Tiranë – Administrata tatimore prej dy ditësh po shqyrton disa variante për zbutjen e çmimit të kasës fiskale vetëm për bizneset që operojnë në tregjet e hapura.
Dje u zhvillua një mbledhje në Drejtorinë e Përgjithshme të Tatimeve, ku pas diskutimeve u arrit në disa variante për sistemin e ri të kasës dhe çmimet e ndryshuara.

Një variant është krijimi i një lloj kase të vetme për bizneset e vogla, duke u qëndruar kushteve kryesore të transmetimit të të dhënave në rrjet. Kjo lloj kase do t’u përshtatet vetëm tregtarëve të lirë dhe do të shitet me një çmim më të ulët se aktuali.

Alternativa e dytë janë kasat e shitura para një viti, të cilat dolën jashtë përdorimit dhe nuk i përputheshin me vendimet e qeverisë për transmetimin e të dhënave. Këto lloj kasash janë blerë nga shumë tregtarë, dhe në mënyrë që të mos ketë kosto shtesë, propozohet që të negociohet me shoqëritë e autorizuara për adaptimin e kasës sipas modelit të ri.

Varianti i tretë lidhet me shpenzimin e kryer për pajisjen fiskale, i cili do t’i njihet subjektit në bilancin vjetor, duke reduktuar në një farë mënyre normën e detyrimit tatimor.

Një tjetër variant lidhet me mundësinë e rishikimit të TVSH-së, norma e të cilit është 20 për qind. Një përjashtim i kësaj takse te pajisja fiskale e ul automatikisht çmimin. Këtë propozim e ka mbështetur edhe vetë kryeministri Sali Berisha, duke e bërë variantin më të mundshëm për tu realizuar.

Megjithatë, tatimet sqarojnë se opsioni më i mundshëm është krijimi i një kase të posaçme vetëm për subjektet e vogla që shesin në tregjet e hapura, ndërsa për të tjerët do të vijohet të aplikohet sistemi i gjobave.
start