I mbiquajtur prej bandës

Partia Socialiste në opozitë po bën përpjekje titanike për të mbrojtur lidhjet e vjetra dhe ato të reja me krimin e organizuar dhe organizatat terroriste. Përpëlitjet e ditëve të fundit të Edi Ramës dhe Arta Dades me manovra të shumanshme janë shumë domethënëse dhe dëshmojnë se baronët e fundit të krimit të organizuar janë në ditët e fundit në liri. Të gjendur ngushtë përballë një lufte pa kompromis të shtetit ligjor ndaj tyre, kapobandat kanë nisur një reaksion, duke u dërguar mesazhe publike shërbëtorëve të tyre në krye të kupolës rozë ku u kërkojnë mbrojtje politike si detyrim për të ardhurat kriminale që kanë ndarë dhe vazhdojnë të ndajnë së bashku. Nuk është e rastit që është Arta Dade një nga avokatet më të mëdha të politikës radikale të Ramës, pasi kjo lidhet në mënyrë të drejtpërdrejtë me backgraundin e saj kriminal dhe lidhjet e shumta që ka me krimin e organizuar. Pas Ramës, që rezultoi nga Prokuroria italiane si bashkëortaku kryesor i organizatës terroriste "Hakmarrja për Drejtësi", Dade shfaqet si një nga sekseret dhe koordinatoret kryesore të bandave dhe organizatave të krimit. Gjatë periudhës që ajo drejtonte Ministrinë e Jashtme në vitin 2001-2002, ka ndërhyrë në mënyrë të drejtpërdrejtë tek kryetari i Bashkisë së Lushnjës për të favorizuar bandat terroriste në garën për tenderin 1.2 milionë dollarësh për pastrimin e qytetit myzeqar. Ky tender ku plekseshin interesat e dy bandave kriminale, "Hakmarrja për Drejtësi" dhe banda e Lushnjës u kthye në një mollë sherri mes tyre, duke lënë 5 të vrarë dhe 6 të plagosur nga të dy palët. Përplasja nisi në pranverën e vitit 2002 pasi njerëzit e bandës së Bares dhe ata të "Hakmarrjes për Drejtësi", që sipas përgjimeve të bisedave nga Prokuroria italiane përfaqësoheshin prej Roland Shytit, i mbiquajtur prej bandës "Mustaqekuqi", kërkonin që të siguronin këtë fond të majmë me një afat 5-vjeçar. Pas presioneve ndaj krerëve të Bashkisë, të dyja bandat u gjendën, duke matur forcën me njëra-tjetrën. Roland Shyti kishte marrë një kapar prej 500 mijë eurosh për tenderin e pastrimit të qytetit të Lushnjës dhe fillimisht tenderi i pastrimit të qytetit u fitua nga firma që kishte pas saj njerëzit e "Hakmarrjes". Mësohet se pas atentateve dhe vrasjeve nga të dyja krahët, me ndërhyrjen e Dades, të dyja bandat u tërhoqën nga tenderi pasi atyre iu premtuan investime të tjera që dukeshin më fitimprurëse. Është e qartë se Dade e kaloi me sukses misionin e saj si koordinatore e dy bandave, të cilat më pas vendosën pasuri marramendëse, Aldo Bare duke përvetësuar Lagunën e Karavastasë, ndërsa "Hakmarrja" duke pastruar paratë e krimit nëpërmjet ndërtimit të pallateve luksoze në qendër të kryeqytetit në bashkëpunim me kryetarin e PS-së, Edi Rama.
Dade ktheu Lushnjën në strehëzën e bandave
Në fundin e vitit 2001 kanë nisur procedurat për të caktuar firmën fituese të tenderit të pastrimit të qytetit të Lushnjës. Tenderi me një vlerë 1.2 milionë dollarë organizohej nga bashkia e qytetit, e cila drejtohej nga një përfaqësues i PS. Në atë tender kanë konkurruar firmat "Kondor-2", "Hidrotem", "Gledis", "Pegaso" dhe "Akoalba". Dy rivalët kryesorë për fitimin e tenderit ishin firmat e mbështetura nga pjesëtarë të bandës së Lushnjës dhe nga Roland Shyti, njëri prej anëtarëve kryesorë të organizatës "Hakmarrja për Drejtësi". Shyti ishte vendosur në qytetin e Lushnjës përpara vitit 2002. Ai kishte hapur një aktivitet privat përballë stadiumit "Roza Haxhiu" të Lushnjës, ku kishte marrë një dyqan me qira. Dyqanin që Shyti e përdorte si studio e kishte marrë në emër të Bernard Linatopit, djalit të Qani Linatopit, ish-sekretar organizativ i Partisë Socialiste të rrethit. Ndërsa vetë Shyti, sipas materialeve të dosjes së dërguar në gjykatë, nuk dilte në skenë. Të gjitha dokumentacionet dhe kërkesat për tender në Bashkinë e Lushnjës, ai ka mundur t'i bëjë nëpërmjet djalit të ish-sekretarit organizativ të Partisë Socialiste për këtë rreth, Qani Linatopi. Bernardi në atë kohë punonte si shofer në degën e tatim-taksave. Shoqërinë e Bernardit me Shytin, e ka pohuar në procesin gjyqësor gjatë dëshmisë së tij, edhe Qani Linatopi, i cili ka punuar dhe si nënprefekt i Qarkut të Fierit.
Viktimat
Duke përdorur lidhjet me kryetarin e Bashkisë së Lushnjës, i cili ishte eksponent i Partisë Socialiste dhe një nga miqtë e ngushtë të Dades, Roland Shyti fillimisht ia kishte dalë mbanë të fitonte tenderin për mbledhjen e taksave të tregut dhe kishte bërë kërkesë në bashkinë e qytetit për të fituar tenderin e pastrimit ku ishte pretendenti kryesor. Firma fituese në tender do të realizonte pastrimin e qytetit të Lushnjës për një periudhë pesëvjeçare. Në momentin që fitues u shpall firma që mbështetej nga Roland Shyti, nisi dhe konflikti mes dy grupimeve rivale. Viktimat e tenderit ishin të vrarët Ilir Boriçi nga banda e Lushnjës, ndërsa nga grupi i "Hakmarrjes për Drejtësi" u vranë Alfred Pirra, Judmir Trifka, si dhe u plagosën Artur Shehu dhe Bernard Linatopi.
Arta Dade, "engjëlli" mbrojtës i Bares
Deputetja e PS-së, Arta Dade, e njohur si një nga njerëzit më të afërt të Edi Ramës, ishte mbrojtësja kryesore e Aldo Bares gjatë gjithë kohës që vendi drejtohej nga Partia Socialiste. E njohur për lidhjet e saj të ngushta me kreun e bandës së Lushnjës, Aldo Bare, sekretarja e Marrëdhënieve me Jashtë e PS-së, ka ndërhyrë personalisht disa herë për të shpëtuar kryekriminelin Bare nga aksionet e policisë. Është i njohur tashmë fakti se në tetor të 1999, ndërsa PS po zhvillonte kongresin e saj dhe policia kishte ndërmarrë një aksion për shkatërrimin e bandës së Lushnjës, ishte Dade që lajmëroi Baren dhe mundësoi daljen e tij nga Tirana pa asnjë problem. Jo vetëm kaq, por njerëzit e Arta Dades në Lushnjë i kanë kërkuar llogari ish-ministrit të Brendshëm socialist, Spartak Poçi, për disa arrestime të bashkëpunëtorëve të Aldo Bares, të njohur si njerëzit që kishin mbështetur gjithë drejtuesit e PS-së, nga kryetari e deri tek anëtarët e Këshillit Drejtues. (rd)