Romeo Leka, 25- vjeçari i “braktisur” që terrorizon Tiranën për 30 minuta

“Odiseja” e pengmarrjes së grabitësit

Aventura e rrallë e një “hajduti” të përjashtuar nga Amerika

Gjithçka dukej si lojë. Një djalë i veshur sportiv, që në njërën dorë mbante një vajzë dhe një tjetrën nj pistoletë. Po të mos ishte alarmi i policisë dhe rrethimi i zonës prej tyre, gjithçka kishte pamjen e një xhiroje normale. Madje edhe arma në dorën e tij, të linte përshtypjen e një arme lodër, ndërsa “gjahu” i tij dukej sikur ishte e njohura e tij prej kohësh. Sinjalizimet policore dhe rrethimi i zonës nga forcat RENEA ia ndryshuan imazhin skenës që kishte përgatitur i riu, i pa menduar mirë. Menjëherë shenjat e agresivitetit të tij ndryshojnë situatën dhe më pas ngjarja merr përmasa serioze. Bëhej fjalë për një pengmarrje të mirëfilltë; pengu i tij ishte rastësi, ndërsa policia e Tiranës, më shumë se kurrë, ishte në provën e parë të një ngjarjeje të paprecedent; ndoshta edhe e papërgatitur për të. Finalizimi, gjithçka meritë e këtyre forcave dhe kreut të saj.
Grabitja
Sipërmarrje për t`u admiruar e një personi që zgjedh “Rogner-in” dhe rrëmben një sasi lekësh nën kërcënimin e armës. Realisht në të gjithë këtë ngjarje, e vetmja sipërmarrje që vazhdon të jetë e dyshimtë; i veshur normal, me armë me vete dhe i pamaskuar, hyn dhe del nga hotel “Rogner-i” me rreth 31 milion lekë (të vjetra). Para “Rogner-it”, grabitësi shikon dy makina të patrullës së përgjithshme që pretendohet që janë vënë në dijeni të tij, dijeni që është shpërndarë shpejt për të rrethuar grabitësin, ndërkohë që djali me armë në dorë dhe me çantën e parave kalon bulevardin për tu gjendur në lulishte. Makinat e policisë nuk kalonin dot aty, ndërkohë ka nisur izolimi i zonës dhe grabitësi ka parë rrezikun e mosmundësisë për të çarë gardhin e policisë. Autori, afrohet në cepin e rrugës mes Presidencës dhe Librit Universitar dhe aty vendos të ndryshojë skemën; rrëmben një vajzë e cila po kalonte rastësisht aty me një shoqen e saj, i vë pistoletën në kokë dhe nis “betejën” me policinë. Djali lëviz i qetë, ndërkohë afër këmbëve të tij gjendet edhe një motor policie. Me veprime që ngjanin më shumë me interpretim të skenave të filmave, djali i kërkon policisë ta lërë të qetë sa të blejë një red bull dhe më pastaj dialogu mes tij dhe forcave të shumta të policisë ka në mes vetëm vajzën-peng. Dorëzimi vjen kur tre specialë të RENEA-s afrohen me armë të drejtuara nga ai dhe pengmarrësi detyrohet të lëshojë vajzën me të cilën qëndroi për më shumë gjysmë ore.
Histori grabitjesh...
Ngjarja e djeshme ka parametra të pahasur në historinë e krimit në vendin tonë. Bankat janë edhe gjahu i preferuar i grabitësve profesionistë thuajse në të gjithë botën, edhe atje ku jo vetëm siguria e bankave është e mirëorganizuar por edhe siguria në vend ka tjetër formë dhe fuqi me të tonën, por ditën e djeshme, pavarësisht personazhit, skena të linte përshtypjen se luhej diku në kryeqendrat e botës; ndoshta pa e ditur se personi që u kthye në proverbialitetin e pashoq të të grabiturit vinte pikërisht nga Nju Yorku; vinte me një pasaportë të habitshme për moshën e tij, ndërkohë që me pengun e vet tregon një sjellje aristokrate..!
Policia...
Njeri i armatosur që merr peng një person të rastësishëm në rrugë; dy elementë që testuan po kaq rastësisht aftësinë e bluve të Tiranës për të ndërhyrë edhe në një rast të tillë. Krerë të kësaj policie menaxhojnë në mënyrë perfekte ngjarjen për të treguar si rrallë herë se jo vetëm në ta gjendet profesionalizimi i duhur, por se munden të ndërhyjnë, duke respektuar radhën e veprimeve edhe në aksione të këtij lloji. RENEA sillet në vendin e ngjarjes, ndërkohë kreu i bluve të Tiranës, Tonin Vocaj, teksa jepte detajet e operacionit ka lënë vend të veçantë edhe për falënderimin e kësaj strukture dhe të gjithë vartësve të vet, të cilët përballuan me maturi ngjarjen e rrallë.
Vazhdimësi grabitjeje
Ndërsa, jo vetëm gjithë vëmendja e Policisë së Tiranës dhe e të gjitha strukturave të mundshme operacionale ishte përqendruar në rastin e pengmarrjes së Romeo Lekës, në Komunën e Parisit, një tjetër i zgjuar hyn në një pikë “Exchange” duke rrëmbyer prej aty rreth 1000 euro. Janë mësuar të dhënat e para në lidhje me të dhe se policia pretendon se e ka të njohur identitetin e tij, por për momentin personi, që mendohet të jetë rreth të 40-ve, ka mundur të largohet në drejtim të paditur. Policia është vënë në ndjekje të tij, pas sinjalizimit që ka ardhur nga kalimtarët dhe personat e pikës së kthimit të valutës, por ende nuk ka emër. Policia e Tiranës ka dhënë detajet më të fundit në lidhje me ngjarjen që tronditi kryeqytetin paraditen e sotme. Drejtori i Policisë së Qarkut Tiranë, Tonin Vocaj, në një deklaratë për mediat, ka sqaruar organizimin e operacionit dhe ka dhënë profilin e personit që bëri grabitjen dhe pengmarrjen.

Vajza e marrë peng tregon detajet e minutave të rrëmbimit nga grabitësi në tv “Ora”
Pengmarrësi mes Nju Yorkut dhe Tiranës



Detajet e një superoperacioni policor për çlirimin e pengut

Policia dhe moria e njerëzve të kthyer në turmë që kanë ndjekur procesionin e pengmarrjes së grabitësit të parave në “Rogner” nuk dinin asgjë më shumë se sa shihnin në lidhje me personin që ishte fokusuar jo vetëm nga dhjetëra forca policie por edhe nga snajper-a, armë të shumëllojshme, kamera dhe aparatë fotografikë. I vetmi njeri që dinte të dhëna për të qe pengu i vet. Djali ka mundur t`i tregojë se kush ishte, si ishte dhe pse kishte ndërmarrë një aksion të tillë. Vajza ka rrëfyer me detaje jo vetëm në polici por edhe në televizion gjithë bisedën që ka bërë me djalin derisa dialogun e ka ndërprerë policia. Vajza ka mësuar se emri i tij ishte Romeo, se ishte nga Lezha dhe se asaj s`donte ti bënte keq. Madje asaj, sipas saj, i ka rrëfyer edhe aventurat e tij kriminale në Nju York, ndërkohë që policia të gjitha të dhënat në lidhje me emrin e çuditshëm Romeo Leka, i ka mësuar, pasi ai është gjendur në duart e tyre.
25 vjeçari lezhjan
Quhet Romeo Leka. Thuhet se emigroi familjarisht në Amerikë rreth 12 vite më parë, që në moshë 13 vjeçare, ndërsa atje ka nisur edhe të kthehet në një person problematik për vendasit. Policia e Tiranës, që ka treguar detaje në lidhje me skedat e tij kriminale, tregon se Romeo është ndaluar atje për trafik droge, për grabitje me armë, por edhe për probleme të tjera. Drejtësia vendase si duket nuk ka patur kohë të harxhojë me të riun shqiptar dhe tre vite më parë e ka kthyer përfundimisht në Shqipëri. Sërish referuar të dhënave që ditën e djeshme ka treguar vetë kryepolici i Tiranës, Tonin Vocaj, djali ka qëndruar në disa rrethe të vendit, pasi nuk ka familjen e tij në Lezhë, e për pasojë mendohet se janë një sërë aktesh të paautor që duhet ti përkasin atij. Gjurmimi i fundit, para se 25 vjeçari të kthehej në personazhin jo vetëm të ditës, por ndoshta edhe të të gjithë historive të grabitjeve në vendin tonë, nis mbrëmjen e së enjtes, kur është lajmëruar humbja e një taksie. Mirëpo të dhënat e sotme, tregojnë se Romeo ka mundësi ta ketë braktisë mjetin, pasi ai nuk dinte të ngiste makinat shqiptare...
Rrëfimi i vajzës-peng
“Këto lekët janë të tuat; mos ia jep askujt”. Kjo ka qenë mënyra e shpërblimit të pengut të tij, ndërkohë që vajza e qetësuar nga akti, orë më vonë ka nisur rrëfimin në ekranin e televizionit “Ora”. Detajet e rrëfimit të saj tregojnë për një akt të ndërgjegjshëm të tij, deri sa para tij shfaqeshin kërcënueshëm punonjësit e policisë së Tiranës. Sipas Lori Hatellarit, 19 vjeçares nga Skrapari, Leka me të sillej shumë qetë ndërsa i ka treguar edhe fotot e të dashurës së tij. Gjithashtu në lidhje me detajet që pengu rrëfeu, tregonte edhe reagimet e tij në lidhje me dobësitë e veta. “Kërkoi të rrëmbente një makinë por fakti që nuk dinte ta ngiste makinën që kishte marshe, e gjuajte më qytën e armës, ndërsa më tregoi se dinte tu jepte vetëm makinave me kamie automatike.
Dorëzimi...
Policia ndërkohë që ka marrë gjithë masat për ngushtimin e rrezes ka nisur ta provokojë shpesh herë edhe për të parë deri ku shkonte agresiviteti i tij, ndërkohë që ka ardhur edhe momenti kur pengmarrësi nuk ka mundur të qëndrojë më para presionit të policisë. Vajza tregoi se në momentin që nuk dinte nga të shkonte, nuk ka biseduar më fare me të, ndërkohë që kanë ndërhyrë edhe blutë. Gjithçka ka marrë fund duke e izoluar atë në ambientet e policisë së Tiranës dhe prej aty për të nisur edhe njëherë nga e para gjithë “karriera” e tij kriminale, që sipas të dhënave më të fundit, e implikojnë edhe në një ekzekutim në Athinë, pak ditë më parë.
Aktet kriminale të Romeo Lekës
Ndërsa dyshohet për një sërë grabitjesh të kryera në një hark kohor të brenda pak ditëve, mbi emrin e Romeo Lekës, orëve të mbrëmjes është vendosur edhe një tjetër akuzë. Të dhënat zyrtare të Policisë së Tiranës tregojnë se ai ende vazhdon të jetë i dyshuar, porse bëhet fjalë të gjendet nën akuzën e krimit të vrasjes në Athinë. Madje policia e Tiranës pranon se ai është i kërkuar i policisë greke, pikërisht për vrasjen e shtetasit shqiptar, Renato Krasniqi. Sërish referuar të dhënave të policisë kryeqytetase bëhet e ditur se Romeo Leka pasi ka bërë vrasjen e Krasniqit në Athinë ka hyrë në vendin tonë dhe ka shënjestruar një sërë bankash. Krasniqi u vra pak ditë më parë, orëve të para të mëngjesit dhe se policia greke në informacionin e parë të saj tregoi se bëhej fjalë për një shtetas grek që kishte pasaportën e Krasniqit. Ndërkohë të dhënat më të fundit në lidhje me atë ngjarje kanë të bëjnë me një tjetër akt kriminal, që lidh direkt emrin e Lekës me këtë krim dhe mësohet se vrasja ka ndodhur edhe në sy të familjarëve të viktimës. Gjithsesi tashmë Romeo Leka, djali nga Lezha, që hyri në “Rogner” dhe vodhi bankën, mori edhe peng për të shpëtuar, ndonëse i pa shpresë, mund të dëshmojë në lidhje me gjithçka di dhe nuk di policia e Tiranës për të dhe bëmat e tij.



tirana observer