E përzgjedhura nga Presidenti Topi u përball me një numër pyetjesh akuzuese nga deputetët e djathtë në lidhje me aktivitetin e saj. Sipas deputetëve të PD-së, Eduard Halimi, Mesila Doda dhe Enkelejd Alibeaj, Jorgaqi ka mbështetje politike në karrierën e saj, e shoqëruar me mungesa e dyshime në profesionalizëm, madje nuk ka paguar as taksat duke punuar në një shoqëri avokatie të paregjistruar në organet tatimore. Sipas deputetit të PD-së, zonja Jorgaqi akuzohet nga një raport i auditit të Kryeministrisë për dhënien e pëlqimit të dy vendimeve të Qeverisë, që sipas tyre, ishin të jashtëliqjshme. Por kandidatja Jorgaqi u mbrojt dukë thënë se ende sot vendimet janë në fuqi dhe se ato janë në përputhje me konventat ndërkombëtare. Ajo përjashtoi mundësinë e një hetimi administrativ ndaj saj. "Bëhet fjalë për dy vendime qeverie për fabrikën e çimentos në Fushë-Krujë. Nuk i jam nënshtruar asnjë hetimi administrativ, për sa kohë kam ndjekur detyra në Ministrinë e Drejtësisë. Në lidhje me raportin që tani po vihemi në dijeni, nuk jemi njoftuar asnjëherë. Në lidhje me ligjshmërinë e tyre, mund t'u them që ka pasur një kërkesë për ligjshmërinë e vendimeve. Jemi thirrur nga zv.ministrat e kohës, sepse kemi dhënë mendime pozitive për këto vendime, por edhe sot këto dy vendime janë ende në fuqi. Për to nuk është kërkuar shfuqizimi i tyre", tha Jorgaqi. Nga ana tjetër, deputetja Doda, e cila është relatorja për kandidaturën e Edlira Jorgaqit, tha se ajo ka punuar si avokate në të zezë dhe nuk ka paguar tatimet. Sipas Dodës, Jorgani ka përfaqësuar subjekte në gjykatë, por nuk ka paguar detyrimet në shtet. Nga ana e saj, Jorgaqi tha se kishte dhënë konsultë juridike, por nuk ka punuar mirëfilli si avokate. Njëkohësisht, Doda tha se Jorgaqi ka qenë eksperte e PS-së kur është diskutuar reforma në drejtësi në vitin 2008. Përballë këtyre akuzave, deputetët e PS-së heshtën por edhe morën në mbrojtje kandidaten. Ata preferuan të mos pyesin Jorgaqin.
Nga ana e tij, deputeti i PD-së, Enkelejd Alibeaj, pyeti Jorgaqin në lidhje me dy ligje, atë antimafia si dhe ligjin për faljen. Sipas tij, kandidatja Jorgaqi është shprehur kundër këtyre ligjeve të qeverisë me argumentimin se preknin të drejtat e njerëzve dhe binin ndesh me legjislacionin në fuqi. Nga ana e saj, Jorgaqi tha se mendimi i saj ka qenë i unifikuar me kolegët e tjerë të Prokurorisë së Përgjithshme, ku sot ajo është drejtoreshë në Drejtorinë e Legjislacionit.

Seanca në komision

Eduard Halimi: Thatë që keni gatuar ligjet shumë mirë për 12 vite në Ministrinë e Drejtësisë. Ne kemi këtu përpara një raport të auditit të Kryeministrisë në vitin 2005. Pra, pyetja ime është që ju jeni larguar vetë nga puna në Ministrinë e Drejtësisë para këtij raporti të këtij auditi, apo pas këtij raporti që ju sheh me shkelje? Raporti bën fjalë për dy vendime qeverie, 85 dhe 521, ku ju në pozicionin e drejtoreshës së Legjislacionit, keni firmosur dy akte ku nuk keni konstatuar papajtueshmërinë me kuadrin ligjor. Ju keni thënë se janë në përputhje me legjislacionin.
Edlira Jorgaqi: Bëhet fjalë për dy vendime qeverie për fabrikën e çimentos në Fushë-Krujë. Nuk i jam nënshtruar asnjë hetimi administrativ, për sa kohë kam ndjekur detyra në Ministrinë e Drejtësisë. Në lidhje me raportin që tani po vihemi në dijeni, nuk jemi njoftuar asnjëherë. Në lidhje me ligjshmërinë e tyre, mund t'u them që ka pasur një kërkesë për ligjshmërinë e vendimeve. Jemi thirrur nga zv.ministrat e kohës, sepse kemi dhënë mendim pozitive për këto vendime, por edhe sot këto dy vendime janë ende në fuqi. Për to nuk është kërkuar shfuqizim.
Mesila Doda: Në vitin 2008 është votuar reforma në drejtësi, ku ju rezultoni në stafin e ekspertëve. Kush nga forcat politike ju ka propozuar për të qenë në stafin e ekspertëve?
Edlira Jorgaqi: Po, kam qenë një prej ekspertëve që ka punuar për ligjin për organizimin dhe funksionimin e pushtetit gjyqësor dhe jam krenare për këtë...
Mesila Doda: Ju lutem hiqni emocionet dhe na thoni se kush forcë politike ju propozoi.
Edlira Jorgaqi: Kam qenë me ftesë të kryetarit të Komisionit të Ligjeve. Se si janë ndarë forcat këtu, nuk di të them. Mund ta dini ju më mirë.
Mesila Doda: Keni punuar si partnere në studion ligjore, por a keni qenë të regjistruar në organet tatimore?
Edlira Jorgaqi: Nuk kam punuar në kushtet mirëfilli të partneritetit. Forma që ne përmendim në atë studio është se në një ambient punojmë disa avokatë.
Mesila Doda: Po tatimet i keni paguar?
Shega Ligori: Ju po i impononi përgjigjet zonjës. Nuk mund t'i thoni që ka shkelur ligjin apo ta fyeni në dinjitetin e saj.
Edlira Jorgaqi: Profili im në avokati ka qenë shumë i limituar. Fillimi është i vështirë dhe unë kam përfaqësuar disa miq në Gjykatën e Tiranës pa pagesë. Në vitin 2006-2008 kam punuar për Shoqatën e Ndërtuesve që do të më ofronin një ambient falas ku do të punonin edhe avokatët e tjerë.
Mesila Doda: Më falni, por e a dini se nuk mund të ushtroni profesionin pa u regjistruar dhe duhet të paguani tatimet?
Enkelejd Alibeaj: Prokuroria ka dhënë një mendim për ligjin antimafia, ku edhe ju keni bërë pjesë në grupin e punës, i cili ka thënë për këtë projektligj që shkel të drejta dhe bie ndesh me legjislacionin. I qëndroni kësaj?
Edlira Jorgaqi: Po i qëndroj asaj që ka thënë grupi i punës i Prokurorisë.

panorama