“Ngërçi”, presidenti Topi kërkon zgjidhje ligjore

Valentina Madani

“Shqipëria ka mekanizmat ligjorë për zgjidhje”

Presidenti i Republikës, Bamir Topi, kërkon vënien në lëvizje të Gjykatës Kushtetuese për çështjen e “kutive” të 28 qershorit. Kreu i shtetit bëri thirrje dje për rivendosjen e dialogut politik mes palëve, të cilave u bëri të qartë se Shqipëria i ka të gjithë mekanizmat ligjorë për ta zgjidhur ngërçin politik në vend. Në mënyrë të prerë ai bëri të ditur se zgjidhja duhet të vijë përmes zbatimit të Kushtetutës, teksa i rekomandoi politikës që të lexojë Kushtetutën dhe ligjet e vendit. Sipas z. Topi, palët duhet të gjejnë zgjidhje për situatën politike në vend, pasi janë të gjitha instrumentet që mund të shpien në zgjidhje. Duke iu referuar dërgimit të çështjes në Komisionin e Venecias, Topi vuri në dukje se nuk është institucioni i tij që mund ta bëjë këtë, por duhet të vihen në lëvizje strukturat përkatëse. "Kjo është një çështje që sigurisht po krijon një lloj situate jo të këndshme, sepse njerëzit pa dyshim janë të ndjeshëm, institucionet kanë nevojë që të funksionojnë në tërë dimensionet e veta”, - deklaroi z. Topi. Gjithsesi, ai gjykon se çelësi i suksesit është dialogu politik, afrimi i dy palëve; së pari për të riinstaluar dialogun; pastaj për t’u futur në ata terma, të cilët mbi të gjitha janë mekanizma ligjorë. “Pra, - evidentoi Topi, - sot ne nuk jemi në një moment kur kemi mangësi strukturash institucionale dhe mungesë dijesh”. Presidenti Topi mendon që janë të gjitha instrumentet për të shkuar drejt zgjidhjes së një krize, e cila së paku për mekanizma ligjorë dhe institucionalë nuk mungon. “Pra, - tha ai, - duhet edhe vullneti dhe i inkurajojmë. Problemi është më se i qartë. Këtu nuk është problemi nëse ua kërkojnë, është problemi që ekzistojnë të gjitha mundësitë e institucioneve, të partive politike, të 28 deputetëve të Kuvendit të Shqipërisë. Lexoni Kushtetutën, lexoni ligjet se si mund të vihet në lëvizje Gjykata Kushtetuese dhe pastaj për të kaluar në Komisionin e Venecias dhe si mund të vihet në lëvizje ky komision. Pra, janë gjëra shumë të qarta, mjafton t’i studioni dhe t’i interpretoni mirë", - u shpreh Presidenti. Nisur nga kjo, kreu i shtetit bëri thirrje që partitë politike t’i japin fund situatës kaotike në vend, duke u kërkuar palëve që të gjejnë zgjidhjen e duhur ligjore. Duke kërkuar që zgjidhja të vijë përmes dialogut dhe zbatimit të Kushtetutës, kreu i shtetit theksoi se në tryezën e Presidentit nuk ka negociata. Edhe më parë kreu i vendit ka bërë thirrje për gjetjen e marrëveshjes si dhe nuk ka pranuar organizimin e tryezave prej tij që nuk do të kenë si fund suksesin. Në këtë mënyrë, Presidenti Topi i kërkon klasës politike t’i japë fund kësaj situate nëpërmjet dialogut. I pyetur për Gjykatën Kushtetuese dhe Komisionin e Venecias, Topi u përgjigj: “Kushtetua përcakton mekanizmat”, - dhe sqaroi: “Nuk ka negociata në tryezën time”.

Në 7 maj, Presidenti i vendit, Bamir Topi, nisi bisedimet me përfaqësues të politikës shqiptare dhe komunitetit ndërkombëtar, duke synuar uljen e tensionit dhe zgjidhjen e krizës politike në vend. Z. Topi është takuar me zëvendëskryeministrin dhe ministrin e Jashtëm, Ilir Meta, e më pas me ambasadorin amerikan Withers, atë spanjoll, Montobio, si dhe kreun e KE-së në Tiranë, Lohan, duke synuar uljen e tensionit dhe zgjidhjen e krizës politike në vend.

Ligji për Gjykatën Kushtetuese

Neni 134

1. Gjykata Kushtetuese vihet në lëvizje vetëm me kërkesë të:

a) Presidentit të Republikës;

b) Kryeministrit;

c) jo më pak se një së pestës së deputetëve;

ç) kryetarit të Kontrollit të Lartë të Shtetit;

d) çdo gjykate sipas rastit të nenit 145 pika 2 të kësaj Kushtetute;

dh) Avokatit të Popullit;

e) organeve të qeverisjes vendore;

ë) organeve të bashkësive fetare;

f) partive politike dhe organizatave të tjera;

g) individëve.

2. Subjektet e parashikuara nga nënparagrafët dh, e, ë, f dhe g të paragrafit 1 të këtij neni mund të bëjnë kërkesë vetëm për çështje që lidhen me interesat e tyre.

standart

“Ngërçi”, presidenti Topi kërkon zgjidhje ligjore

“Ngërçi”, presidenti Topi kërkon zgjidhje ligjore

“Ngërçi”, presidenti Topi kërkon zgjidhje ligjore :: Komentet