ALTIN VORPSI



Një ditë pas takimit Shqipëri-Danimarkë, shtypi i huaj nuk ka shmangur komentet për këtë ndeshje. Edhe pse rezultati i takimit Shqipëri-Danimarkë nuk ishte çudia e vetme e ditës (Armenia mundi Belgjikën 3-1, Moldavia barazoi me Greqinë 1-1 dhe Ishujt Faroe që mundën Lituani 3-1), mediat e huaja i bënë jehonë barazimit të “Qemal Stafës”. Në faqen sportlife.com shkruhej: “Danimarka zhgënjen përballë Shqipërisë. Ekipi i Olsen-it luajti futboll vetëm për 45 minuta”, ndërsa në sitin britanik të BBC-së raportohej se “Shqipëria me barazimin e marrë ndaj Danimarkës e ka kthyer Grupin 1 në grupin e “ferrit” të këtyre eliminatoreve”.



Grupi i “ferrit”

Hapi fals i Danimarkës në Tiranë dhe fitoret respektive të Suedisë e Portugalisë në ndeshjet e të mërkurës kanë shtuar shpresat e këtyre dy të fundit për një kualifikim në fazën finale të Botërorit Afrika e Jugut 2010. Goli i Pepe-s në pjesën e parë i dha Portugalisë fitoren 1-0 ndaj Hungarisë së drejtuar nga Kuman, që tashmë zbret në vendin e 4-t në klasifikimin e Grupit 1. Edhe pse në letër dukej shumë e lehtë, Ibrahimovic me shokët e tij e patën shumë të vështirë të fitonin ndaj Maltës. Rezultati përfundimtar i ndeshjes ishte 1-0 për suedezët, falë autogolit të Azopardin në minutat e fundit të ndeshjes. Pas këtyre rezultateve, situata në grup është ndërlikuar akoma dhe më shumë. Danimarkës, kryesuese për momentin më 18 pikë, i duhet të paktën 1 pikë për të mbajtur vendin e dytë që i jep mundësi të luajë në fazën play off, ndërsa Suedia dhe Portugalia duhet të fitojnë 2 ndeshjet e mbetura dhe të shpresojnë te gabimet e njëra-tjetrës për të siguruar një vend në Botërorin 2010.



Golashënuesit, Bogu, mes 10 të parëve në Itali

Goli i shënuar të mërkurën kundër Danimarkës (1-1), përveçse firmosi barazimin e katërt të Shqipërisë në eliminatoret e Kampionatit Botëror 2010, e ngjiti Erion Bogdanin në vendin e tetë të një klasifikimi specifik të publikuar nga gazeta prestigjioze italiane “Corriere dello Sport”. Renditja ka të bëjë me lojtarët që aktivizohen në kampionatin italian dhe kanë shënuar gola gjatë sezonit 2009-2010 (nga qershori), në të gjitha kompeticionet, përfshirë Serinë A, Ligën e Kampioneve, Ligën e Evropës, Kupën e Italisë, Superkupën e Italisë, ndeshjet me ekipet kombëtare A dhe ato U-21. Bogdani me tre golat e tij, 2 me kombëtaren shqiptare e një të realizuar në Kupën e Italisë, është i teti në një listë prej 78 lojtarësh e që kryesohet nga Francesco Totti me 11 gola (1 në Serinë A dhe 10 në Ligën e Evropës). Sulmuesi shqiptar i Chievo-s ka po aq gola sa Cassano i Sampdorias, De Rossi i Romës, Di Natale i Udinese-s, Menez i Roma-s dhe Micoli i Palermos. Diferenca me gjashtë lojtarët e tjerë që renditen në vendet 2-7: Eto’o, Hamsik, Jovetic, Paloski, Pacini e Riise, të gjithë këta me nga katër gola, është vetëm një gol. Bogu ka lënë pas vetes emra të tillë si Cruz, Datolo, Criscito, Calaio, Diego, Iaquinta etj. Në renditjen përfundimtare të vitit 2009, fitoi Zlatan Ibrahimovic, sulmuesi suedez luante atëherë me Interin.



Grupi 1

Nd. Pikë

Danimarka 8 18

Suedia 8 15

Portugalia 8 13

Hungaria 8 13

Shqipëria 9 7

Malta 9 1



Ndeshjet



10 tetor

20:00 Kopenhagen Danimarkë - Suedi

20:45 Lisbonë Portugali - Hungari



14 tetor

Guimaraes Portugali - Maltë

Solna Suedi - Shqipëri

Kopenhagen Danimarkë - Hungari





Argjentina rrezikon pjesëmarrjen në Botëror, mundet nga Paraguai

Argjentina merr goditjen e dytë brenda tri ditëve, duke vënë seriozisht në dyshim pjesëmarrjen në Botërorin 2010. Skuadra e Diego Armando Maradonës ka treguar sërish një lojë të shëmtuar në humbjen e pësuar 1-0 në fushën e Paraguait. Goli i shënuar nga Nelson Valdez në minutën e 27-të u ka siguruar vendasve një biletë për në Afrikën e Jugut, ndërsa bardhekaltrit mbahen në “fije të perit”, tashmë që duhen edhe dy ndeshje deri në fundin e fushatës eliminatore. Argjentina e Maradonës është shfaqur sërish një skuadër e shthurur taktikisht, duke u mbështetur vetëm tek individualitetet si Messi e Aguero, të cilët zhgënjyen. Pas ndeshjes, Maradona ka shprehur bindjen se do të vazhdojë të jetë në krye të pankinës. “Kemi ende mundësi. Do të eci përpara sepse nuk kam frikë nga kritikat. Tani do të mbyllem me lojtarët e mi dhe do të flas me ta”, - tha ish-sulmuesi. Aktualisht, Argjentina renditet e pesta në grup me 20 pikë pas Brazilit, Paraguait, Kilit dhe Ekuadorit. Në dy ndeshjet e radhës Maradona dhe djemtë e tij do të presin Perunë në shtëpi dhe do të udhëtojnë për në Uruguai.



Juande Ramos, trajner i ri i CSKA Moskës

Ekipi i CSKA Moskës është ndarë nga trajneri i deritashëm Zico dhe ka marrë në vend të tij ish-trajnerin e Real Madridit, Juande Ramos. Zico e mori drejtimin e CSKA Moskës nga Valeri Gazaev dhe arriti ta fitonte Kupën dhe Superkupën e Rusisë. CSKA pjesën më të madhe të sezonit ishte në krye të klasifikimit, por një rënie e formës në periudhën e fundit bëri që klubi të gjendet në vendin e katërt me 10 pikë prapa Rubin Kazan. Kjo solli edhe largimin e brazilianit dhe caktimin e Ramos në vend të tij. “Pasi të gjitha palët arritën marrëveshje, u mor vendimi që nga sot marrëveshja mes Zico-s dhe CSKA Moskës të prishet. Falënderojmë për kohën e kaluar në klub dhe fitoret në Kupën dhe Superkupën e Rusisë, që u fituan nën drejtimin e tij”, - thuhet në deklaratën e klubit rus. Në të njëjtën kohë, Juande Ramos ka pohuar kalimin në klubin rus me anë të një deklarate në faqen e tij zyrtare. “Ata janë ekip me histori, edhe pse nuk kishin fat në ndeshjet kontinentale. Jemi të bindur se mund të kemi një sezon të mirë në Ligën e Kampioneve dhe do të punojmë me ngulm për këtë”, - ka thënë Ramos.



Real Madridi është klubi i shekullit XX

Real Madridi është emëruar skuadra më e mirë e shekullit XX, pas një studimi të realizuar nga Federata Ndërkombëtare për Historinë dhe Statistikat e Futbollit (IFFHS). Gjigandi spanjoll zuri vendin e parë, ndërsa ndiqet nga Juventusi që u rendit i dyti. Bardhezinjtë kanë lënë pas Barcelonën, Milanin dhe Bayern Munich-un. Renditja e skuadrave është bërë në bazë të titujve të fituar ose renditjes në tabela nëpër gara të ndryshme. Ndërsa me anë të një sistemi të pikëve, janë vlerësuar klubet për paraqitjet e tyre në Ligën e Kampioneve, Kupën UEFA, Kupën e Kupave të Evropës, Kupën Mitropa, Kupën Latine dhe Superkupën e Evropës.



Lista e dhjetë klubeve më të mira të shekullit XX:

1. Real Madrid (563.50)

2. Juventus (466.00)

3. FC Barcelona (458.00)

4. AC Milan (399.75)

5. Bayern Munich (399.00)

6. Inter (362.00)

7. Ajax (332.75)

8. Liverpool (300.25)

9. Benfica (299.00)

10. Anderlecht (231.00)

standart