Skender Tufa: Grushti kundër Rusmalit është grushti i ish të përndjekurve kundër Sali Berishës

Grushti i Lirak Bejkos kundër Rusmalit është grushti i ish të përndjekurve, kundër Sali Berishës dhe qeverisë së tij, që po tallet me vuajtjet tona”. Kështu u shpreh dje, për gazetën “Sot”, kreu i shoqatës së ish të burgosurve politikë të Shqipërisë, Skënder Tufa, i cili vuri në dukje se solidariteti i ish të përndjekurve u reflektua qartë në organizimin e ceremonisë së varrimit, të Zaharisë, me mbështetjen dhe financimin e plotë të ish të persekutuarit politik, Lulzim Brahjes.

Zoti Tufa, çfarë ndodhi pardje, përballë ndërtesës së ish të përndjekurve politikë?
Atë ditë ne organizuam ceremoninë e varrimit të njërit prej vëllezërve tanë, Grigor Zaharisë. Trupi i tij kishte rreth 20 ditë që kishte mbetur në morg, sepse për të, nuk u interesua njeri. Grigori e ka kaluar jetën në burgje dhe internime dhe nuk krijoi familje. Prandaj, ne organizuam një ceremoni me pjesëmarrjen e disa miqve, apo bashkëvuajtësve.
Si u zhvillua ceremonia?
Ceremonia u zhvillua tepër normalisht. Ne vendosëm arkivolin e Grigorit pranë bustit të ish të përndjekurve dhe e mbuluam atë me flamuj e lule. Por në ato momente patëm shqetësimin e policisë, të cilët erdhën grupe-grupe drejt nesh. Na kërkuan që të hiqnim arkivolin dhe të zbraznim vendin. Këtë e bënin në mënyrë që t’i lirohej vendi makinave luksoze të deputetëve. Kjo na acaroi, por ne ruajtëm qetësinë dhe vazhduam punën tonë. Por në atë çast erdhi nga ana e Kuvendit, Ilir Rusmali me një deputet tjetër të PD-së. Ai e shpërfilli kufomën e Zaharisë dhe nuk tregoi asnjë shenjë respekti për të vdekurin. Kjo bëri që Liraku të shkëputej dhe të shkonte në drejtim të Rusmalit duke e goditur. Pastaj erdhën shumë policë dhe arrestuan Lirakun. Ndërsa Gjergj Ndreca u kërkoi policëve që të mos e keqtrajtonin në atë mënyrë. Dhe që të mos e preknin me dorë atë. Kjo solli si rrjedhojë edhe arrestimin e tij.
Po të tjerët si reaguan?
Të gjithë ne shprehëm solidarizimin tonë në mbështetje të lirimit të dy shokëve tanë. Dhe debatuam fort me policët në mënyrë që ata të dy të liroheshin në vend. Por me gjithë ndërhyrjen tonë, makina e policisë iku drejt komisariatit duke marrë me vete edhe dy shokët tanë më të mirë.
Çfarë ndodhi më tej?
Pastaj ne bëmë ceremoninë e varrimit dhe zoti Lulzim Brahja shtroi një drekë tradicionale sipas zakonit, për kujtimin e tij. Gjithçka kaloi normalisht por mendja na mbeti tek Liraku dhe Gjergji.
Përse ju ish të përndjekurit zgjodhët deputetin Rusmali, për ta goditur dhe jo ndonjërin prej deputetëve të tjerë?
Sepse ai është një nga shkaktarët kryesorë të shkatërrimit të ligjit të ish të përndjekurve politikë. Ai është katalizatori i së keqes dhe promotori i talljeve që po bën qeveria me hallet tona dhe sidomos me dëmshpërblimet. Por këtu ka edhe një histori tjetër.
Çfarë historie?
Gjergj Ndreca na tregoi disa ditë më parë, se kur kishte shkuar të takonte Rusmalin, për dëmshpërblimet tona, ky i ish përgjigjur me një agresivitet dhe fodullëk të paparë.
Çfarë i kishte thënë Rusmali, Ndrecës?
Rusmali i kishte thënë pak a shumë, se nuk ka dëmshpërblime për të përndjekurit. Prandaj, duhet ta linin rehat që të punonte me punët e tij, shtetërore. Por unë ju pyes juve: “Çfarë pune tjetër ka vallë, Rusmali, përveç zgjidhjes së halleve tona? Përse ai njeri, në vend që të na bëjë mirë, po na bën keq e më keq, ditë pas dite? Ku e ka ai inatin ndaj nesh? Apo ngaqë ai është një familje tipike komuniste dhe besnike e PPSH-së, ndërsa ne jemi shtresa e antikomunistëve të betuar. Dhe pyetja e fundit që i bëj unë Rusmalit, është kjo: “Me ç’të drejtë, ti zoti deputet, përdhos zakonet e shqiptarit duke fyer me indiferencë praninë e një arkivoli? Por këtu ka edhe diçka tjetër.
Çfarë ka?
Në thelb grushti kundër Rusmalit është një grusht i ish të përndjekurve politikë kundër Berishës. Kundër qeverisë së tij të korruptuar e mafioze që po tallet me ish të përndjekurit. Kjo qeveri na ka lënë pa bukë, pa punë, pa të ardhura, pa ndihma sociale dhe pa shpresë për fëmijët tanë. A kemi vallë edhe ne të drejtë të jetojmë si gjithë të tjerët, apo mos ndofta në këtë vend ish komunistët dhe komunistët do ndërrojnë karriget? Ku Çajup Rusmali ia kalon privilegjet Ilir Rusmalit, e kështu me rradhë. Për këtë arsye unë kërkoj rregullimin e ligjit për ish të përndjekurit sipas variantit tonë, nëpërmjet pagesës së ditëve të burgut. Shteti duhet të na prgjigjet për vuajtjet që na ka shkaktuar, padrejtësisht.
Si ta kuptojmë shprehjen tuaj se, “grushti kundër Rusmalit është grusht kundër Berishës”?
Në thelb, ne ish të përndjekurit jemi paqësorë dhe aspirojmë mirëkuptimin dhe paqen. Por ata që tallen me ne, duhet ta kuptojnë mirë se kjo sjellje nuk është e drejtë. Dhe gjithë këtë histeri kundër ish të përndjekurve e ka përhapur Sali Beriisha. Prandaj në vijim të pyetjes unë do t’ju tregoj një histori nga burgu. Me njeriun më të urtë dhe më paqësor, Dom Simon Jubanin. Një ditë ai thirri gardianin afër qelisë dhe pastaj e goditi me grusht, duke i thënë: “Këtë grusht e kam ruajtur kundër Enver Hoxhës, por meqë atë nuk e gjej dot, po ta jap ty, për t’ua publikuar të gjithëve”. Kështu është edhe puna e Berishës, me Rusmalin.
Çfarë po ndodh aktualisht, me Bejkon dhe Ndrecën?
Ata janë në komisariat dhe sot është gjyqi. Pardje, së bashku me zotin Lulzim Brahja shkuam pasdite për t’i çuar ushqime dhe mjetet e nevojshme dy shokëve tanë. Gjithçka në aspektin e shpenzimeve gjatë gjithë kësaj kohe u mbulua nga zoti Lulzim Brahja. Pa kontributin e tij, gjithçka do të ishte e vështirë dhe e pamundur. Duke nisur nga shpenzimet e varrimit, e deri në ndihmat për familjet.
Çfarë ndodhi pardje në darkë kur shkuat në komisariat?
Atje më morën edhe mua dhe më mbajtën deri në orën dhjetë të natës. Më morën në pyetje duke më thënë se ky episod ishte shumë i rëndë. Dhe unë i thashë: “Po hallet tona, që jemi pa bukë dhe pa punë a nuk janë të rënda.
Ç’mendoni për vendimin e sotëm ndaj dy ish të përndjekurve?
Unë mendoj se ata do të lirohen se janë të pafajshëm. Nga ana e tij, Rusmali nuk ka bërë denoncim. Dhe atyre u takon direkt, pafajësia. Mjaft kanë bërë burg në sistemin e Enver Hoxhës, si antikomunistë që aspironin për demokraci. Sot ata do të shpallen të pafajshëm me njëqind për qind.
Po nëse ata mbeten në burg?
Atëhere shteti i korruptuar shqiptar do të ketë shumë probleme me ish të përndjekurit. Ne do të organizojmë protesta çdo ditë dhe do të kalojmë deri në vetëflijim me grevë urie. Derisa të lirohen dy vëllezërit tanë nga komisariati e të shkojnë në shtëpitë e tyre. Dhe derisa ish të përndjekurit e Shqipërisë të marrin atë që u takon. Ilir Bushi

Sot

Skender Tufa: Grushti kundër Rusmalit është grushti i ish të përndjekurve kundër Sali Berishës

Skender Tufa: Grushti kundër Rusmalit është grushti i ish të përndjekurve kundër Sali Berishës

Skender Tufa: Grushti kundër Rusmalit është grushti i ish të përndjekurve kundër Sali Berishës :: Komentet