Suela Topi

Identifikim të plotë të 300 anëtarëve nënshkrues

Partitë politike duhet të deklarojnë që sot e tutje jo vetëm numrin e plotë të anëtarëve themelues, por dhe të dhënat bazë për ta. Në emër të transparencës, qeveria, me propozim të ministrit të Drejtësisë, ka bërë disa ndryshime në ligjin “Për partitë politike”. Në sajë të këtyre ndryshimeve përcaktohet se partitë politike regjistrohen si të tilla me një kërkesë të nënshkruar me jo më pak se 300 anëtarë themelues, të cilët duhet të identifikohen në mënyrë të plotë. Neni 5 i draftit heq ndihmën prej 100 000 lekësh që u jepej partive politike në momentin e krijimit. Ndërkohë që rregullohen dhe më mirë marrëdhëniet me shtetin për sa i përket marrjes së ndërtesave ku ngrihet selia e këtyre subjekteve politike.[/size]

Ndryshimet në ligj

[size=9]Ministri i Drejtësisë nëpërmjet ndryshimeve në ligjin “Për partitë politike” shton në të dhënat që duhet të deklarojë çdo parti dhe numrin e anëtarëve themelues. Në nenin dy të tij, i cili ndryshon nenin 10 të ligjit bazë, përcaktohet gjithashtu se anëtarët themelues duhet të identifikohen me emër, mbiemër, numrin personal dhe vendbanimin, çka nuk parashikohej në ligjin ekzistues. Në këtë mënyrë, elementeve të kërkesës për regjistrimin e partive politike, krahas nënshkrimit të anëtarëve themelues u shtohen dhe këto komponente shtesë, me qëllim rritjen e transparencës për të dhënat e anëtarëve themelues. Ndërkohë që neni katër shfuqizon nenin 18 të ligjit bazë. Në të parashikohej se “Shteti ndihmon materialisht partitë politike në kohën e krijimit të tyre. Ndihma jepet menjëherë pas regjistrimit dhe është 100 000 lekë”. Ndërkohë që neni 5 dhe 6 ndryshojnë nenin 22 të ligjit bazë duke bërë dhe një shtesë 22/1 në të. Ky paragraf shtesë përcakton autoritetet dhe procedurat me të cilat shteti pajis partitë parlamentare me ndërtesa apo u paguan qiranë. Aty saktësohet se, nëse një ndërtesë është në administrim të pushtetit qendror, partitë politike duhet të paraqesin kërkesë te ministri i Brendshëm. Ndërsa, nëse është në administrimin të pushtetit vendor, kërkesa bëhet tek kryetari i bashkisë. Kur gjenden ndërtesa të lira, lidhet kontrata e huapërdorjes me partitë politike. Kur nuk ka ndërtesa të lira, Ministria e Financave merr përsipër pagesën e qirasë të selisë qendrore dhe zyrave vendore të partive politike. Kontrata e huapërdorjes apo pagimi i qirasë zgjat për sa kohë që partitë politike ushtrojnë veprimtari parlamentare. Nëse ato nuk janë pjesë e kuvendit, këto kontrata prishen menjëherë. Rregullat e plota për procedurën e administrimit apo shqyrtimit të kërkesës, mënyrën e pagesës apo numrin e ndërtesave për zyrat vendore dhe për kufijtë maksimalë të qirasë përcaktohen me vendim të Qeverisë. Ndërkohë që neni 7 i projektligji përcakton se Agjencia e Inventarizimit dhe Transferimit të pronave publike kryen inventarizimin e pronave të paluajtshme që u janë dhënë partive politike si dhe identifikon marrëdhëniet juridike të përcaktuara me shtetin.

standart