Bosch: Presidenti Topi mund të luajë rolin e negociatorit mes palëve

Ndërkombëtarët vazhdojnë të këmbëngulin duke bërë thirrje për një dialog politik midis opozitës dhe maxhorancës, duke u bazuar në Kushtetutë. Kambana e diplomacisë së huaj bie më shumë për Partinë Socialiste, e cila të gjitha pretendimet e saj duhet t’i shtrojë në Kuvend, por që nga ana e saj nuk pranon të bëjë një gjë të tillë. Ambasadori i OSBE-së në Tiranë Robert Borch, ka bërë dje apel për bashkëpunim mes maxhorancës dhe opozitës për të zgjidhur

krizën politike, sipas Kushtetutës. Me këtë kërkesë sugjerim, Borsh i lë të kuptojë opozitës se gjëja më e vlefshme që mund të bëjë, është të hyjë në kuven, sepse kushtetuta nuk lë hapësirë ligjore për hapje kutish, duke qenë se ka një vendim gjykate, një vendim nga KQZ si dhe një miratim nga komisionerët socialistë të zgjedhur nga vetë Rama, të cilët kanë pranuar dhe certifikuar rezultatin zgjedhor të 28 qershorit. “Është koha e dialogut në të mirë të të gjithë shqiptarëve”, ka theksuar Borch. Ambasadori Bosch i bëri thirrje partive politike të zbatojnë rekomandimet që Këshilli Evropian do të japë në rezolutën e cila do të pranohet këtë javë në Strasburg. “Shpresoj që draft rezoluta e Këshillit të Evropës që do të pranohet këtë javë në Strasburg do të krijojë një situatë në të cilën partitë do të mund të mblidhen së bashku. Kam parë reagime pozitive nga të dyja palët, dhe kjo është një gjë e mirë, por tani duhet të merren hapa të tjerë pasues. Sigurisht sa here që kemi dy palë që kanë opinion të ndryshëm për një çështje duhet të arrihet kompromis, sepse nuk është një ndeshje futbolli, që në fund ka vetëm një fitues. Ai që duhet të respektohet në këtë rast është interesi i vendit. Ndaj fitues nuk mund te jenë një apo dy persona, por 3 milionë shqiptarë. Shpresoj vërtetë që të zbatohet rekomandimi që do të jepet nga Këshilli Evropës”, pohoi Borch. Ambasadori tha më tej se faktori ndërkombëtar mbetej i angazhuar për të ndërhyrë në zgjidhjen e krizës politike, por theksoi se hapi i parë dhe konkret duhej hedhur nga politika shqiptare. “Edhe në këtë çështje, hapat duhet të merren nga të gjithë njëherësh, prandaj edhe sugjerimi i Këshillit të Evropës për t’i dhënë një rol Presidentit ishte një sugjerim shumë i mirë. Kështu, të gjithë mund të ndërmarrin në të njëjtën kohë hapin e parë. Nuk ka nevojë që njëra apo tjetra palë ta ndërmarrë e para këtë hap. Nëse kemi dy grupe apo palë që kanë opinione të ndryshme, duhet arritur një lloj kompromisi, se nuk është një lojë futbolli që mund të ketë një fitues, madje, këtu, për hir të interesave të vendit, nuk duhet të ketë në fakt as dy fitues, por fitues duhen të jenë të gjithë 3.5 milionë njerëzit që jetojnë në këtë vend. Është në të mirë të vendit që të kërkohet një kompromis, në përputhje me sugjerimin e bërë nga Këshilli i Evropës”, vijoi ai.

Ndërhyrja e Topit
Ambasadori Robert Borsh ka theksuar se ndërmjetësimi i Presidentit për të ulur në tavolinën e bisedimeve të dy palët, do të ishte vendim i drejtë. “Këshilli i Evropës sugjeron që kompromisi të jetë një hap që duhet të hedhin të gjithë se bashku. Më pëlqen fakti që iu dha një rol presidentit të republikës. Presidenti duhet të jetë mbi palët dhe ai do të dalë mbi to. Nuk besoj se do të binte dakord me një konsensus që shkel kushtetutën. Duhet të jetë një kompromis që duhet të mbrojë ligjin dhe kushtetutën. Ne ndërkombëtarët jemi këtu pikërisht për të garantuar këtë dhe nuk besoj se do të ketë ndonjë lloj kompromisi që do të thyejë kushtetutën”, tha Bosh. Pra Ambasadori i OSBE-së në Tiranë, tha se as Presidenti dhe as ndërkombëtarët nuk duhet dhe as nuk mund të dalin mbi kushtetutën, duke lënë të kuptohej se edhe nëse do të një dialog politik, çështje e kutive është e panegociueshme. “Sigurisht që jo. Po pse thoni se konsensusi i arritur do të shkelte Kushtetutën? Nuk ka arsye... Një zgjidhje e mundshme konsensuale nuk duhet kurrë të shkelë Kushtetutën. Kjo nuk do të mbështetej as nga Këshilli i Evropës, as nga OSBE-ja, sepse ne jemi këtu për të mbrojtur shtetin e së drejtës. Duhet të jetë një kompromis i pranuar nga të gjithë, por, patjetër, pa shkelur kushtetutën”, tha Bosh.



Stanila: Dialogu politik mund të realizohet edhe pa ndërhyrjen e të huajve
Ambasadori i Rumanisë në Tiranë Viorel Stanila, bëri apel për të gjetur një zgjidhje politike në interes të vendit. Stanila shprehur bindjen se palët politike kanë mundësi ta gjejnë vetë rrugën e dialoguar edhe pa ndërhyrjen e ndërkombëtarëve. “BE dhe vendet anëtare të BE kanë kërkuar vazhdimisht për dialog politik, kanë kërkuar vazhdimisht të dy palët të ulen së bashku rreth një tryeze dhe të bisedojnë. Kjo është mënyra për zgjidhje i një problemi në politike në rakordance me praktika evropiane”, tha Stanila. Duke folur për të drejtat e komunitetit arumun në Shqipëri ambasadori Stanila tha se ai nuk gëzon ende statusin e një minoriteti, ndërkohë që u shpreh pro regjistrimit të popullsisë mbi bazë fetare dhe etnike. “Praktika ndërkombëtare është të kemi një regjistrim aq më i detajuar. Një regjistrim është një proces shumë kompleks dhe është nevoje për të gjithë këto informacione”, vijoi Stanila.


Ndërkombëtarët, gati të ndërhyjnë
Gjithashtu për herë të parë, Bosh shpreh angazhimin e ndërkombëtarëve për të luajtur rolin e ndërmjetësit. Por megjithatë kompromisi sipas ambasadorit të OSBE nuk do të cenojë kushtetutën dhe konkretisht pavarësinë e gjyqësorit e vendimeve të tij. “Ne sigurisht që do të mbetemi gjithmonë të gatshëm të ndihmojmë, nëse na kërkohet, por vazhdoj të besoj se, duke pasur parasysh përparimin e madh që ka bërë vendi në rrugën e integrimit evropian, ju përket juve në radhë të parë, pra politikës shqiptare. OSBE-ja, Këshilli i Evropës apo edhe ndërkombëtarë të tjerë janë të gatshëm të ndihmojnë. Siç e patë edhe në sugjerimin e Këshillit të Evropës, dy reporterët janë gati të vijnë në Shqipëri dhe ata janë sigurisht të mirëpritur, por edhe një herë, mendoj se ju përket juve”, theksoi Borsh.


Rezoluta e KE dënoi bojkotin
Rezoluta e Komisionit Evropian për situatën politike në vendin tonë theksonte se bojkoti parlamentar i Partisë Socialiste dëmton jo vetëm popullin shqiptar por edhe vetë aspiratat e vendit për integrimin evropian. Kjo ishte kryefjala e KE për angazhimet dhe detyrimet demokratike të vendeve anëtare. Në projeketrezolutën e përpiluar nga Z Jaakko Laakso dhe David Uilshire i bëhej thirrje qeverisë që të ngrejë një komision parlamentar që të hetojë zgjedhjet e 28 qershorit të vitit të kaluar dhe opozitës qe të kthehet në parlament dhe të bashkëpunojë plotësisht në këtë komision. Ky bojkot dhe mungesa e dialogut vërente ekipi monitorues i Këshillit të Evropës, dëmton funksionimin e institucioneve demokratike. Mirëpo opozita tha se kjo rezolutë i jep të drejtë asaj si dhe kërkon hapjen e kutive.

Adriatik Doçi



sot