Letra
Maxhoranca është plotësisht e hapur të bashkëpunojë me opozitën dhe e gatshme të zbatojmë, së bashku me ju dhe me përpikmëri, rezolutën e Parlamentit Europian, duke e konsideruar atë si interesin më të mirë të vendit. Ndaj dhe dua t'ju siguroj se ne jemi gati të votojmë bashkërisht çdo vendim, marrëveshje, ligj apo procedurë, në përputhje me frymën e këtij dokumenti. Gjithashtu, dua të theksoj edhe një herë se, në Shqipëri ekzistojnë të gjitha procedurat, ligjet dhe institucionet për të bërë, në përputhje me Kushtetutën, transparencën e plotë të çdo dokumenti apo procesi në këtë vend, përfshirë këtu edhe atë të zgjedhjeve të 28 qershorit.
Në këtë kontekst, më lejoni edhe një herë që të përsëris ofertën e paraqitur nga ana ime në emër të maxhorancës.
Maxhoranca është plotësisht dakord për:
1- Amendimin e vendimit nr. 25, të dt. 19.3.2010, për ngritjen e Komisionit Hetimor Parlamentar.
ose
2-Ngritjen nga e para të Komisionit Hetimor Parlamentar për zgjedhjet e 28 qershorit, me një vendim të ri të Parlamentit, në përputhje me ligjin nr. 8891, datë 2.5.2002, "Për organizimin dhe funksionimin e Komisioneve Hetimore Parlamentare", të miratuar në kohën kur qeveriste Partia Socialiste.
Ne jemi dakord që ky komision të kryesohet nga opozita dhe të përbëhet, sipas përcaktimit të ligjit të mësipërm.
Ne biem dakord që opozita të ketë shumicën në çdo votim në këtë komision dhe kjo të realizohet ose duke tërhequr me vendim Parlamenti dy anëtarë të mazhorancës nga Komisioni Hetimor, pas zgjedhjes së tyre sipas ligjit, ose duke i dhënë tri vota Kryetarit të Komisionit, po me vendim Parlamenti.
Komisioni Hetimor Parlamentar të ketë për objekt hetimi materialet zgjedhore si dhe çdo problem tjetër të lidhur me zgjedhjet, përveçse çështjeve për të cilat ka vendime gjykate.
Përtej këtyre, maxhoranca është gjithashtu dakord që:
Opozita të ketë të drejtë ekskluzive për hartimin e të gjitha amendamenteve për zbatimin e rekomandimeve të OSBE/ODHIR për zgjedhjet e ardhshme. Dhe Parlamenti do t'i votojë ato tërësisht, pasi të jetë marrë edhe opinioni i OSBE/ODHIR-it ose i Komisionit të Venecias.
Po në këtë frymë, ne do të mirëpresim të gjitha amendamentet tuaja për ligjet që kërkojnë shumicë të cilësuar me 3/5.
Në propozimet tuaja, ju kërkoni që Komisioni Hetimor të nisë shqyrtimin e materialeve të votimit, ndërkohë që këmbëngulni në rinumërimin e fletëve të votimit dhe për këtë doni që KQZ, pasi të veçojë materialet zgjedhore dhe t'i dërgojë ato në arkiv, të mos djegë fletët e votimit, siç përcaktohet në nenin 178, pika 6 e Kodit Zgjedhor. Pra, me fjalë të tjera, kërkoni haptas që të mos respektohet neni 178, pika 6, i miratuar me konsensus të plotë nga të dyja partitë tona politike. Ju insistoni në këtë qëndrim edhe pasi zoti Rama më datë 22 maj 2010 deklaroi në konferencë shtypi se nuk e pranon pikën 6 të nenit 178. Maxhoranca mendon se zbatimi i ligjeve dhe funksionimi i shtetit ligjor është një ndër kushtet themelore të respektimit të kritereve të Kopenhagenit dhe funksionimit të demokracisë në vende të lira.
Po kështu, siç dihet, vendimi i Gjykatës së Apelit nr. 8 datë, 22.7.2009, në të cilin kjo gjykatë rrëzoi kërkesën tuaj për rinumërimin e votave, është i prerë dhe përfundimtar. Sikundër vendime të Gjykatës Kushtetuese, si: vendimi nr. 18, i vitit 2003, i plotësuar nga vendimet 26 (2006), 20 (2007) dhe 22 (2010), përcaktojnë qartë se këto komisione në objektin e tyre të hetimit nuk mund të hetojnë çështje të juridiksionit të gjykatave dhe se duhet të respektojnë ndarjen e pushteteve. Por nga ana tjetër, vendimi i Gjykatës së Apelit për rinumërimin e votave, mund të ankimohet në Gjykatën e Strasburgut. Një gjë e tillë iu rekomandua opozitës shqiptare nga OSBE/ODIHR-i në Raportin e tij Përfundimtar në zgjedhjet shqiptare të vitit 2001. Po kështu, ju dispononi të gjitha mundësitë ligjore për t'ju drejtuar Gjykatës Kushtetuese, që kjo e fundit, në rast se e gjykon të arsyeshme t'i drejtohet Komisionit të Venecias për të interpretuar vendimet nr. 18 (2003), 29 (2006), 20 (2007) dhe 227 (2010) të saj mbi objektin e Komisioneve Hetimore Parlamentare. Ne e vlerësojmë faktin që ju pranoni që Gjykatës Kushtetuese t'i drejtohen duke zbatuar procedurën kushtetuese. Por ndërkaq propozimi juaj që Gjykatës Kushtetuese t'i caktohet 10 ditë afat nga Parlamenti për të vendosur për t'ju drejtuar ose jo Komisionit të Venecias dhe më pas, përtej këtij afati, Komisionit të Venecias t'i drejtohen Parlamenti, Kryetari i Parlamentit, Presidenti apo Sekretari i Përgjithshëm i Këshillit të Europës, bie ndesh me parimin kushtetues të ndarjes së pushteteve. Vendimet e Gjykatës Kushtetuese janë të prera dhe përfundimtare. Për interpretimin e tyre, Komisionit të Venecias mund t'i drejtohet, në rast se e gjen të arsyeshme, vetëm Gjykata Kushtetuese dhe asnjë nga pushtetet tjera, sikundër Parlamenti, në asnjë rrethanë nuk mund t'i caktojë afate kohore Gjykatës Kushtetuese për shqyrtimin e çështjeve të caktuara. Kushtetuta e vendit dhe ligji i garantojnë kësaj gjykate pavarësi nga pushtetet e tjera.
Prandaj dhe mendojmë që ju të keni të gjithë kohën e nevojshme për të qartësuar në rrugë kushtetuese dhe gjyqësore kërkesën tuaj për rinumërimin e votave dhe jo të kërkoni moszbatimin e ligjit zgjedhor.
Ne propozojmë që sapo të mblidhet Parlamenti, të ngremë Komisionin e ri Hetimor Parlamentar dhe ndërkohë që ju zgjidhni me rrugë kushtetuese gjyqësore çështjen e rinumërimit të votave, ky komision të shqyrtojë një nga një mbi 10 çështjet e tjera, që ju në letrën tuaj pretendoni se duhet të hetohen.
Ju në propozimin tuaj shprehni që numërimi i fletëve të votimit të jetë i pjesshëm, me qëllim që të mos ndryshojë rezultati. Në këtë kontekst dua t'ju rikujtoj se maxhoranca është e gatshme, pasi ju të merrni një vendim pozitiv nga Gjykata e Strasburgut, Gjykata Kushtetuese ose Komisioni i Venecias për rinumërimin e votave, të rinumërojë çdo fletë votimi dhe të ndryshojë çdo rezultat, me kushtin e vetëm që të respektohen parimet themelore kushtetuese, të respektohen institucionet, si kritere kryesore të Kopenhagenit.

panorama