Disa parti të vogla të parlamentit shqiptar abuzojnë rëndë me fondet e tyre, kështu është shprehur republikani Sabri Godo gjatë një prononcimi për gazetën “SOT”. Sipas Godos duhet të merren masa serioze për eliminimin e atyre partive të vogla, të cilat përfitojnë nga fondet që marrin vetëm për interesat e tyre dhe nuk i shërbejnë elektoratit që i zgjedh. Sipas tij, duhet të vendosen kriteret dhe rregullat, në mënyrë që jo çdo grupim politik të mund të marrë licencë për krijimin e një partie. Më tej, Godo thekson se çdo parti ka të drejtën e saj për tu provuar përpara elektoratit por jo të abuzojë me të.“Nuk e mbështes eliminimin e partive të vogla përmes rritjes së pragut elektoral, por mbështes eliminimin e disa prej atyre partive që abuzojnë me fondet që u jepen. Duhet të merren masa të rrepta dhe të mos jepen licenca për ç’do grupim politik që tenton të krijojë parti të re” theksoi Godo në prononcimin e tij. Ndërkohë që në të njëjtën edhe kreu i ekzekutivit Sali Berisha gjatë një mbledhjeje qeverie ka propozuar që të hartohet një ligj mbi transparencën e financimeve të partive politike. Madje Berisha ka bërë të ditur se ky ligj do të hartohet brenda këtij muaji, çka nënkupton sesionin e ri parlamentar. Ndërkaq, lidhur me pragun elektoral republikani Sabri Godo ka propozuar konkurrimin ndërmjet partive politike dhe vendosjen e pragut elektoral në nivelin prej 3%. Sipas tij ky prag duhet në këtë nivel për arsye që në parlament të kemi një përfaqësim real duhet që të kemi 7-8 parti parlamentare. Po kështu ai ka propozuar inspektimin dhe vlerësimin e çdo gjykate dhe po kështu edhe rishikimi i veprimtarisë së institucioneve të lidhura me reformën në drejtësi. Duhet të kemi një reformim që nga Kodi penal dhe deri tek institucioni i burgjeve, është shprehur presidenti i republikanëve. Sipas tij për këtë proces duhet seriozitet në mënyrë që të arrihet konsolidimi i shtetit të së drejtës.
Debati mbi pragun
Reforma zgjedhore ka hasur vështirësitë e saj të para. Edhe pse ende nuk është konsoliduar fakti se cili do të jetë sistemi elektoral që do të përzgjidhet një tjetër debat, ai i rritjes së pragut elektoral. Ndaj kësaj çështjeje janë rebeluar së tepërmi partitë e vogla të cilat në kuadër të rritjes së pragut elektoral rrezikojnë largimin e tyre nga parlamenti. E ndërsa partitë e vogla kontestojnë rritjen e pragut elektoral, partitë e mëdha shprehen se rritja e pragut ndihmon në zhduken e partive fantazma. Në këtë kontekst duket se zhvillimi i reformës zgjedhore do të hasë vështirësi në realizimin e saj. Partitë e mëdha përveçse shprehen se pragu i ulët nuk e stimulon dhe nuk e ndihmon reformën zgjedhore të zgjidhë problemin e eliminimit të dushkut. Partitë e mëdha duke e vënë përgjegjësinë e fenomenit të dushkut pikërisht mbi partitë e vogla që sipas tyre sa vijnë dhe shtohet kërkojnë konsolidimin e tyre në sa më pak parti. Por ndryshe nga këto qëndrime partitë e vogla njëkohësisht edhe aleate të dy partive më të mëdha në vend Partisë Demokratike dhe Partisë Socialiste shprehen se ky është një debat ku partitë e vogla kërkojnë të vënë në lojë aleatët e tyre.
Spektri i majtë
Duke kapur spektrin e majtë vlen të theksohet se përkatësisht Partia Socialiste dhe Lëvizja Socialiste për Integrim janë shprehur pro rritjes së pragut elektoral. Nga selia rozë pro rritjes së pragut është shprehur vet kryetari i kësaj partie Edi Rama. Kryesocialisti kërkon të rrisë pragun elektoral për të nxjerrë jashtë loje partitë e vogla parlamentare të së majtës si: PSD, PDS dhe PAD dhe të mbajë pranë vetëm LSI. Por, reagimi i partive parlamentare që preken nga kërkesa e Ramës kanë reaguar menjëherë, duke e cilësuar atë një puç politik nga ana e tij. Reagimi më i ashpër ka ardhur nga kreu i Aleancës Demokratike, Neritan Ceka, i cili ka bërë të ditur se kërkesa e PS për të rritur pragun elektoral është një atentat kundër demokracisë dhe përfaqësimit të komuniteteve të ndryshme në Parlament. Sipas Cekës, Rama po bën reforma të tjera për të qëlluar politikisht prapa krahëve partitë e vogla parlamentare.