Policia Bashkiake ruan bizneset abuzuese nga ankesat e qytetarëve


Trotuaret e kryeqytetit vazhdojnë të jenë të pushtuara nga tavolinat e lokaleve që në mënyrë abuzive shtojnë aktivitetin e tyre. Edhe pse qytetarët ankohen çdo ditë se hasin probleme kur shkojnë në banesat e tyre, madje nuk guxojnë të hapin as dritaret pasi zhurmat, fjalori i pistë si dhe muzika kumbon në banesat e tyre. Trotuaret duhet të jenë në funksion të qytetarëve, por realisht ato janë në funksion të tregtarëve abuzues. Policia Bashkiake, e cila

është kompetente për këtë problem bënë karshillik përball këtij problemi. Në disa raste është dashur ndërhyrja e Policisë së Rendit për të shmangur problemin, por edhe pse pronarët apo menaxherët e lokaleve janë marrë të pandehur, ata sërish nuk kanë reshtur së vazhduari për pushtimin e trotuareve. Pak kohë më parë u përfol në media se nga ana e Policisë së rendit por edhe ajo bashkiake mori një nismë për bllokimin e lokaleve që krijonin zhurma pas orës 23:00, por kjo nismë ishte vetëm një fushat e dështuar, pasi ndërhyrjet e “miqve” dhe ryshfetet nën dorë, bënë që Policia Bashkiake dhe ajo e rendit të jenë të pafuqishëm përball biznesmenëve abuzues. Zona e ish-Bllokut mbetet zona më problematike. Në një pjesë të rrugës “Sami Frashëri”, ku trafiku është i kufizuar, lokalet kanë shfrytëzuar të gjitha hapësirat me tavolinat e tyre. Disa subjekte justifikohen se kanë marrë licenca për tavolinat e nxjerra në trotuare, por edhe në këtë rast nuk kemi të bëjmë me një veprim të ligjshëm, pasi shkelës nuk janë vetëm lokalet por përfshihet edhe Bashkia e Tiranës.

Ankesat
Qytetarët ankohen se është e pamundur të ecësh në trotuaret e kryeqytetit. Tirana është kthyer në një kantier punimesh, që zvarriten e bëhen copa-copa, pamjen e një kryeqyteti nuk e gjen askund. Punët që nisen sot, nuk dihen se kur do të mbarohen dhe rrugët e trotuaret janë pjesa më e shëmtuar e këtij kryeqyteti në mes të shumë të shëmtuarave të tjera. Kudo do gjesh pengesa, të cilat nuk të lënë të bësh tutje dhe je i detyruar që të zbresësh dhe të ecësh në rrugën e makinave, megjithëse në çdo çast je i rrezikuar. Kudo sheh lokale që kanë nxjerrë tavolinat, çadrat dhe kanë zënë një pjesë të mirë të trotuarit. Më tutje, sheh tregtarët që kanë hapur mallrat e tyre dhe kanë nisur edhe një ditë tjetër pune në mes të një trotuari. Kushdo mund të dalë e të vërë një tezgë, mund të shtrojë një çarçaf dhe të nxjerrë mallin e tij, mund të zërë të gjithë pjesën para dyqanit e të vërë makina. Po aq problem është bërë zaptimi i rrugëve për parkingje private. Lokalet dhe bizneset e tjera, në tejkalim të çdo të drejte të mundshme për ushtrimin e biznesit të tyre, “privatizojnë” zonat ku lejohet parkimi i makinave. Në çdo rrugë të bllokut shohim tabela që simbolizojnë zonë të kufizuar pasi është shndërruar në parkim privat. Shumë lokale vendosin tabela, ku tregohet se ndalohet parkimi, në shumë raste përdoren edhe bidonët e ujit, në mënyrë që mos të kenë probleme dhe me policinë, e cila ndonjëherë, ushtron kontrolle në zonat problematike.

Policia
Në zonën e ish-Bllokut, fenomeni i pushtimit të trotuareve është më problematik. Kjo përgjegjësi bie drejtpërdrejtë mbi Bashkinë e Tiranës pasi kjo gjë është në varësi të saj por masat e ndërmarra nga ajo janë ta pakta ose ajo nuk ka ndërmarrë ende një masë të tillë megjithëse e ka premtuar shpesh herë. Madje edhe kur policët bashkiak dalin për ta rregulluar situatën e trotuareve të uzurpuar ata nuk ja arrijnë kurrë synimet veçse vjelin disa gjoba të majme dhe më pas e harrojnë këtë situatë alarmante për qytetarët. Në zonën e Bllokut, patrullojnë në çdo moment të ditës policë të bashkisë. Por ata nuk janë në shërbim të qytetarëve, por në shërbim të subjekteve abuzuese. Në rrugën “Sami Frashëri”, trafiku është i kufizuar dhe rruga bashkë me trotuarin është pushtuar nga tavolinat. Policia bashkiake, qëndron e fiksuar në të dyja anët e kësaj rruge dhe pengon mjetet që kërkojnë të prishin qetësinë e klientëve të këtyre lokaleve, të cilët kënaqen me qëndrimin të ulur në mes të rrugës.

Romir Saraçi



SOT