Bashkia grabit firmat e autobuzëve



Ashtu si dy apo tre muajt paraardhës, biletat e pajtimit mujor apo siç njihen gjerësisht abonetë, dolën dhe u mbaruan brenda ditës. Abonetë e të gjitha kategorive për muajin shkurt, nisën shpërndarjen dy ditë më parë, të karakterizuara nga radhë të gjata dhe njerëz që vetëm shtynin, sikur nga abonetë do të mbaronin nga momenti në moment. Por mesa duket paskan patur të drejtë edhe qytetarët që iu shtrënguan radhës që ditën e parë, me qëllim që të mos mbesnin “me gisht në gojë” ditën e nesërme. Ditën e djeshme, vetëm një ditë pas nisjes së shpërndarjes së aboneve, në asnjë nga dispeçeritë e kryeqytetit nuk mund të gjeje një abone të përgjithshme,për të mos folur për atë të studentit, e cila pranohet edhe nga vetë punonjësit e dispeçerive që abone të tilla nuk i kanë parë prej muajsh në sportelet e tyre. Kështu, dje, qytetarët prisnin më kot pranë dispeçerive, me shpresën se punonjësit do të furnizoheshin sërish me abone të përgjithshme, e cila shihet si më e leverdisshme nga një pjesë e mirë e qytetarëve që janë të detyruar të udhëtojnë me autobusët urbanë.
Vjedhja e subvencionimit, shkak për krizën
Kriza e që ka përfshirë prej disa muajsh kryeqytetin përsa i përket shpërndarjes së aboneve, duket se do të vazhdojë të jetë prezentë mes qytetarëve, derisa linjat e transportit urban të përfitojnë subvencionimin që u takon me ligj qeverie, por që u mohohet nga pushteti vendor. Sekretari i Shoqatës Kombëtare të Transportit Qytetas, Kujtim Hyka, pohoi për gazetën “SOT” se problemi kryesor përsa i përket këtij shërbimi, i cili cilësohet edhe si i veçantë, ka të bëjë me shkeljen e ligjit që bëhet haptazi ndaj shoqërive të transportit urban. “Qeveria kalon në bashki, një grant të posaçëm për subvencionimin e transportit urban. Por ky grant nuk është përfituar asnjëherë nga shoqëritë e transportit, edhe pse bëhet fjalë për një “ngërç” të mbartur prej vitesh”,- shprehet Hyka. Ndërkaq, konflikti duket se e ka zanafillën që në licencimin e shoqërive të transportit. Sipas vendimit të Këshillit të Ministrave nr. 45. datë 22.1.2004, “ Për Ndryshimin e Tarifave të Transportit Qytetas të Udhëtarëve”, bashkitë, në varësi të masës dhe të mënyrës së subvencionimit, përcaktojnë numrin dhe mënyrën e shpërndarjes së biletave të pajtimit mujor, ose aboneve. Në kontratën që shoqëritë e linjave lidhin me bashkinë, për ligjërimin e këtij aktiviteti apo shërbimi, në pikën 11 të saj thuhet “Kontraktori merr përsipër të kryejë shërbimi e transportit pa kërkuar subvencionim”. Gjithkush do ta vinte re mjaft qartë se kjo pikë bie në kundërshtim me vendimin e Këshillit të Ministrave i cili përcakton bashkinë për ndarjen e subvencionimit. Këtë “kontradiktë”, Hyka e cilëson si një presion që u bëhet shoqërive të transportit urban, nga ana tjetër edhe një shkatërrim për këtë të fundit.
Kategoritë që subvencionohen
Subvencionimi i shoqërive të transportit urban ka të bëjë me një përqindje që u detyrohet shteti për llogari të kategorive të udhëtarëve që sipas ligjit përfitojnë udhëtim falas, si dhe përqindja që duhet të “vilet” në biletat e pajtimit mujor, ose abonetë. Subvencionimi është një e drejtë që këtyre shoqërive u takon me ligj që prej vitit 2004, por që gjatë gjithë kësaj kohe nuk e kanë përfituar një të tillë, edhe pse ata e kanë kryer këtë shërbim si dha kanë shitur abonetë, pavarësisht numrit të tyre të ulët, krahasuar me kërkesën e lartë të qytetarëve. Përsai përket heshtjes së SHKQT-së lidhur me ngritjen e çmimit të biletës apo mosshitjen e aboneve, Hyka pohoi se kjo “heshtje”, ka të bëjë me mbërritjen e një projektvendimi të realizuar nga Ministria e Transporteve dhe ajo e Financave më 6 dhjetor të vitit 2007, sipas të cilit angazhohen edhe një sërë dikasteresh të tjera për bashkëpunim në subvencionimin e shoqërive të transportit. SHKQT ëhstë në pritje të kalimit në vendim, të këtij projektvendimi, i cili mes të tjerash i delegon edhe një sërë kompetencash të tjera pushtetit vendor.