Sekretari i Përgjithshëm i Administratës së Parlamentit, Marlind Myftiu u bëri thirrje dje zyrtarisht disa prej ish-deputetëve të Partisë Socialiste që të dorëzojnë automjetet e Kuvendit. Reagimi i Myftiut erdhi një ditë pasi deputeti i Partisë Demokratike, Igli Cara denoncoi gjatë seancën plenare faktin se disa ish-deputetë të Partisë Socialiste, ende nuk kanë përmbushur detyrimin ligjor për të dorëzuar sipas ligjit të miratuar në shtator të vitit 2009, dorëzimin e automjeteve që mbanin nga Kuvendi. Në këtë drejtim, Myftiu theksoi se gjatë ditës së djeshme, një ish-deputet i PS ka bërë dorëzimin e automjetit. Në këtë kuadër, Kuvendi i bëri thirrje edhe ish-deputetëve të tjerë, të cilët ende nuk kanë përmbushur detyrimet e tyre ligjore të dorëzojnë automjetet, në të kundërt administrata e Kuvendit do të detyrohet të bëjë publike emrat e tyre. "Duke marrë shkas nga deklaratat e deputetit Igli Cara dhe reagimi i zonjës Arta Dade, Sekretari i Pëgjithshëm Marlind Myftiu sqaron se Administrata e Kuvendit, në përmbushje të detyrimeve, që burojnë nga hyrja në fuqi e ligjit nr. 10.160, datë 15.10.2009, 'Për rregullimin e shërbimit të transportit për funksionarët e lartë dhe nëpunësit civilë', u kërkon edhe një herë ish-deputetëve, apo atyre që kanë marrë mandate nga KQZ, që të dorëzojnë makinat e Kuvendit apo të institucioneve të tjera të marra si ish-deputetë. Nëse ato do të vonojnë përsëri dorëzimin e automjeteve, Administrata e Kuvendit do të bëjë publike emrat e tyre. Njoftojmë gjithashtu, se sot një tjetër deputet i opozitës dorëzoi automjetin që kishte në përdorim, ashtu si zonja Dade dhe zoti Braçe që i kanë dorëzuar. Duke besuar në respektimin e ligjit, Administrata e Kuvendit shpreson në mirëkuptimin dhe bashkëpunimin me secilin prej tyre", thuhet në njoftimin e Sekretarit të Përgjithshëm të Administratës së Kuvendit.

bora sot