Sipas statistikave nga Gjykata e Tiranës, për vitin 2009 numërohen 5621 divorce.

Gjykata e Tiranës jep shifrat në total, për vitin 2009-të
Zgjidhja e martesës ose ndryshe, divorcet në Shqipëri po arrijnë shifra alarmante. Çdo ditë e më shumë, Gjykata e Tiranës, regjistron emra të cilat janë pretendentë për të zgjidhur martesën e tyre. Sipas statistikave, për vitin 2009 numërohen 5621 divorce. Shkaqet e divorcit janë të shumta, duke filluar që nga dhuna në familja, mos respektimi i të drejtave të partnerëve, etj. Në këtë rast shumë psikologë mendojnë se divorci nuk është opsion i keq, pasi është më mirë të këtë divorc, se sa te kemi vrasje ne familje, përdhunime, etj. Për ta është më mirë që një marrëdhënie që nuk funksionon të përfundojë. Shumë gra, jo vetëm në Shqipëri, por edhe jashtë vendit, pavarësisht keqtrajtimit te tyre nga bashkëshorti, përpiqen ti shmangen aktit të divorcit për arsye të ndryshme. Këto divorce në shumicën e rasteve vijnë si pasojë e dhunës që ushtrojnë burrat tek gratë e tyre, shkaqeve sociale e ekonomike, por dhe të disnivelit në angazhimet mes bashkëshortëve. Në të dyja rastet viktima të këtyre marrëdhënieve janë fëmijët. Sipas shifrave të marra në Gjykatën e Lartë të Tiranës për vitin fundit, shohim një rritje të numrit të divorceve.
Divorci
Divorci, një ngjarje njëherësh publike dhe personale është përgjithësisht i dhimbshëm madje shkaktar krizash për shumicën e atyre që e përjetojnë atë. Divorci përfaqëson një tranzicion të madh në jetën e njeriut me probleme e pasoja sociale, psikologjike, ligjore, ekonomike. Për këtë arsye studiuesit janë të mendimit se divorci është një tranzicion në jetën e njeriut, është një akt civil aq edhe juridiko- ligjor. Ai realizohet vetëm me vendim të gjykatës, përfaqëson një shpërbërje të njësisë së përbashkët.
Pasojat e divorcit
Në një pikë, ku marrëdhënia nuk funksionon më, alternativa e vetme e saj mbetet divorci. Ajo që mbetet në fund është një ndjenje indiferentizmi, boshllëku dhe zemërimi shpërthyes. Si një problem sa juridik aq edhe social, divorci kryesisht shkaktohet, kur ndërmjet dy partnerëve është thyer komunikimi, ndjenja, intimiteti, dhe padyshim që marrëdhënia nuk funksionon më, duke përfshirë në një stres të përgjithshëm të gjithë anëtarët. Një familje që kalon një proces të tillë gjatë jetës së saj, përfshihet në një mori çrregullimesh emocionale. Procesi i divorcit mund të rrisë brenda anëtarëve të familjes ndjenja të forta zemërimi, ankthi, depresioni, vetmie, turbullimi dhe mungesë kuraje të dukshme në personalitetin e individëve. Të dyja sekset gjatë kësaj periudhe shfaqin probleme të dukshme psiko-emocionale dhe jo pak herë gjenden në mes të një konflikti të pashpjegueshëm për ta. Por mënyra e paraqitjes dhe transmetimit të këtyre ndjenjave për ta është e ndryshme.
Pasojat e divorcit tek fëmijët
Fëmijët janë ata që shfaqin hapur ndjenja të fuqishme dëshpërimi, agresiviteti, zemërimi dhe frike. Shpesh herë ata ndjehen fajtorë dhe të pafuqishëm për ndarjen e prindërve. Në disa raste ata fajësojnë veten për ndarjen e tyre. Vlen për t'u theksuar se në ato momente që ndodh procesi i ndarjes dhe ndjenjat e fëmijës injorohen totalisht, pa tentuar që të shpjegohen shkaqet e këtij divorci, këta fëmijë do të shfaqin probleme të dukshme në shkollë dhe shoqëri të reflektuar në sjellje, komunikim, bashkëpunim me bashkëmoshatarët si edhe do të përfshihen në vetëvlerësime dhe imazhe të ulëta mbi veten e tyre. Një nga problemet më të dukshme tek ta është se në të ardhmen shfaqin vështirësi në komunikim me prindërit e tyre. Mungesa e një modeli prindëror sjell tek fëmijët gjendje konfuzioni psikologjik, duke sjellë më pas pengesa në komunikimin e tij me të tjerët. Ndër të tjera këta fëmijë duke jetuar nën stres të vazhdueshëm për shkaqe të ndryshme, që mund të jenë, psikologjike, sociale dhe ekonomike mbyten nga presionet dhe konfliktet e vazhdueshme që hasin brenda familjeve të tyre. Si rrjedhojë, ata rriten dhe zhvillohen nën ndikimin e vështirësive të mëdha duke humbur besimin dhe kurajën mbi veten e shoqërinë.
Sajmira Dhoska

Tirana Observer