Valentina Madani

Lokalet, Berisha: Vendosim çdo transparencë për opozitën

Kryeministri Sali Berisha siguroi dje opozitën se në zgjedhjet e ardhshme lokale do të vendosë çdo transparencë, e cila do të shmangë kontestimin e rezultatit të tyre. Berisha ftoi opozitën të shqyrtojë mundësinë e votimit elektronik, si një prej rrugëve që e mundëson një gjë të tillë. Gjatë mbledhjes së djeshme të Grupit Parlamentar të PD-së, Berisha lëshon apelin e radhës për opozitën, pikërisht pak çaste para nisjes së sesionit të ri parlamentar, duke e ftuar atë për ngritjen e komisionit hetimor mbi bazën e vullnetit të përbashkët. “Ftoj opozitën të ngremë komisionin në respekt të plotë të Kushtetutës dhe mbi bazën e një vullneti të përbashkët. Për të arritur këtu, do të ndërmarrim çdo proces që dëshiron PS”,- u shpreh Kryeministri. Gjatë mbledhjes, ai u ndal të analizojë edhe zgjedhjet e ardhshme vendore, të cilat, sipas tij, do të jenë zgjedhje të lira, ku numërimi i votave do të bëhet në mënyrë transparente. Sipas Kryeministrit, në zgjedhjet e ardhshme do të vendoset çdo transparencë e kërkuar nga opozita. “Në rast se opozita dëshiron, jemi të gatshëm të angazhojmë të gjitha fondet dhe të vendosim çdo mekanizëm transparent që do të kërkojë”,- thekson Kryeministri. Ai ftoi më tej opozitën të shqyrtojë edhe mundësinë e votimit elektronik, pasi sipas tij, vendi i ka të gjitha mundësitë për të bërë një gjë të tillë.

“Garantoj për procesin më transparent në numërimin e votave, duke aplikuar qoftë edhe teknologjinë më të sigurt të botës. Ftoj opozitën të konsiderojë me seriozitetin më të madh edhe votimin elektronik, mbasi ky vend ka çdo mundësi për të nisur punën tani të hapë 4754 qendra elektronike votimi”,- theksoi z.Berisha. Ai vuri në dukje se zgjedhjet po trokasin dhe se afati i dekretimit dikton shpalljen e datës. “Pra, - tha Berisha, - të kërkojë dhe të gjitha amendimet që dëshiron në Kodin Zgjedhor, t’i përcjellë ato në një nga institucionet ndërkombëtare që dëshiron, ose në Komisionin e Venecias, ose në të dyja, dhe ne t’i votojmë në çdo rrethanë”. Berisha vuri në dukje: “Në rast se opozita dëshiron, ne si qeveri jemi të gatshëm të angazhojmë të gjitha fondet dhe të vendosim çdo mekanizëm transparence që do të kërkojë. Numërimi i zgjedhjeve të shkuara ishte procesi më i paparë ndonjëherë në histori. Aq sa një kryeministër evropian do të më thoshte: Zotëri, ju paskeni pas numërim dhe jo votim, sepse në këtë mënyrë qenka procesi më i paparë ndonjëherë”. “Pra, - u shpreh Kryeministri, - prapë jam dakord si të dëshirojë opozita për transparencë në numërim dhe në çdo gjë, në frymën e mirëkuptimit, të respektit ndaj saj, të detyrimit të mazhorancës për të qenë e hapur, për të bërë kompromis, për koncesione, për të dhënë të gjitha garancitë e duhura opozitës. Unë e ftoj atë të bëjë zgjidhjet më të mira që i interesojnë”, - përfundoi z.Berisha.



standart