Bruksel-Flamuri shqiptar është ngritur sot në selinë e NATO-s në Bruksel, duke u radhitur përkrah 27 flamujve të tjerë të aleancës më të madhe në botë. I pranishëm në ceremoninë e rastit, ishte kryeministri Sali Berisha, dhe ministri i Punëve të Jashtme Lulzim Basha. Nën himnin kombëtar shqiptar, flamuri me shqipen dy krenare, është ngritur në drejtim të qiellit Po sot është ngritur edhe flamuri kroat.

Flamuri shqiptar do të qëndrojë i pari në radhë, për shkak të shkronjës së parë të alfabetit. Shqipëria dhe Kroacia u ftuan për t’u bërë pjesë e NATO-s, një vit më parë. Ndërsa më 4 prill, disa ditë më parë, vendi ynë u bë anëtare me të drejta të plota të NATO-s.

Sekretari i Përgjithshëm i NATO-s, Jaap de Hoop Scheffer, theksoi se anëtarësimi i Shqipërisë dhe Kroacisë, ka rëndësi për rajonin por edhe për aleancën. Sipas tij, është nder që dy vendet të zënë vendin e tyre në samitin e NATO-s, duke iu shprehur mirëseardhjen Shqipërisë dhe Kroacisë.

“Ishte kënaqësi për të gjithë ambasadorët NATO-s, dhe mua që t’ju pres sonte këtu. Kjo dëshmon se ideja e lirisë është e parezishtueshme dhe dëshmon se edhe njerëzit përtej Atlantikut mbeten së bashku”- tha Scheffer duke iu drejtuar kryeministrit shqiptar Sali Berisha dhe kryeministrit kroat Ivo Sanader.

“Me integrimin e Shqipërisë e Kroacisë, komuniteti ynë është rritur me 28 anëtarë. Ishte një gur themeli në historinë e aleancës, kur vendet tuaja u ulën në tryezën e NATO-s”- vazhdoi më tej Scheffer.

Ndërsa kryeministri Sali Berisha, ka falënderuar NATO-n, për vendimin e marrë për pranimin e Shqipërisë në këtë aleancë. Berisha theksoi se dëshira për të qenë në NATO ka qene motiv për të gjitha reformat.

“Reforma të thella kushtetuese dhe institucionale, me fryme te plote konsensusi kane ndodhur keto katër vite. Forcat tona te Armatosura po shkojnë drejt një ushtrie profesioniste; kemi një buxhet mbi 2% të PBB-së dhe po aftësohen për të marrë pjesë në të gjitha misionet e NATO-s", u shpreh Berisha.

Start