Dje në tregun valutor dollari blihet me 92,1 lekë. Tregu ynë reflektoi menjëherë bursat ndërkombëtare. Dollari është këmbyer në tregjet ndërkombëtare në nivelin më të ulët të 13 viteve të fundit. Kjo pas lajmeve që qarkullojnë për një falimentim të industrisë së makinave, dhe pikërisht të General Motors dhe Chrysler LLC.
Euro ndaj dollarit fitoi pikë si asnjëherë që prej hedhjes së saj në qarkullim në vitin 1999. Kjo pasi Banka Qendrore Amerikane pritet të ulë normën bazë të interesit duke e afruar atë pothuaj afër zeros, ndërkohë që Banka Qendrore Europiane mendohet të mos bëjë ulje të mëtejshme të normës bazë për Euron. Euro është rritur me 5.1% deri në 1.3369 nga 1.2718 që kuotohej në fillim të javës. Tregu vendas ka ndjekur të njëjtën ecuri si tregjet ndërkombëtare.
Kursi i dollarit ka pasur lëkundje në këmbimet valutore kundrejt lekut gjatë kësaj jave, ndërsa sot (13 dhjetor) ka vazhduar të humbasë përsëri terren. Gjatë javës së fundit dollari ka humbur me mbi 4 lekë në kursin e këmbimit. Në agjencitë e këmbimit valutor në fundin e javës së kaluar (6 dhjetor) një dollar u ble me 96,5 lekë dhe u shit me 96,9 lekë, dje (12 dhjetor) një dollar u ble me 92,8 lekë dhe u shit me 93,3 lekë, ndërsa sot (13 dhjetor) një dollar u ble me 92,1 lekë dhe u shit me 92,6 lekë. Kështu gjatë kësaj jave dollari ka pësuar një rënie të madhe duke u kuotuar ditën e sotme për 92.39 lekë nga 97.19 që këmbehej në fillim të këtij muaji. Ndërkohë që euro është forcuar gjatë gjithë kësaj jave duke arritur nivelin 123.16 nga 122.5 që këmbehej në fillim të muajit.
Euro pritet të mbajë nivele konstante ndaj lekut edhe për shkak të festave të fundvitit. Kthimi i emigrantëve për festat bën që të rritet kërkesa për lekë në tregun vendas dhe si rrjedhim ai të forcohet. Megjithatë trazirat më të fundit në Greqi, mund të ndikojnë në uljen e kthimit të emigrantëve pranë familjeve të tyre për festa.
Euro e fortë bën që të shtrenjtohen edhe produktet që vijnë në Shqipëri nga vendet e Eurozonës. Kjo pasi mallrat do të blihen me një euro më të fortë për tu shitur këtu me lekë.

Dollari amerikan
6 dhjetor: 96,5 96,9
7 dhjetor: 96,4 96,8
8 dhjetor: 96,3 96,7
9 dhjetor: 95,6 96
10 dhjetor: 94,7 95,1
11 dhjetor: 93,7 94,2
12 dhjetor: 92,8 93,3
13 dhjetor: 92,1 92,6