Kthehen sherret në sallën e Parlamentit pas gjashtë muajve “qetësi”

Parlamenti i kthehet identitetit të tij të viteve të mëparshme. Pas 8 muajsh në heshtje, seanca e djeshme parlamentare, e cila ka nisur në orën 09.30 të mëngjesit dhe ka mbaruar në 21.15 të mbrëmjes është karakterizuar jo vetëm nga replikat e ashpra mes deputetëve,

por madje edhe me konfrontim fizik mes tyre. Gjithçka nisi pas një debati për procedurë, por që rrezikoi të degjeneronte në dhunë mes dy deputetëve. Nisja e këtij konfrontimi ka ndodhur në momentin, kur deputeti socialist i qarkut të Durrësit, Gazmir Bizhga ka kërkuar nga foltorja e parlamentit fjalën për replikë, pas akuzave të bëra nga deputeti demokrat i po këtij qarku, Igli Cara. Ka qenë deputeti i qarkut të Durrësit, Igli Cara që në 10 minutëshin e tij ka aluduar dhe ka përsëritur fjalët e deputetit Bizhga pa e zënë në emër. Nënkryetari i parlamentit, Nasip Naço nuk ka lejuar replikën nga ana e deputetit socialist, meqenëse këtij të fundit nuk iu përmend emri. Ka qenë pikërisht kjo, nisma e replikës me zë të lartë mes deputetit socialist Gazmir Bizhgës dhe deputetit tjetër demokrat, Gent Strazimiri. Bizhga ka insistuar për të marrë fjalën. Por, Strazimiri ka ndërhyrë që deputeti socialist të mos merrte fjalën për replikë pasi nuk i ishte përmendur emri, por të ulej në vend. Replika këto të vazhduara edhe me shtyrje fizike mes tyre, duke sjellë edhe pezullimin e seancës për pesë minuta. Pas pesë minutash me rifillimin e seancës filloi konfrontimi fizik mes deputetëve të qarkut të Durrësit, Gazmir Bizhgës të PS dhe Igli Carës të PD. Pas pesë minutash seanca filloi me marrjen e së drejtës për replikë nga ana e deputetit Bizhga, i cili replikoi me deputetin Igli Cara. “Në takimet private që kemi bërë ai më ka thënë se PD nuk vjen kurrë në pushtet përsa të jetë kryetar Berisha. Nuk kam qenë as doganier, duke treguar korrektësi në zbatimin e detyrës. Më vjen keq që parafolësi im, është i prodhuar nga një klan mafioz, dhe më vjen keq që nuk është përfaqësues i vetvetes, por i një grupi klanor”, u shpreh Bizhga në replikën me deputetin Cara. Menjëherë pas përfundimit të fjalës së tij ka nisur edhe përplasja e dytë fizike mes Bizhgës dhe Carës. Konfrontimi ka qenë i madh, por ndërhyrja e menjëhershme e punonjësve të sallës së parlamentit ka shmangur një konflikt. Debati i tyre ka sjellë përsëri ndërprerjen e seancës. Ndërkaq, këtë incident në sallën e parlamentit, deputeti Gent Strazimiri e ka cilësuar si strategjinë e radhës së Partisë Socialiste, por dhe si shembull i keq për parlamentin. Ai sqaroi se nuk pati konfrontim fizik, sepse ishin punonjësit e gardës ata që bënë punën e tyre në momentin e duhur. “Jam i bindur se është një incident, një strategji e PS. Njerëzit që janë në parlament në radhët e opozitës janë për të ndezur konfliktin. Bizhgës nuk iu përmend emri nga parafolësi, ai kishte të drejtë të replikonte po aq sa kisha unë të drejtë të replikoja apo çdo deputet tjetër i parlamentit. Ai që mendon se është më i forti për të pushtuar foltoren nuk ka lidhje me etikën parlamentare”, u shpreh Strazimiri për të shtuar se fakti që Bizhga morri fjalën nuk ishte problem për të. Gjithashtu, ai informoi se deri në orët e mbrëmjes së djeshme nuk i ishte komunikuar asnjë masë nga ana e kryetarit të parlamenti. “Nuk e kam shkelur rregulloren. Bizhga e ka shkelur rregulloren në mënyrë të përsëritur”, nënvizoi Strazimiri. Ndërsa, deputeti socialist, protagonisti i dy konflikteve të djeshme në sallën e parlamentit, Gazmir Bizhga u shpreh se kërkoi fjalën për replikë, por nënkryetari i parlamentit nuk ia dha fjalën. “Nuk pati konfrontim të drejtpërdrejtë. Pati një shtyrje fizike me Strazimirin. Punonjësit e gardës ndërhynë dhe u bë ndërprerja e seancës. Nuk mund të them konfrontim fizik, por ishte situatë e ndezur. Nuk arriti të më gjuante”, u shpreh Bizhga, për të shtuar se mes tyre ka pasur vetëm replika fjalësh. Ashtu sikurse dhe deputeti Strazimiri, edhe Bizhga informoi se deri në orët e mbrëmjes së djeshme nuk kishte marrë asnjë njoftim nga ana e kryetarit të grupit parlamentar.

Strazimiri: Incidenti, strategji e PS
Shembull i keq për parlamentin. Nuk pati konfrontim fizik se punonjësit e gardës bënë punën e tyre. Jam i bindur se është një incident, një strategji e PS. Njerëzit që janë në parlament në radhët e opozitës janë për të ndezur konfliktin. Bizhgës nuk iu përmend emri nga parafolësi. Ai kishte të drejtë të replikonte, po aq sa kisha unë të drejtë të replikoja, apo çdo deputet tjetër i parlamentit. Ai që mendon se është më i forti për të pushtuar foltoren, nuk ka lidhje me etikën parlamentare. Fakti që Bizhga mori fjalën nuk është problem për mua. Nuk na la asnjë komunikim të diskutojmë dhe të japim argumentet tona në replikë. Nuk është komunikuar asnjë masë nga ana e kryetarit të parlamentit. Nuk e kam shkelur rregulloren. Bizhga e ka shkelur rregulloren në mënyrë të përsëritur.

Bizhga: Mes meje dhe Strazimirit, pati vetëm shtyrje fizike
Kërkova të drejtën për replikë. Nënkryetari i kuvendit nuk ma dha fjalën. Nuk pati konfrontim të drejtpërdrejtë. Pati një shtyrje fizike me Strazimirin. Punonjësit e gardës ndërhynë dhe u bë ndërprerja e seancës. Nuk mund të them konfrontim fizik, por ishte situatë e ndezur. Nuk arriti të më gjuante. Është mënjanuar se punonjësit që monitoronin sallën ndërhynë dhe pati vetëm replika fjalësh mes nesh. Nuk di të ketë pasur komunikim kundrejt meje nga kryetarja e parlamentit. Ende nuk më është vënë në dijeni nga kryetari i grupit parlamentar një gjë e tillë.

Blerina Gjevori