Vendos kryesia e PD: zgjedhje sipas parimit “Një anëtar, një votë”

Nga Armand Maho

Partia Demokratike do të zhvillojë zgjedhjet për seksionet, nëndegët dhe degët në të gjithë vendin, sipas parimit “Një anëtar, një votë”. Kjo është vendosur dje gjatë mbledhjes së kryesisë, të thirrur nga kryetari i partisë, Sali Berisha. Gjatë mbledhjes Berisha ka theksuar se zgjedhjet sipas këtij parimi është hera e parë që zhvillohen në PD, ndërkohë që së shpejti do të mblidhet sërish kryesia e PD, e cila do të ngrejë një grup pune për këtë qëllim, i cili do të vendosë dhe për procedurat dhe kriteret që do të ndiqen si në përzgjedhjen e kandidatëve, ashtu dhe për organizimin e votimeve në të gjithë vendin. Ndërkohë që mësohet të jetë shprehur se kabineti qeveritar nuk do të pësojë ndryshime, ashtu siç ka filluar të kërkohet nga eksponentë të ndryshëm të së djathtës.

Qytetet

Të njëjtat burime shprehen se organizimi i zgjedhjeve fillimish do të fillojë me degët e qyteteve të mëdha, si Tirana, Durrësi, Elbasani, Shkodra, Korça etj. Të njëjtat burime shprehen se në këto zgjedhje do të votohet njëherësh për kryetarët e seksioneve, nëndegëve dhe degëve. Të njëjtat burime shprehen se këto zgjedhje kanë si synim riorganizimin e partisë, me qëllim hyrjen në zgjedhje në vitin 2009. Nga ana tjetër, këto zgjedhje përjashtojnë nga zgjedhja direkte kryesinë e partisë në qendër, pra kryetarin dhe kryesinë e PD, si dhe sekretarët përkatës që zgjidhen me votat direkte të Këshillit Kombëtar. Ndryshimet në statut janë bërë tre vjet më parë, për këtë qëllim kështu që në këto zgjedhje del si detyrim që të zbatohet statuti i parties.

“Një anëtar, një votë”

Ndërkohë, siç e theksuam, këto janë zgjedhjet e para që zhvillohen sipas parimit “Një anëtar, një votë”, praktikë kjo e ndjekur më parë nga Partia Socialiste, por që siç rezultoi më pas, e dështuar, pasi zgjedhjet degjeneruan në manipulime votash dhe përplasje midis grupeve rivale. Nga ana e saj, Partisë Demokratike duket që zgjedhjet sipas parimit “Një anëtar, një votë” do i shërbejë dhe si një test për zgjedhjet e ardhshme që do të bëhen për kryesinë e madhe. Nga ana tjetër, zgjedhjet në seksione, nëndegë dhe degë shihen dhe si një mundësi për riorganizimin e partisë, e cila pas fitores së zgjedhjeve të 2005 ndihet paksa e çorganizuar. Krerët e saj kanë zënë poste të larta në qeveri dhe pakkush mendon që të kalojë nga zyrat e partisë, ndërkohë që përpara saj tashmë nuk shikon më militantë. Shumë prej atyre që e njohin mirë sesi funksionon PD, shprehen se, në rast se vazhdohet me këtë frymë, do jetë e vështirë dhe gjetja e komisionerëve që do marrin pjesë në zgjedhje në vitin 2009.