Diplomacia shqiptare kundërshton me forcë zërat për cenimin e territorit të Kosovës, duke artikular se Kosova është një shtet i paprekshëm. Zëvendëskryeministri, njëherësh ministri i Jashtëm, Ilir Meta, deklaroi dje se provokimet mbi këtë çështje janë të panevojshme, në një kohë kur Gjykata Ndërkombëtare e Drejtësisë përforcoi legjitimitetin e shtetit të Kosovës.
Sovraniteti dhe integriteti territorial i Kosovës është i paprekshëm dhe i pacenueshëm, ashtu sikurse i çdo vendi tjetër në rajonin tonë. Ndaj, çdo provokim, i cili tenton të vërë në diskutim pikërisht një çështje të tillë, është i panevojshëm. Opinioni i dhënë nga GJND-ja për pavarësinë e Kosovës, veçse përforcoi dhe më tej legjitimitetin", - tha Meta dje në një konferencë për shtyp, duke shtuar se "është koha që të gjithë t'i izolojmë ata elementë ekstremistë, të cilët kërkojnë të vënë në diskutim kufijtë në rajonin e Ballkanit". Kreu i diplomacisë shqiptare u shpreh më tej se Shqipëria nuk ka ndërmend të paraqesë një Rezulotë në OKB për Kosovën, siç është komentuar kohët e fundit. "Çdo pretendim nga ana e Serbisë, sipas pyetjes suaj, se ajo ka qenë e motivuar për paraqitjen e një projekt-rezolute të njëanshme, për shkak se Shqipëria do të paraqiste një rezolutë për Kosovën, absolutisht nuk qëndron. Kjo qoftë edhe për një arsye shumë të thjeshtë, sepse Ambasadori i Serbisë në Tiranë është thirrur me porosinë time këtu në Ministrinë e Punëve të Jashtme, dhe i është bërë e qartë se Shqipëria nuk tenton të paraqesë asnjë Rezolutë në mënyrë të njëanshme dhe se nuk do dëshironte njëkohësisht që edhe Serbia apo kushdo tjetër të paraqiste një Rezolutë të njëanshme në OKB, pasi kjo është rruga më e gabuar për të kontribuar për paqen dhe stabilitetin në rajonin tonë", - shtoi Meta. Ai tha më tej se bashkëpunimi me komunitetin ndërkombëtar "në mënyrë të veçantë me BE-në, ku duam të anëtarësohemi, por edhe me partnerë të tjerë shumë të rëndësishëm dhe vitalë për të ardhmen e paqes dhe stabilitetit të këtij rajoni, siç janë SHBA-të, është i rëndësishëm dhe i domosdoshëm. Ndaj, një pretendim i tillë nuk mundet të qëndrojë edhe për këtë fakt shumë të thjeshtë". Meta iu përgjigj edhe interesimit të gazetarëve. I pyetur nëse i ka dërguar letër sekretares Klinton mbi punën e ish- ambasadorit amerikan në Tiranë, Uidhers, Meta iu përgjigj duke thënë se "nuk merrem me historitë e Kim Filbit. Kim Filbi është një personazh i viteve 50-60, ndaj Kim Filbin mbajeni në bibliotekën tuaj, pasi është personazh interesant".

panorama