Saturday, 29 December 2007
Bashkia e Tiranës në duart e kryetarit të saj, Edi Rama është shndërruar në një makineri që punon në funksion të Partisë Socialiste. Vlen të theksohet se Rama duke shfrytëzuar postin si drejtues i bashkisë më të madhe të kryeqytetit po forcon pozitat e tij si kryetar i Partisë Socialiste. Bëhet e ditur se në arratinë e tij nëpër komunat më të thella të Shqipërisë, të gjitha shpenzimet i ka bërë me anë të fondeve të Bashkisë. Skandali i kryebashkiakut Rama qëndron në lojën e tij me taksat e qytetarëve, para të cilat shkojnë në shërbim të tureve të tij nëpër komunat e Shqipërisë për hir të një politike të re që kërkon të mbjellë në selinë rozë.Kulminanca e dështimit të kryebashkiakut Rama përfundon me humbjen e 10 milionë USD, këto të fundit të ardhura të bashkisë së Tiranës. Humbja e 10 milionë USD nuk mund të sinjifikojë asgjë për Ramën por për qytetarët do të thotë shumë. Për këta të fundit, humbja e kësaj sasie lekësh do të thotë më pak investime në shkolla, çerdhe, kopshte, rrugë, kënde lojërash dhe shërbime. Janë plot 137 ture që numërohen në të gjithë Shqipërinë të Edi Ramës me shpurën e tij socialiste. Këto ture janë financuar me taksat e qytetarëve të Tiranës të cilët edhe duhet të përdorin një shërbim transporti qytetas skandaloz për t’i dhënë mundësinë kryetarit të tyre të bëjë fushatë me makina luksoze në fshatrat e vendit. Ndërkohë që edhe pse jemi në ditët e fundit të vitit 2007 dhe vetëm dy ditë na ndajnë nga nata e madhe e ndërrimit të viteve, bashkia më e madhe në vend, ajo e Tiranës, nuk ka organizuar asnjë aktivitet me këtë rast. Ndryshe nga festa të tjera të mirëpritura nga kryebashkiaku Edi Rama, siç mund të përmendim Natën e Bardhë (një festë kjo e ardhur në Shqipëri ekskluzivisht nga ai), viti i ri duket se do të kalojë në heshtje të plotë nga ky i fundit. Bashkia e Tiranës nuk ka lajmëruar asnjë aktivitet me rastin e Vitit të Ri. Tirana është metropoli shqiptar dhe njerëzit presin ta shohin atë të ndriçuar dhe ngazëlluese, veçanërisht në natën e ndërrimit të viteve. Në të gjithë botën, kryeqytetet marrin një “nur” të veçantë teksa pritet ardhja e Vitit të Ri. Shumë aktivitete kulturore, shumë zhurmë, shumë njerëz, shumë fishekzjarrë dhe shumë atmosferë festive. Kjo është panorama festive në vendet e botës. Ndërsa në kryeqytetin shqiptar, duket se kjo atmosferë ende nuk ka trokitur. Tirana, kryeqyteti shqiptar, duket më “i ftohtë” se kurrë. Deri tani, bashkia nuk ka lançuar asnjë organizim të veçantë, apo aktivitet kulturor për festën e Vitit të Ri. Vëmendja e bashkisë për këtë vit, duket fare mirë që tek dekori dhe zbukurimi që i ka kushtuar Tiranës. I gjithë zbukurimi i qytetit konsiston vetëm në zbukurimin e pemës në qendër, vendosjen e tabelës në sheshin Skënderbej, e cila do të tregojë momentin e ndërrimit të viteve, si dhe disa drita zbukuruese që fillojnë nga ministritë e përfundojnë tek Korpusi. Gjithashtu, si për të zbukuruar qendrën e Tiranës, gjatë këtyre ditëve të fundit, Bashkia e Tiranës është marrë edhe me shatërvanët, të cilat ndodhen në mes të Sheshit Skënderbej. Duket se këto të fundit nuk mund të shpëtonin nga vëmendja e bashkisë, e cila ka urdhëruar mbushjen e tyre me dhe. Mesa duket kjo ka qenë edhe rruga më e shkurtër për të shndërruar sadopak fytyrën e tyre nga gropa me ujë të ndenjur, në gropa me dhe të kuq. Ish-shatërvanët e kthyer tashmë në gropa me dhe, pritet të kthehen në lulishte të ardhshme. Ndërsa rrugët e tjera të qytetit nuk janë përfshirë në zbukurimin e bashkisë. Nëse gjatë viteve të shkuara, të paktën rrugët kryesore zbukuroheshin me drita, këtë vit vihet re se këto të fundit janë vendosur vetëm përgjatë bulevardit “Dëshmorët e Kombit”. Rrugët e tjera këtë vit janë lënë në “errësirë”. Ky është i gjithë organizimi i Bashkisë së Tiranës me rastin e festave të fundvitit. Tirana e 2007 duket shumë herë më e shëmtuar se një vit më parë pasi të njëjtat zbukurime e dekoracione të vjetshme janë vendosur në rrugët kryesore të qytetit edhe pse kujtojmë se Rama ka zhvilluar një goxha tender për dekoracionet e festave. Fjongot e Ramës të cilat kanë ruajtur shumë mirë përplasjen në magazina ku ishin hedhur për një vit të tërë. E reja në dekoracionet e kryeqytetit janë vargjet me drita të kuqe, të cilat janë si gjak që kullon nga qielli dhe japin pikërisht mesazhin për taksapaguesit.
shkeputur nga gazeta "Sot"