Inaugurimi i autostradës, Berisha të dielën në Kosovë

Valentina Madani

Berisha drejt Vërmicës, me ftesë të Thaçit

Madhështia e hapjes së tunelit të Kalimashit do të njohë një tjetër dimension ditën e diel, por këtë radhë vetëm pak metra larg kufirit shqiptar, në Vërmicë. Kryeministri i Shqipërisë, Sali Berisha dhe ai i Kosovës, Hashim Thaçi, do të përjetojnë të tjera emocione, të ngjashme me ato të 31 majit të 2009-ës, për të shënuar një datë tjetër historike në historinë e shqiptarëve, nisjen e punimeve të autostradës së Kosovës, Vërmicë-Merdarë. Burime pranë Kryeministrit Berisha konfirmojnë vajtjen e tij ditën e diel në Vërmicë, për të marrë pjesë në ceremoninë e inaugurimit të rrugës së kombit, por këtë herë në vazhdimësinë e saj përgjatë Kosovës. Berisha do të shoqërohet në Vërmicë nga një pjesë e kabinetit qeveritar, stafi kryeministror dhe deputetët e Qarkut të Kukësit. Burimet sqarojnë se mëngjesin e së dielës, më datën 25 prill, kreu i qeverisë do të udhëtojë drejt Kukësit, ndërkohë që në mesditë, në orën 13:00, bashkë me Kryeministrin kosovar, Hashim Thaçi, do të presin shiritin e fillimit të punimeve të autostradës së re, vazhdimësi e “Durrës-Kukës-Morinë”. Dy ditë më parë Kryeministri i Kosovës, Hashim Thaçi, vlerësoi se autostrada Vërmicë-Merdarë do të ketë efektin e vet, jo vetëm për Kosovën, por për gjithë rajonin dhe për proceset integruese evropiane. Njëherësh z. Thaçi vlerësoi si shumë transparent procesin e ndërtimit të autostradës që lidh Republikën e Kosovës me Republikën e Shqipërisë, duke krijuar mundësi të daljes në det për Kosovën.

Të dielën do të fillojnë punimet në këtë autostradë, në ceremoninë e së cilës do të marrin pjesë personalitete të larta nga Kosova, ndërkaq Kryeministri Thaçi ka ftuar edhe homologun e tij, Sali Berisha dhe autoritetet e Republikës së Shqipërisë, të cilat kanë konfirmuar pjesëmarrjen. Sipas politikës së Tiranës dhe asaj të Prishtinës, ndërtimi i kësaj autostrade që lidh dy kombet shqiptare, është një moment jashtëzakonisht i rëndësishëm për Republikën e Shqipërisë dhe të Kosovës pas shpalljes së pavarësisë së vendit. Kjo autostradë do të jetë e një niveli të lartë, moderne, me standarde të larta bashkëkohore, ndërkohë që qeveria “Thaçi” ka paralajmëruar se shumë shpejt do të shpallet fituesi për koncesionimin e Aeroportit të Prishtinës. Është njoftuar se janë bërë të gjitha përgatitjet për fillimin e punimeve, ndërkaq qeveria kosovare ka ftuar gjithë zyrtarët dhe qytetarët e Kosovës që këtë të diel ta kalojnë në Vërmicë. E tillë ishte edhe data 31 maj 2009, kur të dy kryeministrat, Sali Berisha dhe Hashim Thaçi, hapën tunelin e Kalimashit, ditë e cila u shndërrua në një festë të madhe të shqiptarëve këtej dhe matanë kufirit. Mësohet se ashtu si në Kalimash të Kukësit, edhe në Vërmicë, mijëra qytetarë nga të dyja anët e kufirit do të bashkohen pikërisht në këtë pjesë të trojeve shqiptare, duke e kthyer në ditë feste dhe gëzimi, si një mënyrë bashkimi të dy kombeve.

standart

Inaugurimi i autostradës, Berisha të dielën në Kosovë

Inaugurimi i autostradës, Berisha të dielën në Kosovë

Inaugurimi i autostradës, Berisha të dielën në Kosovë :: Komentet