Suela Topi

Mbledhja, Braçe kërkon reformë në buxhetin e Kuvendit. Patozi: Hetoni, por një komision nuk mund të bëjë reformë buxhetore

Opozita e majtë, përmes shpjegimeve të dhëna në debatin me dyer të mbyllura në Konferencën e Kryetarëve, ka kërkuar jo hetim, por një reformë të buxhetit të Kuvendit. Deputeti i PS-së, Erion Braçe, ka bërë të ditur se qëllimi i ngritjes së komisionit hetimor synon funksionimin e Kuvendit përmes një reforme të re buxhetore. Por kreu i grupit parlamentar të PD-së, Astrit Patozi, e ka kundërshtuar Braçen, duke i thënë se për një reformë të tillë buxhetore nuk mund të ngrihet një komision i tillë hetimor parlamentar. Gazeta ka mundur të zbardhë debatin në Konferencën e Kryetarëve lidhur me ngritjen e komisionit hetimor për punimet e Kuvendit duke siguruar procesverbalin e plotë të kësaj mbledhjeje, ku është debatuar gjatë lidhur me objektin e hetimit të komisionit. Mazhoranca ka kërkuar saktësim të këtij objekti, duke përcaktuar se çfarë do të hetohet ndërsa opozita dhe anëtarët e PS-së, Braçe dhe Dokle, kanë mbrojtur idenë se po keqmenaxhohen paratë e Parlamentit, ndaj ky komision do të nxjerrë abuzimet. Por anëtarët e mazhorancës i akuzuan ata për mungesë faktesh, të cilat ende opozita nuk është e qartë nëse i disponon apo jo përgjatë 4 muajve që do të hetojë komisioni parlamentar.



PROCESVERBAL

datë 15.3.2011, ora 14:30

Drejton mbledhjen

Jozefina Çoba Topalli – Kryetare Kuvendi

Rendi i ditës:

Shqyrtimi i kërkesës së një grupi prej 35 deputetësh për ngritjen e një komisioni hetimor të Kuvendit për hetimin e drejtimit dhe të veprimtarisë së organeve drejtuese dhe shërbimeve të Kuvendit, për periudhën shtator 2005 - dhjetor 2010.

Miratimi i programit të punës së Kuvendit për periudhën 21 mars - 19 maj 2011.

Miratimi i kalendarit trejavor të punës së Kuvendit për periudhën 21 mars - 7 prill 2011

Të pranishëm:

Znj. Jozefina TOPALLI, Kryetare Kuvendi, z. Astrit PATOZI, kryetar i grupit parlamentar të Partisë Demokratike, z. Ardian TURKU, Zëvendëskryetar Kuvendi, z. Vangjel TAVO, zëvendëskryetar Kuvendi, z. Erion BRAÇE, nënkryetar i grupit parlamentar të Partisë Socialiste, z. Namik DOKLE, zëvendëskryetar Kuvendi, z. Genc POLLO, zëvendëskryeministër

Mungojnë: Z. Lefter KOKA, kryetar i grupit parlamentar Lëvizja Socialiste për Integrim.

Të ftuar: Kryetarët e komisioneve të përhershme parlamentare: z. Ilir Rusmali, z. Fatos Beja, z. Jemin Gjana, znj. Ermelinda Meksi.

Mungojnë: z. Leonard Demi, znj. Valentina Leskaj, z. Edmond Spaho, z. Ethem Ruka.

Hapet mbledhja

Jozefina Topalli – Mirëdita! Sot kemi thirrur këtë mbledhje të Konferencës së Kryetarëve me dy pika të rendit të ditës. Pika e parë e rendit të ditës është një kërkesë e dorëzuar nga Partia Socialiste për ngritjen e një komisioni hetimor të Kuvendit për hetimin e drejtimit dhe veprimtarisë së organeve drejtuese dhe shërbimeve të Kuvendit për periudhën kalendari i punimeve të Kuvendit.

Fillojmë me pikën e parë të rendit të ditës. Kërkesa është dorëzuar më 11.3.2011 dhe, megjithëse kanë qenë ditë pushimi, unë mendova t’i qëndrojmë ligjit “Për ngritjen e komisioneve hetimore”. Fillojmë që sot diskutimin e kësaj kërkese të depozituar. Nuk e di nëse të gjithë kanë pasur kohë ta lexojnë dhe cili është mendimi i tyre. Kush e dëshiron fjalën? Fjalën e ka zoti Patozi.

Astrit Patozi – Faleminderit, zonja Kryetare!

Në lidhje me kërkesën e grupit parlamentar të Partisë Socialiste për ngritjen e një komisioni hetimor, unë nuk mund të them se jam futur thellë në përmbajtjen e kësaj kërkese, por në një vështrim përciptazi edhe për shkak të kohës së kufizuar, mund të them se ne parimisht jemi plotësisht dakord që të respektohen të gjitha nenet e Rregullores së Kuvendit dhe të ligjit “Për krijimin dhe organizimin e komisioneve hetimore të Kuvendit”, pra që seanca e së enjtes të shqyrtojë këtë kërkesë, por paraprakisht më duhet të shpreh disa rezerva që vihen re në një vështrim të përciptë që unë i bëra kësaj kërkese. Kolegët nënshkrues të kësaj kërkese duhet të kishin parasysh aspektin formalo-juridik, sepse është evidente që ka disa probleme. Së pari, ka një mospërputhje shumë të qartë mes relacionit që shoqëron kërkesën dhe vetë vendimit të Kuvendit.

Së dyti, ka një problem lidhur me përbërjen e anëtarëve të këtij komisioni hetimor për sa i përket palës së opozitës, pasi ka anëtarë që janë në konflikt interesi me objektin e këtij komisioni hetimor. Kjo gjë duhet të modifikohet përpara se të shkojmë në seancë.

Do të ftoja grupin parlamentar të Partisë Socialiste që këtë kërkesë për këtë komision hetimor, për të cilin ne jemi parimisht dakord, ta përshtaste në përputhje me Kushtetutën dhe me vendimet e Gjykatës Kushtetuese dhe me ligjet e tjera të vendit, që ne të mos kemi asnjë problematikë gjatë shqyrtimit të kësaj seancë, por ta miratojmë atë njëzëri. Po kështu, në përgjigje të kërkesave të ligjit “Për organizimin e komisioneve hetimore” jemi të gatshëm që sot të paraqesim listën e anëtarëve të komisionit që do t’i përkasin mazhorancës, e cila, sigurisht, do të ketë shumicën në këtë komision. Unë nuk kam pasur kohë ta firmos, por mund t’i paraqes këtu në këtë konferencë dhe i quajmë të miratuara.

Anëtarët e komisionit nga mazhoranca janë: Jemin Gjana – nënkryetar, Edi Paloka – anëtar, Fatos Beja – anëtar, Paulina Hoti – anëtare, Viktor Gumi – anëtar, Edmond Spaho – anëtar.

Jozefina Topalli – Faleminderit! Fjalën e ka zoti Beja.

Fatos Beja – Duke falënderuar kryetarin e grupit për propozimin dhe unë e kuptoj pse, por aktualisht jam anëtar i një komisioni hetimor, kështu që nuk do të ishte oportune të merrja pjesë në një komision tjetër. Nëse mundet, le të zëvendësohem me dikë tjetër.

Jozefina Topalli – Kush e do fjalën? Fjalën e ka zoti Gjana.

Jemin Gjana – Edhe nëse emri im nuk do të ishte, edhe pse është, do të desha t’i bashkëngjitem asaj që shtroi këtu zoti Patozi, sepse kështu siç është hartuar kjo kërkesë, i bie që të na lini të lirë për 2 vjet dhe të mos merremi me gjë tjetër. Mua më duhet të lë çdo punë tjetër, të mos merrem me asgjë dhe të merrem me atë komision. Nuk e di nëse do t’ia dal dot që bashkë me kolegët të mund të merrem me këto tani. Do të hetojmë ndonjë gjë konkrete?

Nëse keni merak se janë shitur keq makinat, hajde të hetojmë. Të hetohet një çështje konkrete, por duhet të keni edhe ndonjë të dhënë, do të keni një dyshim paraprak për t’u vërtetuar një fakt ose disa grupe faktesh, por kështu siç janë shkruar gjërat, nuk e di si do të vendosim në seancë për ta miratuar. Domethënë, është futur i gjithë stafi dhe kanë mbetur jashtë vetëm rojet e Kuvendit nëse ata lënë ose jo njerëz për të hyrë ose për të dalë nga Kuvendi sipas rregullores dhe çdo gjë tjetër duhet të kalojë në një sitë në një komision që do të punoj dy muaj. Është normale që ne të kontrollojmë aktivitetin e çdo lloj institucioni, të kontrollojmë edhe vetveten, por nëse duam që të bëjmë kontroll për të bërë show, është gjë tjetër. Kështu siç e keni shkruar, gjërat janë renditur në një mënyrë të tillë që të merremi me çfarë të duam, të flasim për çfarë të duam dhe të jemi brenda objektit të komisionit. Megjithatë, ka kohë deri në ditën e caktuar. E kam shumë seriozisht. Për mua mënyra e të shkruarit të objektit nuk ka sens.

Jozefina Topalli – Fjalën e ka zoti Dokle.

Namik Dokle – Së pari, unë vlerësoj faktin që kryetari i grupit parlamentar të mazhorancës parimisht është dakord për ngritjen e këtij komisioni. Për ndonjë nga meraket dhe rezervat që ka, mund të bisedohet me përfaqësuesin e grupit tonë, nëse mund të bëhet ndonjë korrigjim. Për merakun që ka zoti Gjana, nuk është problemi nëse thuhet atje për makinat: do të kontrollohen të gjitha makinat. Kjo bëhet me sondim për ato gjëra që janë problematike, sepse në 100 gjëra që mund të ketë njëri nga problemet, dy janë problematike dhe 98 janë të zgjidhura. Synimi i këtij komisioni për ne nuk është thjesht të kontrollojmë, por një synim pak më tutje, ai bëhet për të ndryshuar disa gjëra në funksionimin e Kuvendit, si për shembull, nëse marrim çështjen e buxhetit, sot komisionet e Parlamentit tonë janë pa buxhet. Ato nuk dinë se çfarë mund të bëjnë me pjesën e buxhetit që i takon për të bërë sondazhe, për të zhvilluar kontakte me grupe interesi, apo për problematika që i interesojnë komisionit, me qëllim që komisionet të funksionojnë në një mënyrë racionale dhe jo të shtrënguar brenda hekurave të një buxheti, i cili nuk i jep hapësirë çdo deputeti dhe në mënyrë të veçantë komisioneve parlamentare. Problematikat që ne kemi parashtruar janë ato që na shqetësojnë, ndërsa për elementet konkrete të kësaj apo asaj, ato bëhen në bazë të programit, në momentin që komisioni fillon funksionin. Bëhet programi dhe thuhet: “Për këtë problem do të kontrollojmë këto elemente, për një problem tjetër ato elemente”. Nuk ka nevojë të shkojë 4 vjet kjo punë. Mua më duket se edhe 4 muaj janë shumë. Kjo punë mund të mbarohet shumë më shpejt me vullnet të mirë të të gjitha palëve.

Jemin Gjana – Keni futur hetimin në komisionet parlamentare, sepse keni thënë: “Zbatimi i kërkesave për respektimin e procedurave në shqyrtimin e projektligjeve, në seancën plenare, si edhe në komisione”. Kur thoni: “Do të shqyrtojë procedurën e hartimit të projektligjeve”, do të thotë që do të shqyrtoni këdo që merret me këto çështje. Unë shikoj një objekt kaq të stërmadh, sa nuk e di sesi do t’i dilet kësaj gjëje, sepse siç thotë zoti Fatos: “Të merremi dhe të tjerremi me njëri-tjetrin”. Te germa “e” thoni: “Hetim i funksionimit të stafit të Kuvendit”. Projektligjet nuk i shqyrton stafi.

Jozefina Topalli – Fjalën e ka zoti Braçe.

Erion Braçe – Zoti Gjana, unë doja që të sqaroja që në krye të herës që ky komision nuk ka karakter personal. Ai nuk i adresohet veprimtarisë së ndonjë prej deputetëve të Kuvendit dhe aq më tepër drejtuesve të Kuvendit. Qëllimi është shprehur fare qartë në relacion. Ne synojmë që t’i propozojmë këtij Kuvendi një reformë të thellë të mënyrës së buxhetimit, si edhe të financimit të Kuvendit të Republikës së Shqipërisë. Që sot gjithsecili prej nesh e shikon me sytë e tij se çfarë nuk funksionon dhe gjithsecili prej nesh mund të ketë propozimet e tij se si mund të bëhet më mirë kjo punë. Ne duam që të shikojmë, të hetojmë dhe në fund të propozojmë se si duhet të financohet veprimtaria e Kuvendit. Sot në gjykimin tonë financohet thjesht dhe vetëm rroga e deputetit, sigurimet shoqërore të tij, sigurimet shëndetësore apo diçka më tepër. Ne duam që këto para publike që jepen, jo vetëm të financojnë funksionet bazë të deputetit, të komisioneve, pastaj të gjithë institucionit, por njëherësh të jenë transparente për publikun, sepse për hir të së vërtetës ka shumë fjalë që i adresohen deputetëve si spekulantë, si njerëz që marrin para pa fund, që harxhojnë pa hesap paratë e publikut dhe ky nam ka rënë mbi secilin prej nesh. Pra, çfarë synojmë ne me anë të këtij komisioni? Ne synojmë të shohim se si funksionon Kuvendi dhe të propozojmë atë që e bën më funksional Kuvendin e Republikës së Shqipërisë, duke financuar drejtpërdrejt deputetin dhe që këto financime të jenë drejtpërdrejt transparente. Së dyti, ka disa elemente tek objekti, të cilat janë shqetësim për secilin prej nesh. Integriteti i sistemit të votimit elektronik në Kuvend është një prej tyre. Ka pasur një problematikë të herëpashershme, rregullorja ka ndryshuar disa herë dhe tani ka ardhur momenti që të paktën ne të opozitës të kemi dijeninë se si ruhet integriteti i këtij sistemi. A është i vlefshëm ky sistem apo jo? Mora thjesht dy pika që lidhen me objektin. Historia apo hetimi nuk shkojnë me atë për të cilën folëm qëparë, pra me mënyrën se si miratohen ligjet nëpër komisione etj. Ne na intereson të dimë nëse do të financohet ky lloj shërbimi në Kuvend apo jo, si dhe si do të financohet, me qëllim që ky aspekt i punës së Kuvendit të Republikës së Shqipërisë të jetë sa më transparent, sa më gjithëpërfshirës dhe të ofrojë mundësinë e kontaktit me të gjitha grupet e interesit, qofshin kur ato kërkohen nga opozita, qofshin kur kërkohen nga mazhoranca. Por jo në aspektin nëse një komision e zbaton rregulloren kur shqyrton projektligjin apo jo, sepse është krejt normale që nuk do të hetojmë kolegët tanë, drejtues komisionesh apo pjesëmarrës në to. Nuk është ky synimi.

Faleminderit!

Jozefina Topalli – Dakord! Kush e dëshiron fjalën?

Jemin Gjana – Unë e kam shumë seriozisht shqetësimin tim. Kam punuar gjatë nëpër komisione dhe në administratën shtetërore para dhe pas viteve ‘90. A e dini se çfarë do të thotë të kontrollosh zbatimin e buxhetit për 7-8 vjet? Sigurisht që zbatimi i buxhetit do të kontrollohet. Unë nuk mund të them që të kontrollohet viti 2009 pa leje. Le të vendosim në objekt kontrollin e zbatimit të buxhetit të viteve 2005, 2006, 2007, 2008, 2009, 2010 dhe 2011, se viti 2010 ka të bëjë me vendimet që janë marrë për vitin 2011. KLSH-ja që është një institucion me 200 vetë dhe, kur shkon të kontrollojë një institucion, kontrollon buxhetin e një viti, madje edhe atë me zgjedhje. Dakord, e bëjmë komisionin po të doni. Këtu thuhet: “zbatimin e detyrave”, domethënë si i ka zbatuar stafi detyrat për ndarjen. Ndarja e diskutimit të projektligjeve në komisione vendoset këtu. Ju fusni për të analizuar aktivitetin e Konferencës së Kryetarëve. Këtu është marrë vendim, zotërinj. Është çuar në seancë dhe është miratuar. Ndarja e punës së komisioneve bëhet në Konferencën e Kryetarëve dhe në seancë plenare, dhe çështja mbyllet me kaq. Unë nuk kam të dhëna dhe nuk e di se për cilin buxhet bëhet fjalë që të mund të veproj.

Namik Dokle – I vlerësoj të gjitha diskutimet e kolegëve. Zoti Gjana nuk ka pse të përsërisë fjalën “e kam seriozisht”, sepse ne e kuptojmë që e ka seriozisht dhe jo vetëm ai, por edhe ne e kemi po aq seriozisht, sepse këtë kërkesë e kemi bërë bazuar në Kushtetutë dhe në ligj. Për sa u përket elementeve që bëjnë krahasimin e Kontrollit të Lartë të Shtetit me komisionin hetimor, mund t’ju them se ne nuk jemi Kontrolli i Lartë i Shtetit dhe as nuk duam të bëhemi si ai, por duam të shqyrtojmë disa nga shqetësimet që kanë lindur për të përmirësuar punën e Kuvendit. Zoti Braçe jua tha që ne synojmë t’i propozojmë Kuvendit një reformë të buxhetimit. Për sa u përket kalendarëve trejavorë, ne s’kemi ndërmend të merremi me ta...

Jozefina Topalli – Urdhëroni, zoti Patozi!

Astrit Patozi – Që në fillim të fjalës sime kam shprehur vullnetin e mazhorancës për të qenë dakord në parim për ngritjen e një komisioni hetimor, si instrument i opozitës për të kontrolluar veprimtarinë e institucioneve të ndryshme. Që në fillim të fjalës sime thashë që u bëj ftesë kolegëve të opozitës që ta përputhin kërkesën e tyre me Kushtetutën, me ligjet, me rregulloren dhe me gjithçka tjetër. Tani që dëgjova shpjegimet e përfaqësuesve të opozitës e përforcoj mendimin tim dhe nuk gjej asnjë arsye, se për të bërë një reformë të brendshme në Kuvendin e Shqipërisë duhet të ngrihet patjetër një komision hetimor. Kështu siç e shoh unë, pa pasur asnjë provë, pa asnjë fakt dhe pa asnjë grup-fakt, ne ngremë një komision hetimor. Unë besoj se me këtë kërkesë mund të hetohet si në parlamentin gjerman, si në parlamentin francez, si në parlamentin anglez, sepse nuk ka çështje. Çfarë ndryshimi ka që të thuhet në vitin 2005 dhe në vitin 2011 dhe nuk kontrollohet me këtë kërkesë Parlamenti i Zogut, sepse këtu nuk jepen fakte që të ketë çështje për të ngritur një hetim dhe më pas ky hetim na çon në një reformë. Pra, ju në fillim kapeni te reforma. Ju kërkoni reformën, por kush ia ka mohuar të drejtën opozitës që këtë reformë ta kërkojë me mjete të tjera? Pse duhet që patjetër ta kërkojë me komision hetimor?

(Diskutime në sallë.) Ne e respektojmë të drejtën tuaj.

Po ju bëj me dije që ju nuk mund të keni në dorë një instrument në shkelje të Kushtetutës dhe të ligjeve të vendit. Ne nuk mund t’iu mbivendosemi institucioneve të tjera si Parlament. Ju flisni për atributet e Byrosë së Kuvendit, flisni që doni t’i ndryshoni. Trajtojini në Byro, kur të vini atje! Ju flisni për atribute të Sekretariatit për Buxhetin. Trajtojeni në sekretariatin për buxhetin! Në Sekretariatin e Buxhetit, që ju kërkoni të hetoni, keni vënë si anëtar Erion Braçen dhe i bie që po ky të kontrollojë veten. Pra, Erion Braçe si anëtar, kontrollon Erion Braçen, si bashkëkryetar. Këto janë probleme që unë besoj se ju duhet t’i rishikoni. Kjo është ftesa jonë. Bëjeni kërkesën e përputhshme, që të mos kemi asnjë minutë debat!

Jozefina Topalli – Faleminderit! Po, zoti Braçe.

Erion Braçe – Për hir të së vërtetës, që nga muaji shkurt i vitit që shkoi, kur ne hymë në Parlamentin e Shqipërisë dhe në të gjithë muajit në vijim, Parlamenti ka ndërmarrë nisma të tilla. Pra, ka përdorur fuqinë e tij për të ndryshuar instrumentet e buxhetimit të Parlamentit, atë të ndarjes së parave apo të financimit. Ka përdorur fuqinë e tij për të ndryshuar instrumente të Rregullores në Kuvend. Të paktën, për këto të dyja, opozita nuk është konsideruar, nuk është marrë mendimi i saj dhe as është përfillur opinioni i saj. Ndryshimet janë bërë në mënyrë të njëanshme, madje disa herë edhe pa prezencën e opozitës, madje edhe kur opozita ka kundërshtuar. E para. Së dyti, për integritetin e sistemit elektronik asnjëri prej nesh nuk ka dijeni se si funksionon sistemi, përveç disa elementeve që na janë vendosur në tavolinat tona. Mua më ka bërë përshtypje një prej elementeve që normalisht i jepte integritet të gjithë sistemit: ndalonte që unë të votoja për zotin Dokle apo zoti Dokle për Kryetaren e Kuvendit. Nga një seri provash që kemi, sidomos gjatë 3-4 seancave të fundit, integriteti i këtij sistemi është cenuar totalisht. Po flas për votimin e hapur. Askush prej nesh nuk është në gjendje të thotë një gjë të tillë për votimin e fshehtë elektronik, sepse nuk di se si funksionon. Unë nuk jam specialist i asaj fushe, prandaj njëri prej kolegëve, i cili është specialist i asaj fushe, në komision do të mësojë gjithsecilin prej nesh sesi funksion. Në rast se sistemit i mungon integriteti, do të bëjmë ç’është e mundur që t’i rikthehet integriteti me instrumente të ndryshme, qoftë edhe teknologjike. Shpresojmë që të jetë transparent dhe i kontrollueshëm nga secili prej deputetëve. Këto janë arsyet.

Jozefina Topalli – Po, zoti Rusmali, urdhëroni!

Ilir Rusmali – Zonja Kryetare, tani mund të bëj diskutimin tim. Unë besoj se ky instrument është më garantues për opozitën, jam plotësisht dakord me zotin Braçe, por unë di gjithashtu që ky instrument mund të zhvillohet vetëm në konturin e vet kushtetues, jo jashtë konturit kushtetues. Nuk ekziston mundësia as të merret nisma dhe as të miratohet ajo nga Kuvendi kur instrumenti është jashtë konturit kushtetues. Ky është kufizimi i madh që ka ky instrument garantues. Për sa kohë është ashtu dhe për sa kohë që kolegët e opozitës kanë pafundësisht zgjidhje alternative në dispozicion për të realizuar atë qëllim që kanë deklaruar këtu, unë do t’i kërkoja Konferencës së Kryetarëve, pse jo edhe Parlamentit, që të jetë shumë strikt në verifikimin e kontekstit kushtetues të kësaj nisme. Kjo nismë jashtë kontekstit kushtetues nuk zhvillohet dot, sepse instrumenti garantues e ndalon një gjë të tillë, prandaj do t’i bëja thirrje këtu në Konferencë, por edhe në Parlament që të verifikohet me rreptësi konturi kushtetues në të cilin zhvillohet kjo nismë. Unë kam dilema të mëdha për konturin kushtetues.

Jozefina Topalli – Faleminderit! Fjalën e ka zoti Dokle.

Namik Dokle – Nuk duhet ta banalizojmë çështjen, se po të jetë e nevojshme të ulim çmimin e kosit, blejmë një lopë e mjelim dhe e ulim kësisoj çmimin e tij. Por nuk është ky shqetësimi i opozitës. Pra, ju kërkoj të mos e banalizoni, të mos e paragjykoni çështjen. Ne kemi këto shqetësime që i shtrojmë këtu dhe instrumenti që ne kemi përzgjedhur është ngritja e komisionit hetimor. Ju nuk doni, prandaj votoni “kundër” dhe kaq.

Jozefina Topalli – Faleminderit, zoti Dokle!

Besoj se nuk është rasti për të demaskuar askënd, sepse të gjithë janë të interesuar për të ecur përpara, për të mos bllokuar asgjë. Unë bie dakord me zotin Patozi, i cili kërkon plotësimin e kritereve formale dhe juridike. Ju kërkoj që relacionit t’i shikonit disa gjëra, që të bëni përputhjen me projektin. Pra, siç e keni projektin duhet të bëni dhe relacionin, se janë dy gjëra që nuk shkojnë. Shikoni, nëse ka konflikt interesi midis anëtarëve! Gjykojeni vetë! Kjo është për pikëpamjen formale juridike. Për sa i përket përmbajtjes, aty nuk hyn Konferenca e Kryetarëve. Ju, zoti Patozi, dorëzoni emrat që keni për komisionin! Në parim nuk është asnjë kundër.

Jozefina Topalli – Atëherë, e mbyllim pikën e parë. Nga pikëpamja formalo-juridike, ju lutem bëni rregullimet që duhen; nga pikëpamja e përmbajtjes, duhet të jetë në përputhje me Kushtetutën dhe këtu nuk besoj se ndonjëri është kundër përputhjes me Kushtetutën dhe me vendimet e Gjykatës Kushtetuese. Ne kemi pasur një problem gjatë kësaj periudhe. Sekretariatet, me përjashtim të Sekretariatit të Votimit, nuk janë mbledhur dhe nuk kanë funksionuar dhe ky është një problem. Unë do t’i kërkoja edhe kryetarit të grupit të PD-së, por edhe përfaqësuesve të PS-së që ta shohin me seriozitet këtë problem. Ka disa kohë që unë i kam kërkuar OSBE-së të më japë job description-in, bashkë me administratën, në mënyrë që të na ndihmojnë t’i bëjmë eficentë edhe sekretariatet dhe, mundësisht, t’i çojmë deri në nivelin e komisioneve parlamentare. Deri tani nuk ia kemi arritur. I kam kërkuar, meqë është mbyllur marrëveshja me OSBE-në, që të vazhdojnë dhe nëse gjejmë financime, kjo do të jetë një ndër prioritetet kryesore për të bërë job description të sekretariateve. Nuk ka funksionuar Sekretariati për Buxhetin, as ai për Marrëdhëniet me Jashtë. Nuk është mbledhur asnjëherë Sekretariati për Bibliotekën dhe Botimet. Ka funksionuar vetëm Sekretariati për Votimin dhe Rregulloren. Ky është një defekt i madh, ndaj edhe u kërkoj të dy kryetarëve të grupeve që t’u kërkojnë deputetëve të mblidhen. Unë e di që kanë vështirësi, se kur nuk ka akte nënligjore, mund të shmangesh më kollaj, por kjo është një detyrë që duhet bërë.

Kalojmë te pika e dytë: Programi dhe kalendari.



standart