Berisha pregatitet për të lënë pasardhësin në PD

Berisha pregatitet për të lënë pasardhësin në PD

Thursday, 17 January 2008

Nga Kastriot Myftaraj - Kryetari i PD, Sali Berisha,
me deklaratën e bërë në mbledhjen e kryesisë së PD, se ai ka ndezur
motorët për ripërtëritjen e PD, në një proces të paprecedent në historinë
e kësaj partie, në fakt shpalli nisjen e procesit të suksesionit, të
trashëgimisë së drejtimit të partisë, nga ai vetë, tek pasuesi i tij, gjë të
cilën Berisha duket se po e bën me kërkesën e kancelarive të huaja.
Por para se Berisha t’ ia dorëzojë partinë pasuesit, ai duhet ta pastrojë atë,
në mënyrë që pasardhësi i tij mos të shkelë në një terren “të minuar”.
Kjo është kërkesa tjetër e ndërkombëtarëve për Berishën. Këtu konsiston
dhe deklarata e Berishës se: “Statuti i kësaj partie, i miratuar rreth tre vjet
më parë, përcakton zgjedhjet në rrethe dhe në qarqe, të bazuara në parimin
‛një anëtar një votë”. (Gazeta “Rilindja Demokratike”, 17 janar 2008, f. 1)
Por Berisha nuk e shpjegoi se përse nuk e ka bërë këtë gjë deri më sot,
dhe se përse kjo praktikë nuk është parashikuar dhe për zgjedhjen e kryetarit
të partisë, dhe nëse do të vazhdojë procesi i çelur, i zgjedhjeve sipas parimit
“një anëtar një votë”, duke zgjedhur kështu edhe kryetarin e partisë.
Berisha këtë e la evazive. Berisha është i vetëdijshëm se ai nuk ka se ç’ ti
japë kësaj partie, dhe se nuk është njeriu që mund të drejtojë ripërtëritjen
e kësaj partie. Berisha e ka drejtuar PD për 17 vjet, nga të cilët për 12 vjet
si kryetar, dhe për pesë vjet kur ishte President, me kryetar-mëkëmbës,
duke qenë Berisha lideri faktik i partisë, që ka shkarkuar me një të lëvizur
të gishtit kryetarin-mëkëmbës kur nuk i bindet, si në rastin e Selamit.
Gjatë kësaj kohe Berisha është konsumuar shumë, madje dhe edhe si
moshë ai sot është sa Ramiz Alia në vitin 1989, pra 64 vjeç. Berisha ka
të drejtë të flasë për ripërtëritjen e PD, po aq sa Ramiz Alia për ripërtëritjen
e PPSH në 1989. Ndërkombëtarët e dinë mirë këtë gjë, por ata kanë frikë
se nëse procesi i suksesionit, që është një operacion i komplikuar që prek
të gjitha nivelet e partisë, do të fillojë pas largimit të Berishës nga posti
i kryetarit të PD, atëherë gjërat do të dalin nga kontrolli në PD, nga lufta e
klaneve. Nuk është një gjë e rastit që mbledhja e kryesisë së PD u bë në
kohën që dy nënkryetarët e PD, Jozefina Topalli dhe Astrit Patozi, i cili
është dhe kryetar i grupit parlamentar, si dhe anëtari i kryesisë, Ministri
i Jashtëm, Lulzim Basha, gjendeshin jashtë vendit. Topalli dhe Basha janë
dy njerëz që përfliten në mjediset e PD, si ata që aspirojnë për të qenë
pasardhës të Berishës në krye të PD. Berisha, duke zgjedhur ta bëjë mbledhjen
në një ditë kur të dy pretendentët për të zënë vendin e tij në krye të partisë,
ditën kur dy pretendentët gjendeshin jashtë vendit, me sa duket ka dashur t’
u japë të kuptojë atyre se nuk duhet të gëzohen shpejt dhe se është në dorën
e tij se cili prej tyre do ta pasojë atë në të ardhmen. Për trashëgiminë e
Berishës ka dy skenarë. Njëri është që para zgjedhjeve të vitit të ardhshëm,
t’ia dorëzojë postin e kryetarit të partisë një tjetri, duke dhënë imazhin e
ndryshimit, ndërsa vetë të mbajë postin e kryeministrit. Skenari tjetër është
që të japë dorëheqjen pas zgjedhjeve, ashtu si Nano, që u largua nga drejtimi
i PS, pasi humbi zgjedhjet. Skenari i dytë nuk pëlqehet shumë nga ndërkombëtarët,
sepse e le PD në një situatë shpërthyese të pakontrollueshme. Deklarata e
Berishës pritet që ta shkallëzojë luftën e klaneve në PD. Klanet tashmë do
të kristalizohen përfundimisht rreth pretendentëve më seriozë për pasardhës
të Berishës, pra rreth Bashës dhe Topallit. Për momentin Berisha ka ende aq
peshë sa të bëjë që balanca të anojë nga njëra apo tjetra anë.

Berisha pregatitet për të lënë pasardhësin në PD

Berisha pregatitet për të lënë pasardhësin në PD

Berisha pregatitet për të lënë pasardhësin në PD :: Komentet