LAJME SHKURT
SPORT

K.Ronaldo: Ndihem vërtet një skllav

Kristiano Ronaldo i doli në mbrojtje kreut të FIFA-s, Sep Blater, pas komentit të tij dy ditë më parë, duke e pohuar: "Me të vërtetë ndihem skllav". Blateri hapi një polemikë në media pas deklarimit se mesfushori i paguar me 120,000 sterlina në javë nga Mançester Junaited është një skllav i ditëve moderne, përderisa klubi refuzon ta shesë atë te Reali i Madridit. Klubi kampion i Anglisë kërkon ta mbajë Ronaldon edhe katër vjetët e mbetura të kontratës, edhe pse vetë futbollisti ka kërkuar largimin nga "Old Traford" pa pyetur fare për çështjet financiare.

Nasri kalon zyrtarisht tek Arsenali

Nasri bëhet zyrtarisht lojtar i Arsenalit. Mesfushori i Olimpikut të Marsejës i dha fund orvatjeve kur firmosi kontratën me klubin e Premier Ligës, pas marrëveshjes së arritur mes dy klubeve. Kartoni i 21-vjeçarit kushtoi 14 milionë euro. "Ai është i ri, i shpejtë dhe teknik - tha Venger -. Nasri ka treguar një potencial të lartë në paraqitjet e bëra me ekipin e Marsejës dhe me Francën. Afrimi i tij do ta rrisë ndjeshëm cilësinë e lojës sonë". Edhe vetë talenti e ka quajtur një moment të rëndësishëm të karrierës firmosjen me një prej klubeve më të mëdha në botë.

PSV interesohet për kthimin e Ronit

Nga sa është përfolur ditën e djeshme në shtypin spanjoll, Ronaldo, ish-sulmuesi i Milanit, duket shumë pranë një rikthimi te skuadra e tij e parë evropiane, PSV Eindhoven. Sipas asaj që shkruhet në të përditshmen sportive "AS", drejtuesit e skuadrës holandeze kanë kontaktuar në Brazil me menaxherin e lojtarit, ndonëse "Fenomeni" ende s'ka rikuperuar dëmtimin e tij. Duke parë që Milani nuk ka ndërmend t'i rinovojë kontratën Ronaldos, braziliani për sezonin e ardhshëm duket i destinuar të rikthehet edhe në Brazil, tek skuadra e tij e zemrës, Flamengo.

Keiroz, trajneri i ri i Portugalisë

Karlos Keiroz është zyrtarisht trajneri i ri i përfaqësueses së Portugalisë. Ish-zëvendëstrajneri i Mançester Junajted ka firmosur dje në Lisbonë një kontratë 4-vjeçare me Federatën Portugeze të Futbollit. Pas aventurës njëvjeçare tek "galaktikat" e Realit të Madridit, Karlos Keiroz pret të startojë aventurën më të rëndësishme të karrierës së tij, si zëvendësues i Felipe Skolarit që mori drejtimin e Çelsit. "Jam shumë i lumtur për një shans të tillë dhe shpresoj që të vazhdojmë në të njëjtën rrugë, të cilën e ndërpremë pas largimit të Skolarit".
Panorama