Për nëntë orë e gjysmë, fëmija i moshës 1 vjeç e gjysmë, Fitim Q., kishte bredhur nëpër male, duke mos ditur si të kthehet në shtëpinë e tij.
Ngjarja ka ndodhur të dielën në fshatin Greqinë të Gjakovës, në Kosovë.
Zëdhënësi i Policisë së Kosovës, Arbër Beka, tha se denoncimi për humbjen e fëmijës ishte bërë të shtunën rreth orës 16 e 30, kur familjarët e tij kishin lajmëruar se fëmija 17-muajsh nuk është parë që prej orës 10 të mëngjesit.
Me të marrë informacionin, policia ka filluar operacionin e kërkim-shpëtimit të fëmijës, Fitim. Q, nga fshati Gjonaj i Prizrenit, i cili kishte shkuar me familjarët për vizitë në fshatin Greqinë të Gjakovës.
Pasi familjarët e kanë kërkuar fëmijën për 6 orë me radhë, ata i janë drejtuar për ndihmë policisë, më pas kanë nisur kërkimet si nga policia, ashtu dhe nga banorë të fshatit. Gjetja e fëmijës është bërë në orën 19:05 të mbrëmjes, kur një polic dhe një banor i fshatit e kanë gjetur fëmijën 1 kilometër larg vendit ku kishte humbur.
Fëmija 17-muajsh është gjetur në gjendje të mirë shëndetësore, megjithëse kishte disa lëndime të lehta trupore, që besohet t'i ketë pësuar gjatë bredhjes së tij nëpër rrugë e shtigje të ndryshme malore të fshatit Greqinë.
Menjëherë pas gjetjes, ai është dërguar në spital për trajtim mjekësor në repartin e Pediatrisë në Gjakovë.
“Ekspress”