Qeveria miraton kushtet dhe afatet e kërkesave për tregtimin e mineraleve të çmuara dhe gjysmë të çmuara

Qeveria ka miratuar dje kushtet, dokumentet vërtetuese dhe afatet e vlefshmërisë dhe të procedurave të shqyrtimit të kërkesave për autorizimin e tregtimit të mineraleve të çmuara dhe gjysmë të çmuara. Në mbështetje të nenit 100 të Kushtetutës dhe të neneve 32, pika 2, e 56,

pika 1, të ligjit nr.10 304, datë 15.7.2010, “Për sektorin minerar në Republikën e Shqipërisë”, me propozimin e ministrit të Ekonomisë, Tregtisë dhe Energjetikës, Këshilli i Ministrave vendosi se për kryerjen e veprimtarive të tregtimit të mineraleve të çmuara dhe gjysmë të çmuara personat juridikë, vendas dhe të huaj, të regjistruar si të tillë në Qendrën Kombëtare të Regjistrimit, duhet të pajisen me autorizimin përkatës. Dhënia e autorizimit të tregtimit të mineraleve të çmuara dhe gjysmë të çmuara personave juridikë bëhet nga ministri përgjegjës për veprimtaritë minerare në përputhje me kërkesat e nenit 32, të ligjit nr.10 304, datë 15.7.2010, “Për sektorin minerar në Republikën e Shqipërisë”. Autorizimi për tregtimin e mineraleve të çmuara dhe gjysmë të çmuara jepet me afat vlefshmërie deri në 10 vjet, nga data e hyrjes në fuqi, me të drejtë deri në 2 vjet, me kusht që kjo shtyrje afati të kërkohet nga zotëruesi i autorizimit të paktën 60 ditë kalendarike para përfundimit të afatit të vlefshmërisë. Dokumentacioni i plotë i kërkesës për autorizim për tregtimin e mineraleve të çmuara dhe gjysmë të çmuara paraqitet në Agjencinë Kombëtare të Burimeve Natyrore (AKBN). Ndërsa data e aplikimit shpallet në web site-in e këtij institucioni.



Dokumentacioni
Dokumentacioni i plotë i kërkesës për autorizim për tregtimin e mineraleve të çmuara dhe gjysmë të çmuara, i cili shqyrtohet dhe vlerësohet nga AKBN-ja, duhet të përmbajë: ekstraktin e vendimit të QKR-së për regjistrimin, si person juridik, ku në objektin e veprimtarisë të këtë të miratuar edhe zhvillimin e aktivitetit të tregtimit të mineraleve të çmuara dhe gjysmë të çmuara sipas kërkesës; një përshkrim të kapaciteteve profesionale dhe menaxheriale të kërkuesit që i vlejnë atij për realizimin e veprimtarisë së tregtimit të mineraleve të çmuara dhe gjysmë të çmuara, si dhe një përshkrim të përvojës së tij të mëparshme në këtë fushë, nëse ka; të dhëna për burimet financiare të nevojshme për realizimin e kësaj veprimtarie; specifikim të mineralit/mineraleve për të cilat kërkohet autorizimi; një informacion për tregjet e mundshme të shitjes së këtyre mineraleve dhe për kontratat paraprake të lidhura për këtë qëllim, nëse ka; vërtetimin nga organet përkatëse që nuk është fajtor për asnjë vepër penale, cilësuar si e tillë pas një procesi të plotë gjyqësor, që lidhet me veprimtarinë e tregtimit të mineraleve të çmuara dhe gjysmë të çmuara. Për shoqëritë e huaja, një vërtetim të tillë nga vendi i origjinës. AKBN-ja, pasi e shqyrton dhe vlerëson dokumentacionin e plotë për autorizimin për tregtimin e mineraleve të çmuara dhe gjysmë të çmuara, por jo me vonë se 30 ditë kalendarike pas marrjes së aplikimit, e dërgon atë në Ministrinë e Ekonomisë, Tregtisë dhe Energjetikës, së bashku me mendimin me shkrim për dhënien ose jo të autorizimit, të nënshkruar nga titullari i saj. Ministri, brenda 60 ditëve kalendarike nga data e aplikimit në AKBN, nxjerr aktin e dhënies ose të mosdhënies së autorizimit për tregtimin e mineraleve të çmuara dhe gjysmë të çmuara. Në këtë rast, nuk zbatohet parimi i miratimit në heshtje. Forma e autorizimit përcaktohet në rregulloren që miratohet nga ministri. Kërkuesi njoftohet për miratimin ose jo të kërkesës me shkrim nga METE dhe nëpërmjet publikimit në web site-n e saj.

Kritere të reja për licencimin e studimeve në miniera
Këshilli i Ministrave përcakton kushte të reja për certifikimin dhe licencimin e veprimtarisë studimore - projektuese në veprimtaritë minerare. Në vendimin e ri të qeverisë thuhet se veprimtaria studimore - projektuese në fushën e veprimtarisë minerare do të kryhet vetëm nga personat fizikë dhe/ose juridikë, vendas dhe të huaj, të licencuar si të tillë. Licenca për veprimtari studimore e projektuese në veprimtarinë minerare do të jepet pas certifikimit për veprimtaritë e kërkim -zbulimit, shfrytëzimit, përpunimit të mineraleve dhe ndërtim punimesh nëntokësore në infrastrukturë, për qëllime civile. Veprimtaria zbatuese në fushën e veprimtarisë minerare do të kryhet nga individët e certifikuar, vendas dhe të huaj. Një certifikatë për veprimtari zbatuese në veprimtarinë minerare përfshin mbikëqyrjen, monitorimin, konsulencën, supervizimin, kolaudimin dhe drejtimin teknik në veprimtaritë e kërkim - zbulimit - shfrytëzimit, përpunimit të mineraleve dhe ndërtim punimesh nëntokësore në infrastrukturë, për qëllime civile. Për kryerjen e veprimtarive studimore - projektuese dhe zbatuese në fushën e veprimtarisë minerare licencohen personat, fizikë dhe/ose juridikë, vendas dhe të huaj, të regjistruar si të tillë në Qendrën Kombëtare të Regjistrimit, që kanë aftësi teknike dhe përvojën e nevojshme për kryerjen e këtyre veprimtarive.

Ndryshon udhëzimi për kolaudimin e punimeve të ndërtimit
Ndryshon udhëzimi i qeverisë për mbikëqyrjen dhe kolaudimin e punimeve të ndërtimit. Në të gjithë udhëzimin, shprehja “....dega e policisë së ndërtimit.....” zëvendësohet me shprehjen “....Inspektorati Ndërtimor e Urbanistik Vendor/Kombëtar....”. Ndërsa mbikëqyrja e punimeve kryhet nga persona, fizikë ose juridikë, të pajisur me certifikatë profesionale përkatëse. Mbikëqyrësi i punimeve, për objekte që ndërtohen me financim publik, emërohet nga investitori, pas përzgjedhjes me prokurim, në përputhje me ligjin nr.9643, datë 20.11.2006, “Për prokurimin publik”, të ndryshuar. Në rastet kur investitori është edhe sipërmarrës, mbikëqyrësi i punimeve nuk duhet të jetë në asnjë rast punonjës i tij”. Preventivat e objekteve të reja, pa përjashtim, që paraqiten për marrjen e lejes së ndërtimit, me financim publik ose privat, të projektuara nga subjekte publike apo private, që ushtrojnë veprimtarinë në fushën e projektimit dhe të preventivimit të objekteve të ndërtimit, të llogariten duke përdorur çmimet e manualit teknik të çmimeve të ndërtimit, miratuara çdo vit nga Këshilli i Ministrave. Në rastet kur në manualin teknik të çmimeve të ndërtimit mungojnë çmimet e zërave të punimeve të vendosura në projekt, projektuesi harton analizën teknike përkatëse të çmimeve dhe vepron në përputhje me procedurën e përcaktuar në pikën 8, të vendimit nr.514, datë 15.8.2007, të Këshillit të Ministrave, “Për informatizimin e llogaritjes së kostos dhe hartimin e manualeve teknike të çmimeve të punimeve të ndërtimit”. Subjekti projektues privat apo shtetëror është përgjegjës për saktësinë e volumeve të ndërtimit, të cilat jepen në preventiv.



SOT