Nga Kastriot Myftaraj


Ditën e premte, i ftuari i parë në emisionin «Deja’ vu» të Mustafa Nanos në Top Channel, ishte Ministri i Financave, Ridvan Bode. Në këtë emision të orëve të vona, jashtë audiencës top Ministri Bode mori kurajën ta shigjetojë në një mënyrë mjaft bizarre kryeministrin Berisha. Kur Mustafa Nano i paraqiti, sipas praktikës së emisionit të tij, një fotografi nga protestat e dhjetorit 1990, dhe i shprehu pikëpamjen e tij se kishte përshtypjen sikur kjo lëvizje nuk qe dhe aq spontane, por e komanduar nga regjimi komunist, Ridvan Bode u shpreh se studentët qenë të sinqertë në kërkesat që ata bënin, për demokraci dhe për ta bërë Shqipërinë si Evropa. Bode vazhdoi duke thënë se studentët nuk u ngritën që Presidenti komunist të zëvendësohej nga një tjetër komunist. Kjo ishte një goditje mjaft e hidhur për Berishën, se Presidenti komunist, Ramiz Alia, u zëvendësua nga një tjetër President komunist, Sali Berisha. Me këtë Ridvan Bode u vu në një linjë me kritikat që sot po ia bën Berishës Spartak Ngjela. Ministri Bode duket se e ka kuptuar që Berisha, pavarësisht se shprehet se nuk do të ketë ndryshime në qeveri, ka planifikuar ta largojë në ndryshimet e ardhshme në qeveri dhe në parti, nga dy postet që mban, ato të ministrit dhe të sekretarit të përgjithshëm. Ridvan Bode është Ministri i Financave që ka qëndruar më shumë në post në kohën e tranzicionit, pas Anastas Angjelit, duke qenë se e ka mbajtur këtë post edhe në qeverisjen e parë të PD, vërtet për tetë muaj, në 1996-1997, por ama në një periudhë kur u konsumua shumë, për shkak se atëherë qe boom-i dhe falimentimi i firmave rentiere piramidale, proces ky me të cilin ai ishte drejtpërdrejt i lidhur. Por jo më pak është konsumuar Bode edhe gjatë këtyre rreth dy viteve e gjysmë, që ai ka qenë në postin e Ministrit të Financave, pas rikthimit të PD në pushtet, në vitin 2005. Posti i Ministrit të Financave është një post ku ai që e mban konsumohet shumë, siç ka ndodhur edhe me Boden edhe herën e dytë që e mori portofolin e financave, kur ka probleme të mëdha me inflacionin, mbledhjen e tatimeve, doganat, borxhin, si dhe skemat nepotike dhe të llojit të kamariljes, në poste-kyç në tatime, dogana, në kombinim me agjenci doganore të caktuara të njerëzve të tij, etj. Prandaj PD, në qeverisjen e saj të parë, në vitet 1992-1997, pati katër ministra financash, Genc Ruli, Pirro Dishnica, Dylber Vrioni dhe Ridvan Bode. Edhe PS, gjatë tetë viteve të qeverisjes së saj, 1997-2005, pati tre ministra të financave, Arben Malaj, Anastas Angjeli, Kastriot Islami, nga të cilët më gjatë qëndroi në post Anastas Angjeli, për 39 muaj, në vitin 1991, dhe në vitet 1998-2001. Ridvan Bode, që tashmë ka qëndruar në post për 36 muaj, dhe ende vazhdon të qëndrojë, në mars do ta thyejë rekordin e Anastas Angjelit, në rast se do të vazhdojë të qëndrojë në postin që ka, gjë që duket e vështirë. Ridvan Bode e kupton dhe vetë që është konsumuar shumë dhe se ka ardhur koha të largohet. Por duket se ai nuk është i përgatitur që të lëshojë portofolin e financave, që ai e konsideron si portofolin e vet privat, prandaj filloi të atakojë Berishën. Ndoshta me këtë ushqen ëndrrën e marrë se do të mund të riciklohet në politikë. A ndoshta kërkon që ta përdorë antiberishizmin si investim për të mos u atakuar nga opozita në të ardhmen, siç kanë bërë edhe të tjerë para tij. Gjithsesi duket se Bode do të ndjekë shembullin e Besnik Mustafajt, që u bë oponent i Berishës me t’ u larguar nga posti i ministrit. Bode e kupton se nëse humb postin e ministrit shumë shpejt do të humbë dhe postin e sekretarit të përgjithshëm të PD, të cilin e mban prej 10 vjetësh. Kjo do të thotë se Bode do të largohet përfundimisht nga politika, duke mos u bërë as deputet në zgjedhjet e ardhshme. Tek ky rebelim i vonuar i Bodes ka diçka ironike. Kur Bode thotë se studentët nuk u ngritën në dhjetor 1990 që një President komunist si Ramiz Alia, të zëvendësohet nga një tjetër President komunist, ai duhet të përgjigjet dhe për atë se a donin studentët e dhjetorit 1990 (flas për turmën e sinqertë dhe jo për emisarët e Ramiz Alisë që shkuan gjoja si përfaqësues të studentëve), që Shqipëria pas 17 vjetësh, në vitin 2007, të kishte ministër financash një ekonomist agrar, që kishte qenë shef plani në një kolkoz (kooperativë bujqësore), çfarë ishte Ridvan Bode? Dhe a do të donin studentët atëherë që në vitin 2007, një ish-aparatçik kolkozi, si Bode, t’ u mbante leksione shqiptarëve nga pozita e ministrit të financave për teoritë e Milton Friedman, autorit të «Kapitalizmi dhe liria», siç bëri në emisionin e Mustafa Nanos