Tiranë, 23 prill - Një prej kompanive më të rëndësishme zvicerane do të investojë në në Shqipëri gjatë viteve të ardhshme 4 miliardë euro në fusha të ndryshme. Marrëveshja e bashkëpunimit u nënshkrua dje mes ministrit të Ekonomisë, Tregtisë dhe Energjetikës, Dritan Prifti dhe përfaqësuesve të kompanisë Rudana Investment Group. Ministri Prifti theksoi se, veç shumës që do të investohet, firmosja e marrëveshjes së bashkëpunimit është dhe një hap për sjelljen e sa më shumë investimeve të huaja në vend. Ministri Prifti tha se, një ndër pikat e marrëveshjes ka të bëjë me ndërtimin e 1000 MW kapacitet të ri të prodhimit të energjisë elektrike nga uji. "Po të kemi parasysh që fuqia prodhuese e Shqipërisë sot është rreth 1500 MW, ky është një kontribut i jashtëzakonshëm në sistemin tonë energjetik, me investitorë të gatshëm për të ndërhyrë menjëherë në këtë sistem", u shpreh Prifti. Ndërkohë që, pika të tjera me kompaninë Rudana Investment Group, janë ndërtimi i një rafinerie të re në Porto Romano, i një porti të ri në zonën e Vlorës ose privatizimin e atij ekzistues, etj. Zëvendësdrejtori i përgjithshëm i kompanisë zvicerane Rudana Investment Group, shprehu kënaqësinë për nënshkrimin e Memorandumit dhe preku disa nga fushat në të cilat kompania është e interesuar të investojë, si energjetikën apo infrastrukturën.

bota sot