Kuqezinjtë e Milanit, klubit më të famshëm ne botë, do të zhvillojnë një miqësore me një seleksion shqiptar

Prania e Milanit në Shqipëri nuk është më ëndërr, por realitet. Madje është shndërruar në traditë, duke parë se vetëm shtatë muaj më parë kampionët e botës kanë zhvilluar një miqësore me Tiranën, pikërisht më 14 tetor, kur humbën me rezultatin 2-1.
Përfaqësues të kompanisë "Taçi Oil", një nga sponsorët kryesorë që bënë të mundur ardhjen e Milanit tetorin e kaluar, kanë qenë dje në Federatën Shqiptarë të Futbollit, ku kanë biseduar për zhvillimin e një ndeshjeje miqësore me kuqezinjtë e Milanit më 12 maj.
Sigurisht, FSHF-ja është treguar e gatshme për të bashkëpunuar, madje për të vënë në dispozicion të gjithë arsenalin e saj për zhvillimin e kësaj miqësoreje pikërisht më 12 maj.
Milani, kundër një seleksioni shqiptar

Ideja e përfaqësuesve të "Taçi Oil" ka qenë që përballë Milanit të vihet një skuadër me emër e futbollit shqiptar, siç ndodhi më 14 tetor me Tiranën.
Përfaqësuesit e FSHF-së kanë gjetur një zgjidhje origjinale: kanë propozuar që me Milanin të luajë një seleksion shqiptar me futbollistët më të mirë të kampionatit.
Kjo ndeshje do të jetë e para edhe për trajnerin e ri të kombëtares shqiptare, i cili nuk është zyrtarizuar ende nga FSHF-ja, pavarësisht emrave të shumtë që kanë qarkulluar në shtypin sportiv.
Në kampionatin shqiptar luajnë shumë futbollistë të rinj të talentuar, që në të ardhmen aspirojnë të bëhen pjesë e kombëtares kuqezi.

Titullarë të kombëtares, nëse janë të lirë

Përveç futbollistëve më të mirë të kampionatit shqiptar, kjo ndeshje do të jetë e hapur edhe për ata lojtarë të kombëtares, që kanë mundësi të marrin leje nga skuadrat e tyre. Kuptohet që kjo do të jetë shumë e vështirë, pasi në këtë periudhë luhet ndeshjet e fundit të kampionateve europiane, ku luajnë pjesa më e madhe e titullarë të kombëtares.
Gjithsesi, Federata Shqiptare e Futbollit do t'u bëjë ftesë të gjithë futbollistëve kuqezinj, me shpresën se disa prej tyre do të mund të marrin leje nga klubet përkatëse.
shekulli
A.Metaliu