Rama urdhëron bojkotim të “Ishullit” të Blushit në Athinë

Papandreu prezantoi dje në Athinë librin e Ben Blushit “Të jetosh në ishull”, në prani të mediave dhe lexuesve grekë. “Shqipëria është ajo e që lexojmë në librat e Blushit”

Pas eksperiencës me bojkotimin e Parlamentit, duket se Partia Socialiste e ka marrë përsipër përhapjen e kësaj mode edhe në fusha të tjera. Nuk bëhet fjalë për fusha politike, por kësaj here në letërsi, ku anëtarët e PS-së janë urdhëruar të mos pranojnë librin e “deles së zezë” së selisë rozë, Ben Blushi. Libri “Të jetosh në ishull” i Ben Blushit u prezantua dje për publikun grek, gjatë një aktiviteti ku mori pjesë si referues edhe vëllai i Kryeministrit të Greqisë, Niko Papandreu. Por duket se debatet politike në atdhe ndikuan edhe në jetën letrare të Blushit, pasi sipas burimeve të gazetës “standard”, gjatë prezantimit nuk ishte i pranishëm asnjë prej drejtuesve të Partisë Socialiste në Athinë, pas një vendimi të marrë nga Edi Rama, që urdhëroi të gjithë anëtarët e degës së PS-së në kryeqytetin grek të bojkotojnë këtë aktivitet. Gjatë këtij aktiviteti Blushi falënderoi të pranishmit, që kishin mbushur sallën e qendrës kulturore “104” në Athinë, duke parashtruar edhe filozofinë e librit të tij. Ndërkaq, vëllai i Kryeministrit grek, Niko Papandreu, e vlerësoi këtë vepër si një element që sjell më afër bashkësitë etnike dhe fetare në Ballkan. “Shqipëria nuk është ajo që shohim në TV, por ajo që lexojmë në librat e Blushit”, tha Papandreu.

Mediat greke kishin ofruar hapësira të zgjeruara për Blushin dhe për veprën “Të jetosh në ishull”. Gazeta më e madhe greke “Eleftherotipia” botoi një intervistë të zgjeruar të Blushit për veprën, marrëdhëniet mes popujve në Ballkan dhe për integrimin e të gjithë hapësirës sonë në BE, nën titullin “Shoqëria e hapur e vret nacionalizmin”. “Nuk përhap mbivlerësimin e një kombi ndaj një tjetri. Besoj kryesisht në vlerat e bashkëjetesës. Shoqëria e hapur e vret nacionalizmin”, - shprehet Blushi në intervistë, duke shtuar se me integrimin e rajonit në BE, “besoj se do të humbasim gradualisht identitetin tonë ballkanik, që është deri diku otoman. Do të përfitojmë identitetin mesdhetar, që me kalimin e kohës do të përforcohet. Të identifikohesh me detin do të thotë komunikim, ndërsa të identifikohesh me malet, siç është Ballkani, do të thotë të vendosësh kufij. Për këtë arsye në veprën time është shumë i përforcuar deti”.

Ai u shpreh edhe për shtysat e Skënderbeut e Ali Pashës për të sunduar në periudhat e tyre, duke i cilësuar këto si tentativa për të sunduar mbi territore shumë herë më të mëdha, dhe jo mbi karakteristika kombëtare, duke ruajtur gjithsesi karakterin kombëtar të dy fisnikëve shqiptarë. Ndërkohë që në një tjetër intervistë për gazetën “To Vima” ai flet për situatën fetare në Shqipëri, duke e cilësuar si harmoni që bën kombin krenar. “Të krishterët dhe myslimanët jetojnë në harmoni fetare, nuk luftuam njëri-tjetrin dhe as popujt e tjerë në emër të fesë. Në shumë familje prindërit besojnë në fe të ndryshme, por bashkëjetojnë në harmoni dhe rrisin fëmijët e tyre në mënyrë që të respektojnë fenë e të tjerëve. Kjo na karakterizon dhe na bën krenar”, - thotë Blushi. “Të jetosh në ishull” është libri i parë i Ben Blushit dhe ka shitur mbi 30 mijë kopje në Shqipëri. Varianti grek është përkthyer nga gazetari Niko Anagnostu i gazetës “Eleftherotipia”.

Gazeta Standard

Rama urdhëron bojkotim të “Ishullit” të Blushit në Athinë

Rama urdhëron bojkotim të “Ishullit” të Blushit në Athinë

Rama urdhëron bojkotim të “Ishullit” të Blushit në Athinë :: Komentet