Shkup – “Liri, barazi dhe drejtësi” ishin sloganet në flamujt dhe pankartat e mbajtura në duar nga protestuesit shqiptarë në Maqedoni.
Mijëra shqiptarë e nisën protestën e tyre rreth orës 13:00 nga pallatet e gjykatave, duke vazhduar në drejtim të godinave të Parlamentit dhe Qeverisë, dhe më pas u rikthyen sërish para gjykatave.

Në protestën me moton “Për drejtësi” morën pjesë rreth 40 shoqata joqeveritare shqiptare, të cilët denoncuan politikën antishqiptare të qeverisë.

Në mesin e protestuesve ishin edhe deputetët e Demokracisë së Re, Flora Kadriu, Abedin Zymberi dhe Sulejman Rushiti.

Këshilli i Organizatave Shqiptare (KOSH) ka lexuar edhe letrën publike me kërkesat e saja. Organizatorët theksuan se marshi protestues që nisi para Gjykatave, më pas para Parlamenti dhe Qeverisë, simbolizon trinomin diskriminues institucional kundër shqiptarëve në Maqedoni.

“Gjykata që dënon shqiptarët e pafajshëm, Parlamenti i dominuar nga maqedonasit që sjellin ligje antishqiptare si dhe Qeveria që aplikon më pas ligje antishqiptare”, kanë theksuar organizatorët.

Ndër kërkesat e shpalosur nga protestuesit janë: lirimi urgjent i të burgosurve të rasteve të Sopotit, Brodecit; ndërprerja e proceseve të hapura të Hagës; ndriçimi i fatit të personave të zhdukur nga uniformat zyrtare në vitin 2001 e më tej; ndërprerja e politikave diskriminuese në arsim, ekonomi dhe kulturë; ndërprerja e projektit Shkupi 2014; zgjidhja urgjente e përdorimit të gjuhës shqipe, simboleve kombëtare dhe ndarja e buxhetit në bazë proporcionale, etj.

Protestuesit janë shpërndarë në mënyrë të qetë, nën mbikëqyrjen e forcave të mëdha të sigurisë që ishin të pozicionuara për të siguruar rendin dhe qetësinë për gjatë vijës së protestuesve në rrugët qendrore të Shkupit. Nga informacionet e para të organizatorëve të protestës, bëhet e ditur se pjesëmarrës kanë qenë rreth 10 mijë protestues.

start