SONILA MESAREJA

Ministria e Drejtësisë ka gati listën me 1 mijë emra të ish-të përndjekurve politikë që kanë kryer një dënim penal të padrejtë dhe ndodhet në tryezën e ministrit Alibeaj për firmë. Këta shtetas do të jenë në listën e tretë të përfituesve, e cila, që nga ky institucion kalon për miratim në Këshillin e Ministrave dhe më pas për të vijuar procedurat në Ministrinë e Financave. Fakti bëhet i ditur nga burime zyrtare pranë institucionit të drejtësisë, i cili merret drejtpërdrejt me kërkesat e përfituesve të dëmshpërblimeve për dënimet e padrejta të regjimit komunist, dhe më pas listën ia dërgon për firmë mbledhjes së qeverisë. Lista dhe një memo që e shoqëron këtë listë i janë dërguar ministrit të Drejtësisë, Enkelejd Alibeaj, për firmë dhe brenda një muaji ajo do të dërgohet në Këshillin e Ministrave për miratim. Të njëjtat burime bëjnë të ditur se kësaj liste deri në dorëzimin për miratim në qeveri mund t’i shtohen emra të tjerë përfituesish. Tashmë, me listën që pritet të kalojë për miratim nga qeveria e re, numri i përfituesve të dëmshpërblimit financiar për dënimet e regjimit komunist arrin deri në 6 mijë persona. Lista e parë e përfituesve u miratua nga Këshilli i Ministrave më 30 dhjetor të vitit të kaluar, dhe në të kishte rreth 1400 përfitues të dëmshpërblimit financiar. Këtij numri iu shtuan edhe ata të listës së dytë, që u miratua disa muaj më parë, nga e cila përfituan rreth 3.200 ish-të përndjekur.



Dorëzimet

Afati për dorëzimin e kërkesave me shkrim për përfitim të dëmshpërblimit financiar për dënim të padrejtë ka përfunduar më 1 korrik të këtij viti. Pas kësaj date, Ministria e Drejtësisë nisi rakordimet me postën. Ligji nr. 10111, datë 2.4.2009, për disa shtesa dhe ndryshime në ligjin nr. 9831, datë 12.11.2007 “Për dëmshpërblimin e ish-të dënuarve politikë të regjimit komunist” ka caktuar se afati i dorëzimit të kërkesave me shkrim për përfitimin e dëmshpërblimit financiar, për dënimin penal të padrejtë nga ana e ish-të dënuarit apo familjarëve të tij ka përfunduar në datën 01.07.2009. Kërkesat e paraqitura pas kësaj date nuk merren në shqyrtim nga Ministria e Drejtësisë. Deri më 1 korrik në protokollin e Ministrisë së Drejtësisë u regjistruan rreth 20 mijë kërkesa të personave që pretendojnë të përfitojnë dëmshpërblimin financiar, për dënimin penal të padrejtë. Siç edhe parashikon ligji nr. 9831, datë 12.11.2007 “Për Dëmshpërblimin e ish-të dënuarve politikë të regjimit komunist”, Ministria e Drejtësisë kryen shqyrtimin e çdo kërkese, të përcjellë nga ish-të dënuarit politikë, nëpërmjet Postës Shqiptare sh.a. dhe Ministrisë së Punëve të Jashtme.



Përfituesit



Ndryshimi i ligjit që bëri Parlamenti ka bërë të mundur që të shtohen përfituesit me disa mijëra. Sipas ndryshimit në ligj, përfitojnë dëmshpërblim pasardhësit, si vëllezër dhe nipërit e të gjithë atyre që janë pushkatuar apo që kanë vuajtur në kampet me gjemba. Ndryshimi i dytë ka të bëjë me shtyrjen e afatit të kërkesave për të kërkuar dëmshpërblim, të cilat u shtynë deri më 1 korrik të këtij viti. Tashmë, dorëzimet e kërkesave prej 2 muajsh kanë përfunduar. Ligji rregullon dy situata problematike të nxjerra në pah nga zbatimi i ligjit bazë, si dëmshpërblimi financiar i të ekzekutuarve pa gjyq dhe dokumentacioni provues për të internuarit në kampe me rrethim me tela me gjemba. Pra, mjaft të eliminuar gjatë regjimit që s’kanë pasur pasardhës direkt, si kleri, pasardhësit e tyre si vëllezër, motra dhe nipër do të përfitojnë këtë dëmshpërblim. Pasi emri del në listën e miratuar nga Këshilli i Ministrave vijohet me procedurat e tjera, atë të hapjes së numrit të llogarisë në bankat e përcaktuara nga Ministria e Financave, dorëzimi i dokumentacionit që provon se përfituesi është trashëgimtari i ligjshëm i përfitimit të dëmshpërblimit dhe në përfundim të dorëzimit të këtij dokumentacioni në institucionin përkatës, në bazë të renditjes, shuma e përfituar derdhet në llogaritë e individëve që përfitojnë.

Standart