Afrim Imaj

Kur ishte kryetar i degës së Peshkopisë mbushi burgun e Idrizovës me zbuluesit atdhetar që punonin në ilegalitet”. Dëshmia ka për autor një nga bashkëvuajtësit e këtij kampi famëkeq. Idriz Lleshi pas shumë vitesh ka pritur procesin gjyqësor të krerëve të Sigurimit për të rrëfyer enigmën që e ka munduar një jetë të tërë. Ai sjell përpara trupit gjykues ngjarje tronditëse nga ferri i UDB-së në Maqedoni, duke përshkruar me detaje dramën e shqiptarëve të kryqëzuar vetëm se kishin raportuar te sigurimi i shtetit përpjekjet e autoriteteve jugosllave për të destabilizuar situatën në Shqipëri. Siç pohon dëshmitari Lleshi, mjaft nga të dënuarit e Idrizovës, i kanë treguar se kanë përfunduar aty menjëherë pas takimeve me Feçor Shehun në zonën kufitare. Ballafaqimi i tij me njeriun që në atë periudhë ka bërë detyrën e kreut të sigurimit për zonën e Dibrës, mbyllet me një mohim kategorik të Feçor Shehut, i cili nuk pranon kurrsesi një akuzë të tillë, që sipas tij është e montuar me qëllime dashakeqe. Në vijim seanca procedon me dialogët e prokurorit Rrapi Mino me të pandehurin Feçor Shehu. Rihapet sërish historia e penalizimit të mjeshtrit të arenës Telat Agolli, të cilën kreu i akuzës e vlerëson si një ndëshkim arbitrar të Feçor Shehut në hakmarrje të refuzimit që i bëri Agolli ofertës për t’u bërë bashkëpunëtor i UDB-së…
ARANIT ÇELA: Idriz Lleshi. Ty të kemi thirrur si dëshmitar për çështjen që po shqyrtohet këtu dhe që u përket të pandehurve Kadri Hazbiu, Feçor Shehu, Llambi Peçini, Gani Kodra, Ali Çeno, Mihallaq Ziçishti dhe Xhavit Ismailaga. I njeh këta ti?...
IDRIZ LLESHI: Feçorin e kam takuar një herë, këta të tjerët nuk i njoh...
ARANIT ÇELA: Ty tashti të kemi thirrur si dëshmitar lidhur me një dëshmi që ke bërë në hetuesi dhe që ka të bëjë me një takimin tënd me Jonuz Majtarën. Na i shpjego këtë...
IDRIZ LLESHI: Unë jam dënuar nga gjykata jugosllave në vitin 1950, pasi ika nga internimi për të ardhur në Shqipëri, mirë por jugosllavët arritën të më zbulojnë dhe më kapën dhe më dënuan 3 vjet në burg, të cilat i vuajta në burgun e Idrizovës...
ARANIT ÇELA: Ku është ky burgu i Idrizovës?...
IDRIZ LLESHI: Në drejtim të rrjedhës së Vardarit në Shkup, 15 km në drejtim të Vardarit në Shkup, është burgu qendror për Republikën e Maqedonisë dhe për krahinën autonome të Kosovës, atje është dhe pjesa dërmuese e shqiptarëve të grumbulluar. Këtu në kampin e Idrizovës kishte mjaft shqiptarë, ndërsa të burgosurit që përmenda, 75 burra dhe 2 gra. Gratë i liruan jugosllavët, ndërsa burrat pjesën dërmuese i dënuan. Një nga këta të dënuar ishte dhe Jonus Majtara, i cili erdhi në Idrizovë bashkë me babanë tim. Në vitin 1952, UDB-ja jugosllave në Ministrinë e Brendshme të Maqedonisë grumbullonte të burgosurit politikë për ti çuar në Godi Otoko. Mirë, po ne ishim të burgosur e nuk dinim çfarë veprime kryenin. Ata erdhën edhe thanë të gjithë të burgosurit politikë, ata që janë të dënuar për Inforbyro, do të qëndrojnë poshtë, të tjerët i ngjitën dhe i mbyllën nëpër dhoma, pastaj na thanë që do të na çonin në kamp tjetër, i cili ishte përcaktuar për ata që ishin në Inforbyro. Edhe ju, thanë do të shkoni atje, shqiptarë dhe jo shqiptarë. I pyetën të gjithë me radhë, sa kohë kanë mbajtur dënim dhe sa kohë kanë për të bërë. Ndër të tjera më erdhi radha dhe mua. Sa je dënuar, më thanë. Isha më i riu i burgosur 17 vjeç the në atë kohë isha mjaftë i ri. U thashë se jam dënuar 3 vjet, kam bërë dy vjet kam dhe një vit, u thashë. Largohu, më thanë mua, merr plaçkat dhe largohu më thanë. Pasi përfundoi kjo bisedë me ata sigurisht priteshin makina të vinin e të na transportonin. Në kohën që po prisnim për të na transportuar, duke ecur aty më thotë Jonuz Martaj, Jonuzi është një person i rritur jetim në familjen tonë. Shiko, tha, kjo ndarja jote më pëlqeu dhe mbase ti nuk vjen me ne dhe e dyta ti je më i riu këtu. Ai më tha ta kesh parasysh dhe të më japësh besën, tha që të çosh këtë fjalë ku të mundesh për të sqaruar shkakun e arrestimit tim pas takimit që bëra në Maqellarë me kryetarin e sigurimit dhe kryetarin e degës (ai nuk i dinte emërtimet në atë kohë) dhe aty për aty përmendi mbiemrin Shehu, madje bënte dhe një lloj lidhje me të si një i afërm i Mehmetit. Të gjitha bisedat tha që i kam bërë në Maqellarë me këtë funksionarin e lartë të sigurimit me mbiemër Shehu, kur i dhashë të dhënat e mundshme, i gjeta këtu te këta të UDB-së. Madje, ata dinin edhe dhuratën 25 mijë dinarë që më dha aty në Maqellarë ky Shehu. Po, po, atë ditë ai më dha këto dinarë, bile më tha që këto para t’i përdorësh për fëmijët, sepse ti duke u marrë me punën tonë, nuk ke kohë që të punosh tokën e të ndihmosh familjen. Mirëpo të them të drejtën unë u indinjova dhe i thashë, unë nuk punoj për para dhe i thashë që unë punoj për Shqipërinë për atdheun tim, prandaj i thashë futi brenda këto para dhe në asnjë mënyrë nuk i mora paratë dhe u largova. Në krye të dy javëve më arrestuan jugosllavët UDB-ja. Pas arrestimit që më bëri UDB-ja mbasi u bind ajo që nuk arriti të nxirrte diçka, duke më quajtur disa herë ti ujku i vjetër që ti ke provuar dhe burgun italian dhe ata e dinin këtë gjë, pasi u bindën që nuk arritën të zbulonin atë që deshën ata, atëherë më thanë po paratë pse nuk i more në Maqellarë kur ti dhanë, atëherë u binda, tha se këtu ka një diçka, pse nuk i more paratë apo je patriot, punon për Shqipërinë dhe nuk ke nevojë për para, e megjithatë nuk më zbërthyen asgjë. Kjo tradhti u bë nga Feçor Shehu. Unë erdha në ’56, dikush do të pyesë pse nuk e the këtë, nuk guxova të them të drejtën, nuk guxoja, po më pyet do ua them, sepse Feçor Shehun e gjeta drejtor të Drejtorisë së Punëve të Brendshme Tiranë .......
ARANIT ÇELA: Me radhë, ke gjë Mihallaq Ziçishti, Llambi Peçini, ke gjë, Gani Kodra, Kadri Hazbiu ke gjë, Feçor Shehu ke?
FEÇOR SHEHU: Pse nuk e ka thënë më parë ky këtë, apo i doli përpara me atë që tha se kishte frikë nga që unë u bëra drejtor i sigurimit të Tiranës. Tashti unë kam një pyetje, pse arrihet në konkluzion, meqenëse UDB-ja i paska thënë atij tekstualisht çfarë kemi biseduar në Maqellarë dhe duhet të jetë tradhtuar nga Feçor Shehu dhe jo nga të tjerë, që mund të ketë biseduar Jonuz Majtari, se atje në takim unë vetëm s’vija kurrë...
ARANIT ÇELA: Këtij i ka thënë Jonuz Majtari ky vetë s’di gjë
FEÇOR SHEHU: I ka thënë që jam takuar me kryetarin e sigurimit po atje me kryetarin e sigurimit kanë qenë dhe njerëz të tjerë dhe në Peshkopi kanë dalë njerëz tradhtarë, pse ai del në konkluzion që duhet të ketë bërë Feçori dhe jo ndonjë tjetër. Nejse unë qëndroj në dëshminë time .....
ARANIT ÇELA: Po Jonuz Majtarën, nuk e njeh ti...
FEÇOR SHEHU: Unë nuk mbaj mend i nderuar kryetar.
RRAPI MINO: Me leje shoku kryetar, siç e dëgjuat edhe juve nga dëshmitari Idriz Lleshi, siç del dhe nga leximi i dy deponimeve të dy dëshmitarëve të tjerë, Lytfi Lleshi dhe të dëshmitarit Shaqir Lleshi sa vjen e plotësohet më mirë kuadri i deponimeve që ka dhënë vetë i pandehuri Mihallaq Ziçishti lidhur me vënien në shërbim në organet e punëve të brendshme të rrethit të Dibrës. Faktet e provojnë akoma më së miri që i pandehuri Feçor Shehu është spiun i hershëm i UDB-së dhe i ka shërbyer me besnikëri kësaj agjenture të ndyrë. Siç doli nga ky dëshmitar, nga dëshmitari Idriz Lleshi, Jonuz Majtara ishte një patriot shqiptar që punonte dhe luftonte për vendin e tij dhe kërkonte gjithnjë ndihmë nga ana jonë. Veç kësaj, shoku kryetar, i pandehuri Feçor Shehu atë detyrën e tij prej agjenti të vjetër të UDB-së na i provoi edhe dëshmitari Telat Agolli. Ai na tha disa fakte të cilat janë tamam karakteristike të përdorura më përpara nga armiqtë, siç ishin më përpara ministri i Brendshëm Koçi Xoxe, d.m.th metoda trockiste, ashtu ka vepruar edhe i pandehuri Feçor Shehu me dëshmitarin Telat Agolli, e para njëherë se e ka marrë veten në hetuesi, ç’është kjo marrje vetëm në hetuesi, pse bën këto! Bëhen vetëm pse duhet të kryhet vetëm ndonjë veprim armiqësor. E dyta, ka përdorur mbi Telat Agollin presione nga më të ndryshmet dhe shkas shoku kryetar dhe ky shokë gjyqtarë që e kanë akuzuar edhe për tradhti ndaj atdheut dhe gjykata ua hodhi poshtë dhe gjetën pastaj ca dëshmitarë kështu për agjitacion e propagandë dhe u dënua vetëm për një dënim të lehtë. E treta, ka dashur ta përpunojë këtë dëshmitarë, d.m.th të pandehurin në atë kohë që ishte në pozitën e të pandehurit që ishte Telat Agolli ka dashur ta përpunojë tradhtari Feçor Shehu, me qëllim për ta vënë në shërbim të UDB-së, d.m.th ky është një zinxhir i tërë që pohon që i pandehuri. Feçor Shehu është një spiun i hershëm i UDB-së dhe gjatë gjithë kësaj kohe i ka shërbyer asaj me ndërgjegje...
ARANIT ÇELA: Mirë. Të vijë Suzana Tafaj. Të kemi thirrur të na dëshmosh se a ka pasur lidhje midis Xhavit Ismailagës dhe Feçor Shehut, ç’di ti nga ajo që ke njohur gjatë punës në hotel “Dajti” dhe, e dyta, pastaj lidhur me ç’ke bërë ti gjatë kohës që kur vinte aty Feçori ke parë ndonjë lëvizje, ndonjë gjë...
SUZANA TAFAJ: Unë kam vënë re që Xhaviti kishte miqësi me Feçor Shehun dhe gjithashtu kam vënë re që çdo të premte vinte në hotel “Dajti” Feçor Shehu për t’u qethur the kur hynte, dera mbyllej. Kam vënë re dhe këtë gjë, që në disa raste që në momentin që hynte në berberhane Feçor Shehu, dilte nga berberhania Spase Tuniç.......
ARANIT ÇELA: E njihje ti, çfarë është ky Spase Tuniç?...
SUZANA TAFAJ: Ky është jugosllav, është sekretar i ambasadës jugosllave, është sekretar i kulturës. Kështu ka qenë që në fillim, e kam lexuar në gazetën “Zëri i Popullit”, kur vinin ato grupet kosovare, që d.m.th i shoqëronte filani Spase Tuniç, sekretari i kulturës ...
ARANIT ÇELA: Këtë ke parë ti që njëri hynte e tjetri dilte, ndonjë gjë tjetër di?...
SUZANA TAFAJ: E kemi pasur problem se nuk na vinte në mbledhjet e kolektivit, nuk na vinte në informacionet politike, për këto gjëra Xhavitit ne i kemi hequr vërejtjen, d.m.th që do të vish patjetër në mbledhje....
ARANIT ÇELA: Xhavit Ismailaga ke gjë, nuk ke gjë; Mihallaq Ziçishti ke gjë, Llambi Peçini, Kadri Hazbiu ke gjë, s’ke gjë. I pandehuri Feçor Shehu ke ndonjë gjë me këtë vajzën, s’ke. Mund të largohesh ti vajzë...