Një lajm të tillë e konfirmuan dy liderët e partive, Kryeministri Sali Berisha si dhe kreu i PDU-së, Shpëtim Idrizi, gjatë një takimi në Kryeministri. Kreu i maxhorancës, Sali Berisha, priti në një takim dy deputetët e PDU-së, Idrizin e Dashamir Tahirin, nga ku u vendos që së shpejti mes dy partive do të ketë një marrëveshje bashkëpunimi. Ndonëse nuk u bë e ditur në lidhje me detajet e kësaj marrëveshjeje, u bë e qartë se të dy partitë do të ketë një marrëveshje të firmosur. Por burime nga takimi u shprehën se palët janë në bisedime që PDU të përfaqësohet me rang zëvendësministrash dhe drejtorësh të rëndësishëm në qeveri, si dhe bashkëpunimi të shtrihet edhe në zgjedhjet lokale ku PDU do të ketë disa bashki e komuna. “Në përfundim të takimit, Kryeministri Berisha njëherazi kryetar i Partisë Demokratike dhe përfaqësuesit e PDU-së ranë dakord që të elaborojnë një marrëveshje kuadër për bashkëpunimin e ardhshëm midis dy forcave politike”, thuhet në njoftimin zyrtar të Qeverisë pas takimit.
Në këtë takim u fol gjerësisht edhe për çështjen çame, një temë e cila është prioritare në programin e PDU-së. Kryeministri Berisha tha se integrimi i shqiptarëve do të bëhet vetëm sipas normave europiane. “Në këtë kontekst, - theksoi Kryeministri, - Qeveria mendon se problemi çam nuk përbën kategorikisht një çështje të ndryshimit të kufijve apo pretendimesh territoriale. Problematika e tij duhet të trajtohet në përputhje me traktatin e miqësisë dhe bashkëpunimit që ekziston midis dy vendeve tona”, thotë njoftimi zyrtar. Njëkohësisht sipas njoftimit zyrtar të Kryeministrisë, Berisha u shpreh i hapur edhe ndaj kërkesave të tjera të parashtruara nga përfaqësuesit e PDU-së, siç ishte ngritja e një komiteti kombëtar të diasporës, ringritja e shtëpisë muze të rilindësit Hasan Tasimi si dhe ndërtimi i varrezës së Kllogjerit në përkujtim të 2700 viktimave çame. Ndërsa për sa i përket një pike tjetër të ngritur nga përfaqësuesit e PDU-së, siç është ajo e integrimit të komunitetit çam në administratën shqiptare, Kryeministri Berisha u shpreh i hapur për të ndërmarrë hapa konkretë për integrimin e këtij komuniteti pa asnjë lloj diskriminimi në administratë. Për sa i përket çështjes çame, në njoftimin zyrtar të Partisë Drejtësi me Unitet theksohet se, kjo nuk është çështje për pretendime territoriale. “Dy bashkëbiseduesit ranë dakord se kjo çështje nuk është çështje e pretendimeve territoriale, por një çështje që ka të bëjë tërësisht me të drejtat themelore të njeriut, që janë shkelur në rastin e popullsisë shqiptare të Çamërisë”, thuhet në njoftimin e PDU-së.

Panorama