Plani Francez, produkt i mafies së ndërtimit
Përplasjet mes Partisë Demokratike dhe Bashkisë së Tiranës për planin urbanistik dhe lejet e ndërtimit mesa duket nuk kanë të sosur. Partia Demokratike ka bërë përgjegjës kryetarin e Bashkisë së Tiranës, Edi Rama, se me planin rregullues të qendrës ka vënë njolla klienteliste për ndërtimet shumëkatëshe, duke zhvlerësuar padrejtësisht pasuritë e patundshme të qytetarëve të tjerë. Nga ana e saj, PD nuk ndal akuzat e saj ndaj kreut të Bashkisë së Tiranës, edhe pse deklaron se këto akuza nuk kanë lidhje me çështjen politike në sensin e fushatës, por ajo shprehet e shqetësuar me mënyrën sesi me transparencën e tij, Rama trajton lejet e ndërtimit. Akuzat më të fundit nga ana e PD, drejt kryebashkiakut të Tiranës Edi Rama, mbajnë firmën e zëdhënësit të grupit parlamentar të PD-së, njëkohësisht edhe kandidat për kreun e PD-së, së Tiranës, Aldo Bumçi. Sipas tij, situata është shqetësuese tek lagjet e vjetra të Tiranës, ku veçoi faktin se këto lagje nuk trajtohen si njësi të integruara ndërtimi, por duke dhënë një leje këtu e një atje, duke i lënë pa një zhvillim urban. “Në të gjitha rrugicat që lidhin rrugën e “Kavajës” me rrugën “Myslym Shyri” dhe tek lagjet e vjetra të Tiranës, shtëpitë përdhese janë zhvlerësuar. Kjo është trashëgimia që Rama po i lë këtij shteti.

Ai që nuk është pjesë e ortakërisë së kryetarit të bashkisë, ndëshkohet”, ka shtuar Bumçi. Gjithashtu ai ka theksuar se Edi Rama po përdor dy standarde në dhënien e të drejtës për dhënien e lejeve të ndërtimit, duke përmendur këtu planin francez për qendrën e kryeqytetit, ku veçon faktin se Rama ka dhënë leje ndërtimi në bazë të njohjeve të tij politike dhe ekonomike. “Sipas planit francez, që njihet ndryshe dhe si plani i kullave të kryetarit të bashkisë, një pronë mund të zhvillohet, ndërsa pronës tjetër i thuhet se duhet të qëndrojë zonë e gjelbër. Kështu është në shumë pika të tjera të planit francez. Ky është një shembull, kemi dy pronarë të vjetër të cilët kanë të drejtë të zhvillojnë pronën e tyre. Ka një mënyrë sesi zgjidhet kjo, që është menaxhimi i tokës.

Të dyja pronat njëjtësohen dhe dy pronarët përfitojnë”, deklaroi Bumçi. Ndër të tjera ai akuzon drejtpërdrejtë Ramën për dhënien e lejeve të ndërtimit në bazë të njohjeve të tij politike dhe ekonomike. Zëdhënësi i Grupit Parlamentar të Partisë Demokratike, Aldo Bumçi, deklaroi se metoda e qeverisjes së Ramës për kryeqytetin është primitive, pasi ai e koncepton zhvillimin e pronës në Tiranë, ku disa pronarë përfitojnë në kurriz të të tjerëve për abuzime personale të kryetarit. Sipas tij, Rama vazhdon ta mbajë Tiranën pa plan, sepse e përdor për grupin e tij, duke e copëtuar me studime pjesore siç është plani francez për qendrën, që u hartua vetëm për kullat e kryetarit. “Gjatë hartimit të planit francez, shumë pronarë të vjetër të qytetit kanë ngritur shqetësimin e tyre për mënyrën sesi përcaktoheshin njollat e ndërtimit në këtë zonë, nëse i kishe lidhjet e duhura ekonomike dhe politike me kryetarin zona përcaktohej zonë me pallate shumëkatëshe, në të kundërt prona përcaktohej si lulishte ose zonë me intensitet të ulët ndërtimi”, ka theksuar Bumçi.