DURRES- Partizani, skuadra me shume trofe u mund nga Kastrioti në ndeshjen e zhvilluar sot në "Niko Dovana" të Durrësit. Goli i vetëm i takimit u shënua në minutën e 44-t të pjesës së parë nga krutani Prela pas nje devijimi në afërsi të portës së kuqe.
Ndonëse ishte vetëm një ndeshje, ku gjithçka mund të ndodhte, besimi për qëndrimin e Partizanit në superligë, mes më të mirëve të futbollit shqiptar, ishte i madh. Kjo psikozë ndoshta ndikoi negativisht për ekipin e kuq, lojtarët e të cilit e kishin marrë shumë lehtë ndeshjen. Krutanët, me besim në vetvete e vunë në vështirësi Partizanin, derisa në fundin e pjesës së parë, me anë të një goditjeje të lirë, Prela ka mposhtur portierin Shehi. Përpjekjet e shumta të Partizanit në pjesën e dytë nuk sollën ndryshim rezultati, pasi Kastrioti është mbrojur mirë. Edhe zëvendësimet e bëra nga trajneri Shpëtim Duro nuk dhanë efekt, por momenti kulmor i ndeshjes ka qenë, kur anësori Mali ka anuluar për pozicion jashtë loje një gol të shënuar nga Partizani, me anë të Mahos. Ka pasur protesta masive të të kuqve tek anësori, por për qetësimin e situatës ka ndërhyrë edhe trajneri Duro. Lojtarët e Partizanit, disi të nervozuar, nuk kanë pasur forcën e duhur për ta barazuar rezultatin dhe sulmet e tyre janë thyer me lehtësi nga mbrojtja e Kastriotit. Pas vërshëllimës përfundimtare të kryesorit Lorenc Jemini, në kampin krutan ka shpërthyer festa, pasi ekipi i tyre do të luajë në superligë sezonin e ardhshëm, kurse në kampin e Partizanit inati i ka kaluar kufijtë. Futbollistët dhe drejtuesit e tij, përfshirë edhe presidentin Albert Xhani, kanë sulmuar asistentin Mali, i cili anuloi golin. Një pamje e shëmtuar në stadiumin "Niko Dovana" të Durrësit ishte edhe ajo e hedhjes së ndënjësve të tribunës në fushë. Megjithatë, masat do të merren nga organet kompetente në FSHF, ndërsa fakti i hidhur është zbritja e Partizanit në kategorinë e parë. Kastrioti ngjitet në superligë, ndërsa ekipi i fundit që do t'u bashkohet më të mirëve, do të përcaktohet nga ndeshje e sotme, Bylis-Gramozi
Fatjon Rupi
shekulli