Adi Metaliu
Kaka, Ronaldinjo, Pato dhe Bekham, publiku shqiptar ka me çfarë të dëfrehet

Nuk do të ketë asnjë dyshim për sa i përket listët se futbollistëve të Milanit që do të ndeshen me një seleksion të Shqipërisë më 12 maj në stadiumin kombëtar "Qemal Stafa".

Kompania "Taçi Oil", që bën të mundur ardhjen për të dytin vit radhazi të skuadrës më të kuotuar në botë, Milanit, ka shpallur nëpërmjet zyrës së saj të shtypit listën me të gjithë futbollistët që do të zbresim në tapetin e ndërkombëtarit para tifozëve shqiptare. Që nga Ronaldinjo, Kaka e Bekham, deri te talenti më i ri kuqezi, Aleksandre Pato.

Tifozët shqiptarë, që 14 tetorin e kaluar kanë mundur të ndjekin nga afër Maldinin dhe Ronaldinjon, tashmë do të kenë mundësi të shikojnë direkt nga shkallët e stadiumit tre "yje" të tjerë, dy brazilianët Kaka dhe Pato, që nuk mundën të vinin në tetor për shkak të grumbullimit me kombëtaren braziliane, si dhe anglezin Devid Bekham, i cili ka qenë në Shqipëri edhe në vitin 2002, me kombëtaren e vendit të tij.

Por nuk janë vetëm këta "yje" që do të vijnë për të dëfryer publikun shqiptar. Janë konfirmuar gjithashtu lojtarë mjaft të rëndësishëm të Milanit si Gatuzo apo Zambrota, të cilët nuk kanë qenë në Tiranë në miqësoren me Tiranën. Andrea Pirlo nuk do të jetë thjesht në rolin e spektatorit, por do të luajë qoftë për disa minuta.


Seleksioni shqiptar, ende i paplotë

Ndërkohë që Milani e ka bërë zyrtare listën e futbollistëve që do të vijnë në Tiranë, lista e plotë e seleksionit shqiptar mbetet ende enigmë. Gjithsesi, janë konfirmuar emrat e disa lojtarëve të kombëtares, që kanë marrë leje nga klubet e tyre për këtë miqësore luksi me Milanin.

Deri tani kanë konfirmuar ardhjen Kristi Vangjeli, Samir Ujkani, Ervin Bulku, Dorian Bylykbashi, Jahmir Hyka, Klodian Duro, Hamdi Salihi, ndërsa të tjerë futbollistë kuqezi që kanë shprehur dëshirën për të luajtur me skuadrën më të fortë në botë janë në bisedime për të marrë leje nga klubet e tyre. Gjithashtu, në seleksionin shqiptar do të grumbullohen edhe disa nga lojtarët më të mirë të kampionatit shqiptar, por për momentin emrat e tyre mbeten enigmë.
shekulli