Nga Armand Maho

Pas më shumë se 11 vjetësh që nga trazirat e vitit 1997, Berisha ka kërkuar dje falje për sistemin piramidal që u ndërtua përgjatë viteve 1993-1997 në Shqipëri. Këto deklarata kryeministri i bëri gjatë një tryeze të zhvilluar me përfaqësues financiarë vendas dhe të huaj me temë “Tryeza e Tretë e Rrumbullakët me qeverinë e Shqipërisë, për investime të frytshme”, e organizuar në Tiranë nga grupi prestigjioz “The Economist”. Kryeministri u shpreh se gjatë asaj kohe kishte një vakuum total mjetesh për t’i bllokuar këto skema piramidale, të cilat sollën dhe një nga ngjarjet më të rënda të këtyre viteve tranzicion. “Ne jemi një vend që vuajti nga një sistem mashtrues të piramidave. Në atë kohë unë isha president i vendit dhe ne kishim një vakuum total mjetesh për t’i bllokuar ato. Unë pashë me kujdes, nëse ndonjë agjenci publike ishte e përfshirë në këto skema, ashtu siç ka ndodhur në disa vende të botës, por ky nuk ishte rasti i Shqipërisë. Vendi përjetoi një eksperiencë shumë të hidhur. Ishte jo-njerëzore dhe për këtë rast kërkoj falje. Por, në rastin e krizës financiare aktuale unë kam besim se komuniteti ndërkombëtar do të vazhdojë drejt zgjidhjes”, - u shpreh Berisha.


Falja


Falja publike e kryeministrit vjen në një kohë kur ai ka marrë sërish pushtetin pas tetë viteve në opozitë, që nga viti 1997. Në lidhje me këtë çështje pati akuza nga të dy krahët e politikës, të cilat fajësuan njëra-tjetrën për këtë çështje, por sërish rrethi u ngushtua në përgjegjësitë personale të personave që drejtonin këto firma. Tashmë, duket se ky kapitull është mbyllur, gjë që u bë e qartë dhe nga deklarata e kryeministrit. Sipas tij, e gjitha kjo erdhi nga lakmia njerëzore. “Ne arrijmë në një konkluzion shumë të mirë, i cili është përfundimtar dhe ka të bëjë me vendosmërinë për të mbrojtur tregun nga lakmia njerëzore”, - u shpreh Berisha. Në fjalën e tij kryeministri i cilësoi si suksese dhe privatizimin e ARMO-s, Albtelekomin, apo rrjetin e shpërndarjes së KESH-it. “Unë mendoj se kontributi kryesor i qeverisë është të luftojë korrupsionin. Kjo është shumë më e rëndësishme sesa çështje të tjera. Ne do të bëjmë çdo gjë në këtë aspekt. Çështja kryesore është lufta kundër korrupsionit. Ne kemi hyrë në një proces privatizimi, i cili ka qenë shumë i suksesshëm. Ne kemi privatizuar Albtelekomin, OSSH dhe ARMO-n”, - tha Berisha.