Tiranë - Vendet e Bashkimit Evropian i ofrojnë Shqipërisë edhe 83 milionë euro mbështetje ekonomike, në kuadrin e programit të përgatitjes së infrastrukturës dhe të administratës publikë para integrimit ne strukturat evropiane(IPA).

Parapërgatitja e institucioneve bëhet për të administruar sa më me efektshmëri fondet e tjera që do të jepen nga anëtarët e Bashkimit Evropian për zhvillimin e vendit, pas pranimit të Shqipërisë në të.

Të dhënat u dhanë gjatë konferencës së organizuar dje në tiranë nga zyra e Bashkëpunimit për Zhvillim të Ambasadës italiane në Shqipëri, me qëllim përcaktimin e arritjeve dhe detyrave të mëtejshme të këtij programi.

Fondet e përcaktuara për vitin e ardhshme parashikohet të investohen në përmirësimin e sistemit të administrimit të ujërave dhe të rrjetit hekurudhor në vend.


Në prani edhe të ambasadorit italian në Shqipëri, Saba d’Elia, zëvendës kryeministri Genc Pollo vlerësoi, mbështetjen që Italia i ka dhënë vendit tonë në kuadrin integrimit të strukturat e Bashkimit Evropian.

“Italia vazhdon të jetë një partner strategjik i Shqipërisë dhe ka pasur një rol të rëndësishëm në mbështetjen e proceseve integruese të vendit”, tha Pollo.

Ndërsa ambasadori d’Elia, vlerësoi arritjet deritanishme të Shqipërisë të cilat ia japin mundësi për thithjen investimeve, dhe siguroi mbështetjen italiane për proceset e mëtejshme për integrimin e vendit.

“ Për shkak të stabilitetit politik dhe rritjes së vazhdueshme ekonomike, Shqipëria ofron mundësi të mira për investime”, u shpreh ai. Që në fillim të aplikimit të programit IPA në vitin 2007, sektorët e financuar kanë qenë, administrata publike, ndërmarrjet e vogla dhe të mesme, sistemi i rrugëve në fshatra, etj.

Në kuadër të programit të përgatitjes së infrastrukturës dhe të administratës, para përfshirjes së Shqipërisë në BE, gjatë vitit 2008 janë investuar 71 milion euro, ndërsa shuma e parashikuar për këtë vit është 81 milion euro.

Bashkë më 83 milion eurot që parashikohet të investohen për vitin 2010, investimi total i vendeve të Bashkimit Evropian për administratën dhe infrastrukturën e Shqipërisë gjatë këtyre tre viteve kap vlerën e 245 milion eurove.

Start