Shkrimtari i njohur Dritëro Agolli reagon ashpër lidhur me ngjarjen e Himarës. Në një intervistë telefonike për gazetën "Panorama" ai shprehet se elementë të minoritetit, si kreu i Omonias, Vasil Bollano dhe të tjerë duan ta bëjnë Shqipërinë gjysmë greke. "Kjo luftë politike e trilluar sipas mendimit tim synon ta bëjë Shqipërinë gjysmë minoritare, me një fjalë gjysmë greke. Arrin deri aty sa bëhen edhe protesta dhe individë të veçantë të ndezur nga baruti i fjalës në Himarë ulërijnë 'shqiptarët janë derra vrasës'", shprehet Agolli.




Ne shqiptarët dhe grekët i dënuam ushtarët grekë që parakalonin në mes të Athinës me fjalët më fyese për Shqipërinë, mirëpo tani po me këtë këngë në mes të Himarës parakalojnë ushtarët e Bollanos. Këta që janë edhe si përshtjellje partish të vogla minoritare nuk janë as në dobi të grekëve, as në dobi të shqiptarëve, por janë disa gjysmë kaçakë që bërtasin me parullat më të liga dhe më të pështira, që edhe të dehurit nuk mund t'i thonë


Shkrimtari kritikon në të njëjtën kohë edhe rolin e shtetit, që nuk pengoi bllokimin e rrugëve, ndërkohë që i bën thirrje edhe Kryepeshkopit Janullatos që të mos përfshihet në këtë punë.
Si e gjykoni ngjarjen e ndodhur në Himarë dhe qëndrimet që e pasuan atë?
Episodi në Himarë është një ngjarje thjesht e stërholluar dhe e hiperbolizuar si në romanet banale policeske, me qëllime shumë të errëta, për të hapur një luftë politike artificiale. Kjo luftë politike e trilluar sipas mendimit tim, synon ta bëjë Shqipërinë gjysmë minoritare, me një fjalë gjysmë greke. Arrin deri aty sa bëhen edhe protesta dhe individë të veçantë të ndezur nga baruti i fjalës në Himarë ulërijnë 'shqiptarët janë derra vrasës'. Unë do të thosha që vetëm njerëzit që transformohen në ujqër dhe çakej mund të bërtasin që 'shqiptarët janë derra vrasës'. Këta bërtitës nuk janë as shqiptarë dhe as grekë. Ne me grekët siç dihet nga historia kemi qenë bashkë në luftëra dhe në paqe dhe kemi ruajtur shtëpitë tona nga zjarri, sepse jemi fqinj. Një proverb i vjetër grek thotë se 'kur digjet shtëpia e fqinjit, digjet dhe shtëpia ime'. Gjithmonë sado i vjetër që është ky proverb ka qenë aktual edhe për dy fqinjët që kanë luftuar bashkë në të gjitha luftërat. Ne shqiptarët dhe grekët i dënuam ushtarët grekë që parakalonin në mes të Athinës me fjalët më fyese për Shqipërinë, mirëpo tani po me këtë këngë në mes të Himarës parakalojnë ushtarët e Bollanos dhe të të tjerëve. Këta që janë edhe si përshtjellje partish të vogla minoritare nuk janë as në dobi të grekëve, as në dobi të shqiptarëve, por janë disa gjysmë kaçakë, që bërtasin me parullat më të liga dhe më të pështira, që edhe të dehurit nuk mund t'i thonë.
Këto ngjarje në Himarë si bllokimi i rrugëve për shumë orë, apo protestat ndodhin në një kohë kur turizmi në Shqipëri është në kulmin e tij...
Në përgjithësi nuk jam kundër protestave të logjikshme, por unë jam kundër protestave që zënë rrugët nacionale, qofshin këta shqiptarë, qofshin minoritarë, qofshin edhe ufo. Këto janë rrugë nacionale dhe shteti duhet të marrë masa. Po të duan le të shkojnë pranë shtëpive të tyre dhe të protestojnë atje. Lejimi i këtyre protestave është një mungesë e seriozitetit të shtetit dhe një frikë se mos na flet Europa që jeni kundër protestave. Në këtë pikë më pëlqeu edhe intervista e sotme e zotit Godo (e djeshmja) lidhur me rolin e shtetit. Edhe në Shtetet e Bashkuara të Amerikës po të bllokohet një autostradë, do ta lërë Qeveria protestën? Ata madje mund t'i shtypin. Si do të bllokosh ti autostradën?
Sipas jush, reagimi i shtetit duhet të ishte më i ashpër?
Po, shumë më i ashpër, bile i ashpër shumë. Nuk mund ta lejosh. Të gjitha partitë duhet të mbyllin gojën ndaj kësaj situate, qoftë opozita, qoftë partitë e tjera, si të bllokosh ti rrugën nacionale? Aty udhëtojnë njerëz që s'kanë faj. Udhëtoj unë dhe duhet të rri atje pesë orë sa të zhbllokohet. Protestat mund t'i bësh tek ujësjellësi, apo të bërtasësh para Kryeministrisë apo bashkisë, por jo të teket ty dhe të zësh rrugën nacionale.
Si e vlerësoni ju reagimin e Kryeministrit Berisha lidhur me këtë ngjarje?
Unë akoma nuk e kam të qartë këtë qëndrim. Mbase ai do mendohet dhe do ta thotë më vonë. Por diçka ka thënë dhe nuk i ka dhënë rëndësi të madhe për ta politizuar në kulm. Duhet të jemi realistë sado që të jemi opozitarë, ne duhet të themi të vërtetën. Unë opozitar jam, por nuk mund të them që nuk janë ndërtuar rrugë. Nga Durrësi deri në Sarandë dhe më tej janë bërë rrugë që ke dëshirë të kalosh. Gjithashtu edhe rruga e Kombit dhe të tjera që sjellin një zhvillim edhe për turistët, të cilët janë shumuar. Kjo tregon që duhet të ketë rrugë. Ka qenë një politikë e drejtë që prioritet u janë dhënë rrugëve dhe infrastrukturës. Tani duhet të bëhet një goditje e përqendruar dhe duhet të jetë prioritet sigurimi i ujit të pijshëm. Duhen marrë masa nga Qeveria që edhe uji të bëhet si rrugët, sepse nëse do udhëtosh në rrugë, të pihet edhe ujë.
Lidhur me këtë ngjarje ka reaguar edhe Kryepeshkopi Janullatos...
Priftërinjtë dhe kryepriftërinjtë e veshur me petkun fetar nuk duhet të ndërhyjnë fare në çështjet e politikës, sepse më pas bëhen përfaqësues të një ideje të vjetër dhe të lashtë mbi 100- vjeçare. Ata janë tani priftërinj të kohëve moderne, duhet të mos mbeten me kohët e lashta, siç dilnin në kohën e Mesjetës apo të Inkuizicionit. Priftërinjtë nuk i njohin kohët moderne, hiqen si modernë, por janë me një paragjykim që ka zënë myk; që nuk duhet të flasin, sepse nxitet më tepër dhe bëhet një luftë e dyfishtë fetare dhe politike. Dhe gjykojnë pastaj që të gjithë që janë ortodoksë duhet të jenë grekë. Atëherë edhe Pjetrin e Madh të Rusisë, meqenëse ishte ortodoks, duhet ta quajmë grek? Apo patriotin tonë të madh Petro Nini Luarasin ta quajnë grekë, meqë ishte ortodoks? Apo Mihal Gramenon dhe të gjithë të tjerët që luftuan për Shqipërinë? Kurse këtyre u ka rrjedhur mendja dhe mbeten të mbërthyer për politikën.
Mendoni se kjo ngjarje është iniciuar vetëm nga Omonia, apo është e përfshirë edhe Greqia?
Ka përfaqësues nga të gjitha anët. Disa përfaqësues tremben, meqë ne kemi emigrantë në Greqi dhe vende të tjera, tremben se mos ndodh ndonjë gjë që t'i dëmtojë edhe ata. Disa të tjerë janë për çështje të pushtetit politik. Në Greqi konservatorët e përkrahën reagimin, ndërsa përparimtarët nuk e përkrahën. Ky është një rruzull si një lëmsh, që ndonjëherë nuk e di nga të vjen.
A duhet të ketë një rishikim të marrëdhënieve të PS-së me PBDNJ-në pas kësaj ngjarjeje?
Këtë problem nuk e di, sepse nuk jam marrë shumë me këtë anë. Mendoj që edhe Partia Socialiste nuk është dakord me këtë politizim dhe këtë atmosferë.
Duke pasur parasysh këtë tensionim të situatës në Himarë, a është koha që të përsëritet edhe njëherë viti 2000, kur PD dhe PS bënë koalicion për bashkinë e këtij qyteti në zgjedhjet lokale?
Ky është një problem i demokracinë në përgjithësi dhe nuk mund të paragjykosh. Ato janë dëshira të njerëzve dhe nuk mund ta bësh me zor. Por për çështje të mëdha kombëtare duhen bashkuar, pavarësisht se janë të kundërta partitë në pikëpamjet e tyre. Për shembull, ato janë bashkuar për çështjen e Kosovës. Për këto çështje nuk duhen marrë parasysh ndasitë partiake.
Këtu përfshihet edhe Himara?
Patjetër, sepse Himara nuk është minoritet. Ajo është në mes të Shqipërisë, çfarë minoriteti mund të ketë aty?

panorama