Fitoi çmimin “Nobel” për paqe, por rrezikon të jetë një familje e palumtur

Çmimi “Nobel” për paqe për Bashkimin Europian ka ardhur pikërisht si një pranim i faktit se projekti më i madh i bashkimit, monedha e përbashkët, i ka mbijetuar tri viteve të trazirave financiare dhe se nuk do të shkojë drejt shpërbërjes. Por pasi ka arritur të shmangë divorcin e dhimbshëm dhe humbjes së disa prej fëmijëve problematikë, eurozona gjithsesi rrezikon të ketë një të ardhme si një martesë e pabarabartë dhe pa dashuri me sherre të vazhdueshme dhe me mundësinë për dhoma gjumi të ndara, thotë “Reuters” në një analizë.

Dy gjëra janë bërë të qarta gjithnjë e më shumë gjatë javëve të fundit dhe që qenë diskutuar gjerësisht më herët: ndryshe nga opinioni dominues në fillim të këtij viti, euro është këtu për të qëndruar dhe se ka shumë gjasa që do t’i mbajë 17 vendet anëtare aktuale e do të shtojë të tjera gjatë viteve të ardhshme. Por eurozona nuk ka gjetur ende një mënyrë për të shmangur stanjacionin ekonomik, papunësinë dhe hendekun shoqëror mes veriu dhe jugut, gjë që ka fuqizuar lëvizjet euroskeptike në shumë vende. Këto ngjarje kanë sjellë edhe ndryshimin e parashikimit për të ardhmen e eurozonës.

Banka Qendrore Europiane deklaroi muajin e kaluar se do të blejë sasi të pakufizuara të bondeve të vendeve anëtare me kushtin që këto të fundit të pranojnë marrëveshje shpëtimi. Kjo gjë ka sjellë mposhtjen e atyre që vinin bast për shpërbërjen e eurozonës.

Fondi i përhershëm i shpërthimit filloi punën efektivisht duke vënë në dispozicion të zgjidhjes së problemeve 500 miliardë euro.

Kancelarja gjermane, Angela Merkel, vizitoi Athinën dhe bëri të ditur se Berlini dëshiron që ky vend të qëndrojë në eurozonë.

Të tria këto fakte kanë bërë që të gjithë skenarët që parashikonin shpërbërjen e eurozonës, të thaheshin menjëherë. Në tregjet e monedhave, bastet e shkurtra kundër euros janë vënë nën kontroll. Interesat e bondeve kanë rënë dhe aksionet e bankave janë rritur. Analistët e bankës “Citigroup” në SHBA bënë të ditur se e kanë ndryshuar parashikimin e vet. Ajo e uli probabilitetin e daljes së Greqisë nga 90 për qind në 60 për qind. Por jo çdo gjë ka ecur në rrugën e duhur. Fondi Monetar Ndërkombëtar vlerësoi javën e kaluar se planet e shpëtimit në kontinent janë “thelbësisht të paplota dhe se mund ta zhysin Europën në spiralen e largimit të kapitalit, frikës së shpërbërjes dhe rënies ekonomike”.

Ky nuk është problemi i vetëm. Kriza ka ndryshuar balancën e pushtetit në Europë, duke i dhënë Gjermanisë pushtet dominues, ndërsa vendet e jugut janë bërë më të dobëta dhe më të varura. Dhe rreziku është që shumë shpejt të kemi dy lloje europe, me një grup thelbësor të përqendruar tek eurozona dhe me Britaninë, Suedinë e disa vende të tjera si një grup jashtë bashkimit të vërtetë. Një ide e re po qarkullon dhe po fiton mbështetje, ajo e krijimit të dy buxheteve në eurozonë. Dhe ndërsa eurozona merr gjithnjë e më shumë tiparet e një shteti federal, shtete jashtë monedhës së përbashkët po dobësojnë lidhjet.

Euroskeptikët në Britani po fuqizohen dhe disa po kërkojnë daljen nga Bashkimi Europian. Suedia, një vend ku estabilishmenti politik është pro Europës, por që humbën referendumin për anëtarësimin në euro në vitin 2004, përballë popullit mosbesues, e ka edhe më të vështirë të afrohet me kontinentin në këto kohë.

Në të gjitha rastet, Europa përballet me një periudhë trazirash, ndërsa përpiqet të ripërcaktojë limitet dhe shtrirjet e marrëdhënies brenda vetes mes anëtarëve të ndryshëm të familjes.

Shqip

Fitoi çmimin “Nobel” për paqe, por rrezikon të jetë një familje e palumtur

Fitoi çmimin “Nobel” për paqe, por rrezikon të jetë një familje e palumtur

Fitoi çmimin “Nobel” për paqe, por rrezikon të jetë një familje e palumtur :: Komentet