Kavajë -Kryeministri Sali Berisha ka përuruar sot, fillimin e punimeve për rikonstruksionin e rrugës hyrëse në qytetin e Kavajës. “Rruga hyrëse moderne që po ndërtohet është një pjesë e infrastrukturës që meriton ky qytet"- tha Kryeministri Berisha, duke shtuar se gjatë kësaj periudhe, bashkë me rindërtimin e plotë të infrastrukturës, në Kavajë po ndërtohet një shkollë e re, spitali dhe Pallati i Kulturës.

Kryeministri i ftoi autoritete vendore të përcaktojnë truallin dhe projektet për ndërtimin Pallatit të Sportit dhe tregut e ri të qytetit, ndërkohë që premtoi furnizimin 24 orë me ujë të Kavajës."Ora e shqiptarëve është ora e djathtë, ora e historisë", iu drejtua Kryeministri banorëve të pranishëm, ndërsa kujtoi se “qytetarët e Kavajës u shndërruan në flamurin e lëvizjes sonë demokratike”.

Në 3 prill, vijoi z. Berisha, Shqipëria do të jetë pjesë e NATO-s, aleanca më e fuqishme e të gjitha kohërave, ndërsa së shpejti qeveria do të nisë procesin e kërkesës për anëtarësim në BE. “Ky vit përkon me 20 vjetorin e rënies së murit të Berlinit, 19 vjetorin e krijimit të PD-së dhe 17 vjetorin e fitores së saj në zgjedhjet pluraliste të vitit 1992”, tha Kreu i Qeverisë.

Kryeministri cilësoi si një premtim të mbajtur të qeverisë furnizimin e popullatës me energji elektrike. “Nga fundi i vitit 2007 nuk ka patur kufizime të programuara të energjisë elektrike dhe kjo nuk ka të bëjë më reshjet" u shpreh Kryeministri, i cili shtoi se “vetëm gjatë vitit 2008 janë importuar rreth 3, 8 miliardë Kv/ore energji ose sa dy vite së bashku të qeverive të mëparshme”.

Berisha siguroi se "Shqipëria do të jetë së shpejti vend eksportues i energjisë elektrike, pasi qeveria ka firmosur rreth 50 kontrata koncesionare ndër të cilat më e rëndësishmja është kaskada e Devollit". Për ndërrimin e rrugës në fjalë, qeveria ka akorduar një fond prej 109, 6 milion lekë nga buxheti i shtetit.

start