke informuar mbi të dhënat e fundit përsa i përket situatës, Kryeministri theksoi se 3-4 ditë, është katërfishuar sipërfaqja e përmbytur. Ai vuri në dukje se kanë qenë mbi 2 ha sipërfaqe dhe aktualisht, shifra ka arritur në 10 500 ha sipërfaqe të përmbytur. "Ka rëndësi shumë të madhe në qoftë se arrijmë ta rikthejmë edhe njëherë në funksionim rrugën e Dajçit. Dhe zvogëlimi i shkarkimit që u bë sot, është bërë me këtë qëllim. Por nga ana tjetër, edhe ju, së bashku me ekspertë të ujërave, duhet të shqyrtoni nëse ka ndonjë mundësi që të mund ta mbrojmë më mirë këtë rrugë. Ajo rrugë është shumë e rëndësishme. Varka kemi në dispozicion dhe të tjera edhe mund të marrim, por nuk duhet të harrojmë se ndryshimi mes varkës e makinës është shumë i madh, si në manovrim, në shpejtësi e në të gjitha aspektet. Kështu që duhet të përpiqemi të rikthejmë edhe njëherë rrugën për të evakuuar ata që kanë mbetur dhe të përqendrohemi në të gjitha zonat", vijoi Berisha.
Numra telefoni me shërbim 24 orësh për banorët e përmbytur
Komiteti Ndërministror i Emergjencës ka vënë në dispozicion të banorëve disa numra telefoni, të cilët do të funksionojnë për të vendosur një komunikim pa ndërprerje me zonat e përmbytura. Kryeministri Berisha tha gjatë mbledhjes së djeshme të këtij Komiteti se duhet garantuar komunikim me ccdo kusht, me ccdo lagje dhe ccdo shtëpi nëse bëhet e mundur. Gjithashtu kreu i qeverisë e vuri theksin në gatishmërinë që ka shfaqur qeveria italiane për të ofruar ndihmën e saj. "Këtu është këshilltari kryesor i Kryeministrit Berluskoni për energjetikën, është njëkohësisht Kryetari i Komitetit të Digave në Itali. Ai ka ardhur i autorizuar nga Kryeministri Berluskoni për të parë të gjithë problematikën dhe natyrisht, për të parë edhe gjithë nevojat. Prandaj, për çfarë të kemi nevojë, pala italiane është e gatshme të vihet në dispozicion e të ndihmojë. Është një zgjedhje e mirë që Komiteti Ndërministror qëndron në Shkodër", tha Kryeministri. Gjithashtu ai vlerësoi punën që kanë bërë edhe këshillat, kryetarët e komunave, kryepleqtë, të cilët e kanë bërë natën ditë. "Krahas çështjes së evakuimit, kam merak shpërndarjen e ndihmave. Duhet që ndihmat të shpërndahen edhe në ato familje ku kanë shkuar këta banorë. Familjet, të cilat kanë marrë njerëz në shtëpitë e tyre mund t'u merret numri i telefonit dhe të kontaktohen. Peshkatarët të cilët janë vënë në dispozicion këto ditë, le të punojnë kundrejt një pagese, sepse edhe ata kanë familje. Nga ana tjetër, ata kanë eksperiencën më të madhe me ujërat dhe mund të ndihmojnë", vijoi më tej kreu i ekzekutivit. Kryeministri theksoi se është shumë e rëndësishme shqyrtimi i mundësisë për të ndërhyrë në lumin Bunë. Duke theksuar se mbi këtë proces duhet një studim serioz dhe i mirëprojektuar, Berisha vuri në dukje se ndërhyrjet në këtë lumë do të lehtësonin disi situatën. "Ndaj duhet të bëhen studime dhe të përcaktohet thellësia, për të parë nëse vërtetë ka probleme diznivelesh në thellësi dhe në qoftë se faktohet se ka derdhje diku për shkak të grumbullimeve të prurjeve, atëherë ne do të përgatitemi të ndërhyjmë, sepse kjo do të na lehtësojë edhe evakuimin e këtyre milionë metër kub ujë që janë në këto 10 mijë ha të përmbytur", tha më tej Berisha. Gjithashtu, ai bëri me dije se i ka kërkuar ministrit të Jashtëm që të lidhet edhe me Malin e Zi dhe po të jetë nevoja edhe me Kroacinë për të marrë ndihmë nëse provohet që kjo ndërhyrje është e vlefshme. "Unë nuk besoj se studimi është i vështirë. Duhet të bëjmë një studim ushtarak, të thirren mjetet dhe të bëhet një ndërhyrje për të lehtësuar shkarkimin e ujërave. Kjo do të jetë pozitive. Le të përgatitemi me çdo gjë për të lehtësuar situatën. Helikopterët e ushtrisë janë në dispozicion dhe i ftoj autoritetet vendore që t'i kërkojnë kur iu duhen dhe gjykojnë se në ndonjë zonë të caktuar nuk ka ndonjë mundësi tjetër evakuimi përveç se me helikopterë. Është shumë pozitive që edhe vendet mike na kanë ofruar ndihmë me dhënien e barkave. Ato na duhen dhe duhet të jenë ngado", vijoi më tej Kryeministri. Për t'u ardhur në ndihmë banorëve të zonave të përmbytura, Bashkia e Shkodrës ka vënë në dispozicion të qytetarëve këta numra telefonikë: 02 24 23 83 / 02 24 23 93 / 02 24 37 83. Ndërsa qarku i Shkodrës ka vënë në dispozicion këta dy numra të tjerë, 02 24 84 09 / 02 24 23 73. Sipas Ministrisë së Brendshme, shërbimi pranë këtyre numrave është 24 orësh. Operatorët marrin informata nga qytetarët në lidhje me problemet që mund të kenë për shkak të situatës së përmbytjeve.

bota sot