Topalli sfidon Berishën, merr rolin e lideres në PD

Saturday, 12 January 2008

Topalli sfidon Berishën, merr rolin e lideres në PD Topalli_jozefina_5

Nënkryetarja e parlamentit shqiptar Jozefina Topalli është duke u pozicionuar gjithnjë e më shumë në rolin e një lidershipi. Përveç faktit që është nënkryetare e Partisë demokratike Topalli duket se synon për më lart. Perëndimi i kryetarit Berisha duket se është një stimul për forcimin e pozitave të saj si në legjislativ ashtu edhe në strukturat e partisë në qendër. Topalli duke përfituar edhe nga pushimet e parlamentit po shfrytëzon rastin për t’i dhënë jetë strukturave të partisë në bazë.Ditët e fundit ajo është parë në takimet me militantët dhe duke pasur parasysh pakënaqësitë e krijuara nga qeveria aktuale Topalli ka ndërmarrë fushatën e “arnimit” të gabimeve të Berishës. Topalli është dëgjuar të thotë se “militantët janë një aset i pazëvendësueshëm brenda PD-së dhe të domosdoshëm për ekzistencën e saj”, po kështu Topalli duket se përveç ngritjes së moralit të mbështetësve është duke forcuar pozitat e saj politike. Zgjedhjet e përgjithshme të vitit 2009 mund ta sjellin Topallin në një dimension të ri politik dhe duket se kjo e fundit nuk po humbet kohë për ta arritur këtë.
Diplomate
Ambicia e Jozefina Topallit si “gruaja e hekurt” e qeverisjes së djathtë nuk ka kaluar pa u vënë re edhe në kuadrin diplomatik. Jo në pak raste Topalli me vizitat apo takimet e saj diplomatike ka sfumuar rolin që kolegia e saj Majlinda Bregu luan në kabinetin Berisha. Dy figurat më të rëndësishme femërore brenda PD-së nuk kanë bashkëjetuar pa xhelozi brenda partisë dhe aq më tepër që tashmë janë parti në pushtet. Topalli e konfiguruar që herët si personalitet karakterizues i PD-së, me kontribute që më shumë ranë në sy gjatë kohës që PD ishte në opozitë , bijë e një familjeje të persekutuar është pikërisht figura personifikuese e të gjithë demokratëve të hershëm. Nga ana tjetër Bregu e cila vetëm pak muaj pas anëtarësimit në Partinë Demokratike si pjesë e Komitetit të Orientimit të Politikave e pa veten me portofol ministror nuk mund të shihet pa xhelozi nga nënkryetarja e partisë Topalli apo kryesia tradicionale e Partisë Demokratike. Megjithatë nuk mund të thuhet se Topalli nuk e ka marrë hakun. Kryeparlamentarja është parë të lobojë për proceset e integrimit me Brukselin, me vendet fqinje dhe me të gjithë faktorët përcaktues për integrimin.
Aspiratat
Kryetarja e kuvendit të republikës së Shqipërisë Jozefina Topalli synon të ngjisë shkallët e karrierës politike. Ajo si lidere e të ashtuquajturit “klan katolik” gëzon besimin e një pjesë të mirë të deputetëve të grupit parlamentar demokrat si dhe të kryesisë së partisë. Duke pasur përkrah sekretarin e Përgjithshëm Ridvan Bode dhe po kështu edhe ish-ministrin Ilir Rusmali, Topalli pritet që në vitin 2009 të sjellë të papritura brenda kryesisë së Partisë Demokratike. Zgjedhja e Bamir Topit në postin e kreut të shtetit i ka hapur rrugë garës për pasuesin e kreut aktual Berisha. Duket se një ndër opsionet më të mundshme për të zëvendësuar atë është pikërisht nënkryetarja aktuale Jozefina Topalli. Ndërkohë që Presidenti drekoi me mbështetësit e tij në Durrës, paralelisht Jozefina Topalli filloi fushatën në zonën e saj në Shkodër. Po kështu edhe dje ajo është marrë me kurimin shpirtëror të militantëve duke sjellë në vëmendjen e tyre arritjet e qeverisjes Berisha. Baza kishte kohë që nuk shihte anëtarët e kryesisë së PD-së dhe duket se këto takime Topalli po i shfrytëzon për të përgatitur terrenin elektoral si për zgjedhjet e përgjithshme të të 2009 ashtu edhe për ndryshimet e padiskutueshme që do të prekin kryesinë e partisë.

Topalli sfidon Berishën, merr rolin e lideres në PD

Topalli sfidon Berishën, merr rolin e lideres në PD

Topalli sfidon Berishën, merr rolin e lideres në PD :: Komentet